Taruxui 11:17-29 in Susu

¹⁷ Ala to bara e ki alɔ a won kixi ki naxɛ, won tan naxee danxaniyaxi Isa Ala xa Mixi Sugandixi ma, a nu lan n xa Ala matandi?»

¹⁸ E to na mɛ, e naxa dundu, e naxa Ala matɔxɔ, «Ala bara tuubi ragiri si gbɛtɛe fan bɛ, alako e fan xa kisi.»

¹⁹ Isa fɔxirabirɛ naxee yensen Etiyɛn faxa xanbi ɲaxankatɛ saabui ra, e naxa siga han Fenisiya, Sipiri, nun Antiyɔki. E nu Ala xa masenyi kawandima Yuwifie nan bɛ.

²⁰ Kɔnɔ Sipirikae nun Sirenikae naxee nu na e ya ma, e to siga Antiyɔki, e naxa Marigi Isa xa xibaaru fanyi masen Girɛkikae fan bɛ.

²¹ Marigi xɔnyɛ nu na e ma. Mixi gbegbe naxa danxaniya, e naxa tuubi Marigi ma.

²² Darisalamu danxaniyatɔɛ ɲama to na fe mɛ, e naxa Baranabasi xɛɛ Antiyɔki.

²³ A to so naa, a naxa ɲɛlɛxin Ala xa hinnɛ tofe ra. A naxa e ralimaniya, e xa danxaniya Marigi ma.

²⁴ Baranabasi, mixi fanyi nan nu a ra. A nu rafexi danxaniya nun Ala Xaxili Sɛniyɛnxi ra. Ɲama gbegbe naxa danxaniya Marigi ma.

²⁵ Na xanbi, Baranabasi naxa siga Tarise Sɔlu fende.

²⁶ A to a to, a naxa fa a ra Antiyɔki. E nun danxaniyatɔɛe nan nu e malanma naa ɲɛ keren birin bun ma. E naxa mixi gbegbe xaran. Isa fɔxirabirɛ naxee nu na Antiyɔki, nee nan singe «Isayanka» xili sɔtɔ.

²⁷ Na tɛmui, namiɲɔnmɛ ndee naxa goro Antiyɔki, kelife Darisalamu.

²⁸ Naxan nu xili Agabu, na naxa ti, a fa a fala Ala Xaxili Sɛniyɛnxi saabui ra, a kaamɛ xungbe fama sinde duniɲa birin ma. Na fe raba mangɛ Kilɔdi xa waxati nɛ.

²⁹ Isa fɔxirabirɛe naxa lan a ma e xa Yudaya ngaxakerenyie mali harige ra, kankan nɔma naxan na.

¹⁷ عَلَ تٌ بَرَ عٍ كِ عَلْ عَ وٌن كِشِ كِ نَشّ، وٌن تَن نَشٍيٍ دَنشَنِيَشِ عِسَ عَلَ شَ مِشِ سُفَندِشِ مَ، عَ نُ لَن ﭑ شَ عَلَ مَتَندِ؟»

¹⁸ عٍ تٌ نَ مّ، عٍ نَشَ دُندُ، عٍ نَشَ عَلَ مَتْشْ، «عَلَ بَرَ تُوبِ رَفِرِ سِ فبّتّيٍ قَن بّ، عَلَكٌ عٍ قَن شَ كِسِ.»

¹⁹ عِسَ قْشِرَبِرّ نَشٍيٍ يٍنسٍن عٍتِيّن قَشَ شَنبِ حَشَنكَتّ سَابُي رَ، عٍ نَشَ سِفَ هَن قٍنِسِيَ، سِثِرِ، نُن عَنتِيْكِ. عٍ نُ عَلَ شَ مَسٍنيِ كَوَندِ مَ يُوِقِيٍ نَن بّ.

²⁰ كْنْ سِثِرِكَيٍ نُن سِرٍنِكَيٍ نَشٍيٍ نُ نَ عٍ يَ مَ، عٍ تٌ سِفَ عَنتِيْكِ، عٍ نَشَ مَرِفِ عِسَ شَ شِبَارُ قَنيِ مَسٍن فِرّكِكَيٍ قَن بّ.

²¹ مَرِفِ شْنيّ نُ نَ عٍ مَ. مِشِ فبٍفبٍ نَشَ دَنشَنِيَ، عٍ نَشَ تُوبِ مَرِفِ مَ.

²² دَرِ سَلَمُ دَنشَنِيَتْي حَمَ تٌ نَ قٍ مّ، عٍ نَشَ بَرَنَبَسِ شّي عَنتِيْكِ.

²³ عَ تٌ سٌ نَا، عَ نَشَ حّلّشِن عَلَ شَ هِننّ تٌقٍ رَ. عَ نَشَ عٍ رَلِمَنِيَ، عٍ شَ دَنشَنِيَ مَرِفِ مَ.

²⁴ بَرَنَبَسِ، مِشِ قَنيِ نَن نُ عَ رَ. عَ نُ رَقٍشِ دَنشَنِيَ نُن عَلَ شَشِلِ سّنِيّنشِ رَ. حَمَ فبٍفبٍ نَشَ دَنشَنِيَ مَرِفِ مَ.

²⁵ نَ شَنبِ، بَرَنَبَسِ نَشَ سِفَ تَرِ سٍ سْلُ قٍندٍ.

²⁶ عَ تٌ عَ تٌ، عَ نَشَ قَ عَ رَ عَنتِيْكِ. عٍ نُن دَنشَنِيَتْييٍ نَن نُ عٍ مَلَنمَ نَا حّ كٍرٍن بِرِن بُن مَ. عٍ نَشَ مِشِ فبٍفبٍ شَرَن. عِسَ قْشِرَبِرّ نَشٍيٍ نُ نَ عَنتِيْكِ، نٍيٍ نَن سِنفٍ «عِسَيَنكَ» شِلِ سْتْ.

²⁷ نَ تّمُي، نَمِحْنمّ ندٍيٍ نَشَ فٌرٌ عَنتِيْكِ، كٍلِقٍ دَرِ سَلَمُ.

²⁸ نَشَن نُ شِلِ عَفَبُ، نَ نَشَ تِ، عَ قَ عَ قَلَ عَلَ شَشِلِ سّنِيّنشِ سَابُي رَ، عَ كَامّ شُنفبٍ قَمَ سِندٍ دُنِحَ بِرِن مَ. نَ قٍ رَبَ مَنفّ كِلْدِ شَ وَشَتِ نّ.

²⁹ عِسَ قْشِرَبِرّيٍ نَشَ لَن عَ مَ عٍ شَ يُدَيَ نفَشَكٍرٍنيِيٍ مَلِ هَرِفٍ رَ، كَنكَن نْمَ نَشَن نَ.