تَرُشُي 13:11-42

¹¹عَوَ يَكْسِ، مَرِفِ بَرَ عَ بّلّشّ سَ عِ مَ. عِ قَمَ نّ دْنشُدٍ. وَشَتِ ندٍ بُن مَ، عِ مُ سٌفٍ تٌمَ.» دِ مِ نَشَ دُ سُ عَ شُن نَ كٍرٍن نَ. عَ نَشَ سٌ مِلِمَلَقٍ نَ مَ، عَ نُ مِشِيٍ قٍن نَشٍيٍ عَ يِ رَ سُشُمَ.

¹²عَوَ، مَنفّ سّرِفُ ثْلُ تٌ نَ تٌ، عَ نَشَ دَنشَنِيَ مَرِفِ شَ سّرِيّ مَ.

¹³ثْلُ نُن عَ بٌورٍيٍ تٌ بَكِ كُنكُي كُي ثَقٌسِ، عٍ نَشَ سِفَ ثّرِفَ نَشَن نَ ثَنقِلِيَ بْشِ مَ. يَيَ نَشَ عَ بَ عٍ مَ، عَ نَشَ فبِلٍن دَرِ سَلَمُ.

¹⁴مّننِ عٍ نَشَ تِ كِرَ شْن. عٍ نَشَ سٌ عَنتِيْكِ نَشَن نَ ثِسِدِيَ بْشِ مَ. عٍ تٌ سٌ سَلِدٍ كُي مَلَبُ لْشْي، عٍ نَشَ عٍ مَفٌرٌ.

¹⁵تَوُرٍتَ مُنسَ نُن نَمِحْنمّيٍ شَ كِتَابُي شَرَنيِ تٌ بَ عَ رَ، سَلِدٍ شُنمَتِيٍ نَشَ شّيرَ تِ عٍ مَ، عٍ نُ عَ قَلَ، «وٌن نفَشَكٍرٍنيِيٍ، شَ مَرَ سِ ندٍ نَ وٌ يِ رَ حَمَ بّ، وٌ عَ قَلَ.»

¹⁶ثْلُ تٌ كٍلِ، عَ نَشَ عٍ مَسَبَرِ، عَ قَ عَ قَلَ، «عِسِرَيِلَكَيٍ نُن وٌ تَن نَشٍيٍ فَاشُشِ عَلَ يَ رَ، وٌ وٌ تُلِ مَتِ.

¹⁷عِسِرَيِلَ حَمَ مَرِفِ عَلَ بَرَ وٌن بَبَيٍ سُفَندِ. عَ نَشَ عٍ رَوُيَ مِسِرَ بْشِ مَ. نَ شَنبِ عَ نَشَ عٍ رَ مِنِ نَا عَ سّنبّ رَ.

¹⁸عَ نَشَ عٍ رَبَلٌ حّ تٌنفٌ نَانِ حْندْن فبٍنفبٍرٍنيِ مَ.

¹⁹عَ تٌ سِ سٌلٌقٍرٍ هَلَكِ كَنَان بْشِ مَ، عَ نَشَ نَ بْشِيٍ قِ عِسِرَيِلَكَيٍ مَ.

²⁰حّ كّمّ نَانِ حّ تٌنفٌ سُولِ بُن مَ، عَ نَشَ مَنفّيٍ تِ عٍ شُن مَ هَن عَننَبِ سَمُوٍلِ شَ تّمُي.

²¹عَوَ، عٍ تٌ وَ مَنفّ بٍلٍبٍلٍ شْن مَ، عَلَ نَشَ كِسُ شَ دِ، سْلُ، نَشَن قَتَن بُنيَمِن بْنسْي رَ، عَ نَشَ نَ تِ عٍ شُن مَ. عَ شَ مَنفّيَ نَشَ بُ حّ تٌنفٌ نَانِ.

²²عَ تٌ سْلُ بَ مَنفّيَ رَ، عَ نَشَ دَوُدَ قِندِ مَنفّ رَ عٍ شُن. عَ يِ سٍيدٍيَ مَسٍن نَ نَن مَ، ‹ﭑ بَرَ دَوُدَ تٌ، يِسَيِ شَ دِ، نَشَن كّحَ رَقَن ﭑ مَ. عَ تَن نَن ﭑ سَفٌ بِرِن نَكَمَلِمَ.›»

²³«عَلَ عِسِرَيِلَ رَكِسِمَ رَ مِنِشِ دَوُدَ بْنسْي نَن يَ مَ، نَشَن لَنشِ عِسَ مَ، عَلْ عَ لَايِدِ تٌنفٌشِ كِ نَشّ.

²⁴بٍينُن عِسَ شَ قَ، يَيَ نُ بَرَ مِشِيٍ كَوَندِ عٍ شَ تُوبِ، عٍ شَ عٍ شُنشَ يٍ شْورَ.

²⁵عَ شَ وَلِ رَحْن تّمُي، عَ نَشَ عَ قَلَ، ‹ﭑ مُ قِندِشِ مِشِ شَ رَ، وٌ نَشَن مَحْشُنشِ. نَ كَنيِ قَمَ ﭑ شَنبِ رَ. نَ بِنيّ مُ نَ ﭑ يِ رَ ﭑ شَ عَ شَ سَنكِرِ مَقُلُن.›»

²⁶«ﭑ نفَشَكٍرٍنيِيٍ، عِبُرَهِمَ بْنسْي شَ دِيٍ نُن وٌ تَن نَشٍيٍ فَاشُمَ عَلَ يَ رَ، يِ كِسِ مَسٍنيِ رَ سَنبَشِ وٌن تَن نَن مَ.

