Taruxui 10:37-47 in Susu

³⁷ Wo a kolon naxan nabaxi fɔlɔfe Galile bɔxi ma, dɔxɔfe Yudaya birin na. Yaya nu bara kawandi ti mixie xa e xunxa ye xɔɔra.

³⁸ Na tɛmui Ala naxa Isa Nasarɛtika sugandi, Ala Xaxili Sɛniyɛnxi nun sɛnbɛ naxa goro a ma. Isa naxa siga yire birin, a nu fe fanyi raba, a nu mixi birin nayalan naxee nu na Ibulisa xa konyiya bun. Ala nu na a fɔxɔ ra.»

³⁹ «Yi fe birin seede nan muxu ra a naxan naba Yuwifie xa bɔxi ma nun Darisalamu. E naxa a banban wuri ma, a faxa.

⁴⁰ Kɔnɔ Ala naxa a rakeli faxɛ ma xi saxan lɔxɔɛ, duniɲa xa a to.

⁴¹ A mu tin a makɛnɛnde birin bɛ, kɔnɔ a naxa a yɛtɛ masen muxu bɛ, Ala naxee sugandixi e xa findi seedee ra. Muxu nun Isa bara donse don, muxu bara ye min a keli xanbi faxɛ ma.

⁴² Isa naxa muxu yamari, muxu xa kawandi ti mixie bɛ, e xa a kolon Ala nan Isa tixi kiitisa ra mixi baloxie nun mixi faxaxie xun ma.

⁴³ Namiɲɔnmɛ birin nu bara a xa fe fala, naxan na danxaniya a ma na kanyi xa yunubi xafarima nɛ a xili saabui ra.»

⁴⁴ Piyɛri to nu wɔyɛnma, naxee birin nu yi masenyi ramɛfe, Ala Xaxili Sɛniyɛnxi naxa goro e ma.

⁴⁵ Danxaniyatɔɛ sunnaxie naxee Piyɛri mati naa, e naxa kaaba yi fe ma, Ala Xaxili Sɛniyɛnxi gorofe sunnataree fan ma,

⁴⁶ barima e naxa e xui mɛ e na Ala matɔxɔfe xui gbɛtɛe ra.

⁴⁷ Awa, Piyɛri naxa maxɔrinyi ti, «Mixi nde nɔma tondide yi mixie xa xunxa ye xɔɔra? E fan bara Ala Xaxili Sɛniyɛnxi sɔtɔ alɔ won fan a sɔtɔxi ki naxɛ.»

³⁷ وٌ عَ كٌلٌن نَشَن نَبَشِ قْلْقٍ فَلِلٍ بْشِ مَ، دْشْقٍ يُدَيَ بِرِن نَ. يَيَ نُ بَرَ كَوَندِ تِ مِشِيٍ شَ عٍ شُنشَ يٍ شْورَ.

³⁸ نَ تّمُي عَلَ نَشَ عِسَ نَسَرّتِكَ سُفَندِ، عَلَ شَشِلِ سّنِيّنشِ نُن سّنبّ نَشَ فٌرٌ عَ مَ. عِسَ نَشَ سِفَ يِرٍ بِرِن، عَ نُ قٍ قَنيِ رَبَ، عَ نُ مِشِ بِرِن نَيَلَن نَشٍيٍ نُ نَ عِبُلِسَ شَ كٌنيِيَ بُن. عَلَ نُ نَ عَ قْشْ رَ.»

³⁹ «يِ قٍ بِرِن سٍيدٍ نَن مُشُ رَ عَ نَشَن نَبَ يُوِقِيٍ شَ بْشِ مَ نُن دَرِ سَلَمُ. عٍ نَشَ عَ بَنبَن وُرِ مَ، عَ قَشَ.

⁴⁰ كْنْ عَلَ نَشَ عَ رَكٍلِ قَشّ مَ شِ سَشَن لْشْي، دُنِحَ شَ عَ تٌ.

⁴¹ عَ مُ تِن عَ مَكّنّندٍ بِرِن بّ، كْنْ عَ نَشَ عَ يّتّ مَسٍن مُشُ بّ، عَلَ نَشٍيٍ سُفَندِشِ عٍ شَ قِندِ سٍيدٍيٍ رَ. مُشُ نُن عِسَ بَرَ دٌنسٍ دٌن، مُشُ بَرَ يٍ مِن عَ كٍلِ شَنبِ قَشّ مَ.

⁴² عِسَ نَشَ مُشُ يَمَرِ، مُشُ شَ كَوَندِ تِ مِشِيٍ بّ، عٍ شَ عَ كٌلٌن عَلَ نَن عِسَ تِشِ كِيتِسَ رَ مِشِ بَلٌشِيٍ نُن مِشِ قَشَشِيٍ شُن مَ.

⁴³ نَمِحْنمّ بِرِن نُ بَرَ عَ شَ قٍ قَلَ، نَشَن نَ دَنشَنِيَ عَ مَ نَ كَنيِ شَ يُنُبِ شَقَرِ مَ نّ عَ شِلِ سَابُي رَ.»

⁴⁴ ثِيّرِ تٌ نُ وْيّنمَ، نَشٍيٍ بِرِن نُ يِ مَسٍنيِ رَ مّقٍ، عَلَ شَشِلِ سّنِيّنشِ نَشَ فٌرٌ عٍ مَ.

⁴⁵ دَنشَنِيَتْي سُننَشِيٍ نَشٍيٍ ثِيّرِ مَتِ نَا، عٍ نَشَ كَابَ يِ قٍ مَ، عَلَ شَشِلِ سّنِيّنشِ فٌرٌقٍ سُننَتَرٍيٍ قَن مَ،

⁴⁶ بَرِ مَ عٍ نَشَ عٍ شُي مّ عٍ نَ عَلَ مَتْشْقٍ شُي فبّتّيٍ رَ.

⁴⁷ عَوَ، ثِيّرِ نَشَ مَشْرِنيِ تِ، «مِشِ ندٍ نْمَ تٌندِدٍ يِ مِشِيٍ شَ شُنشَ يٍ شْورَ؟ عٍ قَن بَرَ عَلَ شَشِلِ سّنِيّنشِ سْتْ عَلْ وٌن قَن عَ سْتْشِ كِ نَشّ.»