²⁷دَرِ سَلَمُكَيٍ نُن عٍ شُنمَتِيٍ مُ تِن عِسَ رَ. عٍ مُ قَهَامُي سْتْ نَمِحْنمّيٍ شَ مَسٍنيِ مَ، نَشَن شَرَنمَ مَلَبُ لْشْي بِرِن. كْنْ عٍ نَشَ نَ مَسٍنيِ يَتِ رَكَمَلِ عِسَ تْوحّفّقٍ رَ.

²⁸هَلِ عٍ تٌ مُ سٍسٍ تٌ عَ لَنمَ عَ شَ قَشَ نَشَن مَ، عٍ نَشَ ثِلَتِ مَشَندِ عَ شَ عَ قَشَ.

²⁹نَ كُي، عٍ نَشَ قٍ بِرِن نَكَمَلِ نَشٍيٍ سّبّشِ عَ شُن. عٍ مَن نَشَ عَ رَفٌرٌ وُرِ مَفَلَنبُشِ مَ، عٍ عَ قُرٍ سَ فَبُرِ كُي.

³⁰كْنْ عَلَ نَشَ عَ رَكٍلِ قَشّ مَ.

³¹مِشِ فبٍفبٍ نَشٍيٍ عِسَ مَتِ كٍلِقٍ فَلِلٍ سِفَقٍ دَرِ سَلَمُ، نٍيٍ نَشَ عَ تٌ شِ وُيَشِ بُن مَ. يَكْسِ عٍ بَرَ قِندِ عَ شَ سٍيدٍيٍ رَ حَمَ تَفِ.»

³²«عَوَ، مُشُ تَن قَن يِ شِبَارُ قَنيِ مَسٍنمَ نّ وٌ بّ، عَلَ لَايِدِ نَشَن تٌنفٌ وٌن بٍنبَيٍ بّ.

³³عَلَ بَرَ عَ رَكَمَلِ وٌن تَن بّ، عٍ شَ دِيٍ. عَ بَرَ عِسَ رَكٍلِ قَشّ مَ عَلْ عَ سّبّشِ يَبُرَ سٌرَ قِرِن ندٍ كُي كِ نَشّ. عَ نَشّ، ‹ﭑ مَ دِ نَن عِ رَ. ﭑ بَرَ قِندِ عِ بَبَ رَ تٌ.›

³⁴عَ بَرَ عَ رَكٍلِ قَشّ مَ، عَلَكٌ عَ نَشَ بْرْ. عَ نَ نَن مَسٍنشِ يِ كِ، ‹لَايِدِ سّنِيّنشِيٍ، نَشٍيٍ مُ كَنَمَ، ﭑ نَشٍيٍ تٌنفٌشِ دَوُدَ بّ، ﭑ نٍيٍ تٌنفٌمَ نّ وٌ قَن بّ.›

³⁵نَ نَ عَ رَ، عَ مَن نَ مَسٍنيِ قَلَشِ يِرٍ فبّتّ. عَ نَشّ، ‹عِ مُ عِ شَنُنتٍنيِ لُمَ فَبُرِ كُي.›

³⁶دَوُدَ تٌ فّ عَلَ سَفٌ رَبَدٍ عَ شَ وَشَتِ، عَ قَشَ نّ، عَ عَ بٍنبَيٍ لِ فَبُرِ كُي، عَ مَن بْرْ نَا.

³⁷كْنْ عَلَ مِشِ نَشَن نَكٍلِشِ قَشّ مَ، نَ تَن مُ بْرْ.»

³⁸«ﭑ نفَشَكٍرٍنيِيٍ، نَشَن كَوَندِشِ وٌ بّ، وٌ شَ عَ كٌلٌن يُنُبِ شَقَرِ مَ عَ تَن نَن سَابُي رَ.

³⁹نَشَن يٌ دَنشَنِيَ، نَ كَنيِ بَرَ كِسِ يُنُبِيٍ مَ، عَننَبِ مُنسَ شَ سّرِيّ مُ نْ وٌ رَكِسِدٍ نَشٍيٍ مَ.

⁴⁰نَ كُي، وٌ وٌ مّينِ نَشَن قَلَشِ نَمِحْنمّيٍ شَ كِتَابُييٍ كُي، عَ نَشَ قَ وٌ لِ. عٍ نَشّ،

⁴¹‹وٌ عَ مَتٌ، وٌ تَن مِشِ مَيٍلٍيٍ، وٌ دّ شَ عِشَرَ، وٌ بَرَ لْي، بَرِ مَ ﭑ قَمَ كّوَلِ رَبَدٍ وٌ شَ لْشْييٍ نَن مَ، وٌ مُ لَمَ نَشَن نَ هَلِ عٍ عَ يَبَ وٌ بّ.›»

⁴²سْلُ نُن بَرَنَبَسِ تٌ مِنِ، مِشِيٍ نَشَ عٍ مَشَندِ عٍ مَن شَ يِ مَسٍنيِ تِ مَلَبُ لْشْي نَشَن مَن قَمَ كْرّ.