Taalie 19:3-26 in Susu

³ Adamadi a yɛtɛ xun nakanama nɛ a xa daxuɲa ra, kɔnɔ a fa a bɔɲɛ rate Alatala tan ma na xunnakanɛ xa fe ra.

⁴ Bannaya a niyama nɛ mixi xa boore gbegbe sɔtɔ, kɔnɔ setareɲa dɛfanbooreɲa kanama nɛ.

⁵ Tɔɔɲɛgɛti fama nɛ ɲaxankatɛ sɔtɔde, wule falɛ mu kisima.

⁶ Mixi gbegbe katama e yɛtɛ rafande kinikinintee ma, birin birama nɛ mixi fɔxɔ ra naxan ki tima.

⁷ Setare mu rafan a ngaxakerenyie yati ma, a mu rafan a booree fan ma. A na e maxandi, e mu e tuli matima a ra.

⁸ Mixi naxan xaxili fenma, a fe fanyi rabama nɛ a yɛtɛ bɛ. Mixi naxan fahaamui fenma, a xa fe sɔɔnɛyama nɛ.

⁹ Tɔɔɲɛgɛti fama nɛ ɲaxankatɛ sɔtɔde, halaki birama nɛ wule falɛ fɔxɔ ra.

¹⁰ Naafuli mu lan xaxilitare yi ra, alɔ a to mu lan konyi fan xa kuntigie yaamari.

¹¹ Lɔnnila bɔɲɛ te xɔnɔ, a mu konbi ragbilenma. Na kui a binyɛ sɔtɔma nɛ.

¹² Mangɛ xa xɔnɛ maniya yɛtɛ xaaɲɛ ra, a xa hinnɛ fan maniya xini ra burɛxɛ xinde ma.

¹³ Di xaxilitare kɔntɔfili nan bɛndunma a baba ma, ginɛ xa sɔnxɔɛ xunxuri luxi nɛ alɔ ye naxan luma mini ra fɛɲɛ yale di kui, a mu a itima.

¹⁴ Mixi banxi nun harige sɔtɔma e baba kɛ ra, kɔnɔ Ala nan ginɛ xaxilima fima xɛmɛ ma.

¹⁵ Tunnaxɔnɛ mixi luma nɛ xixɔli kui, a kaamɛ nan tun sɔtɔma.

¹⁶ Mixi naxan Ala xa sɛriyɛ rabatuma, a a yɛtɛ ratangama nɛ faxɛ ma, kɔnɔ naxan mu a ɲɛngi sama a ɲɛrɛ ki xɔn ma, a faxama nɛ.

¹⁷ Setare kife na maniyaxi Alatala donife nan na. Ala fama nɛ na doni ragbilende a ma.

¹⁸ I xa fe birin naba i xa di xurufe ra alako a xa kisi, xa na mu a ra, a faxama nɛ.

¹⁹ Mixi naxan luma xɔnɔ ra, a na sare fima nɛ. Xa i a mali keren, a man gbilenma nɛ na ma.

²⁰ I xa i tuli mati marasi ra, i xa tin e xa i xaran, alako i xa findi xaxilima ra.

²¹ Maɲɔxun gbegbe na mixi bɔɲɛ kui, kɔnɔ Alatala waxɔnfe nan kamalima.

²² Adamadi wama a boore xa dugutɛgɛɲa a ma. Setare fisa wule falɛ bɛ.

²³ Alatala xa yaragaaxui mixi rakisima nɛ. Na mixi na a sa kɔɛ ra, a mu hanmɛma tɔɔrɛ yo ra.

²⁴ Tunnaxɔnɛ a donse tongoma nɛ a bɛlɛxɛ, kɔnɔ a mu wakilima a rasofe ra a dɛ i.

²⁵ Mixi mayele bɔnbɔ, alako xaxilitare xa xaxili sɔtɔ. Xaxilima na rasi, alako a xaxili xun xa masa.

²⁶ Di naxan a baba kasarama, a a nga keri, mixi rayaagixi na a ra.

³ عَدَ مَدِ عَ يّتّ شُن نَكَنَمَ نّ عَ شَ دَشُحَ رَ، كْنْ عَ قَ عَ بْحّ رَتٍ عَلَتَلَ تَن مَ نَ شُننَكَنّ شَ قٍ رَ.

⁴ بَننَيَ عَ نِيَمَ نّ مِشِ شَ بٌورٍ فبٍفبٍ سْتْ، كْنْ سٍتَرٍحَ دّقَنبٌورٍحَ كَنَمَ نّ.

⁵ تْوحّفّتِ قَمَ نّ حَشَنكَتّ سْتْدٍ، وُلٍ قَلّ مُ كِسِمَ.

⁶ مِشِ فبٍفبٍ كَتَمَ عٍ يّتّ رَقَندٍ كِنِكِنِنتٍيٍ مَ، بِرِن بِرَ مَ نّ مِشِ قْشْ رَ نَشَن كِ تِمَ.

⁷ سٍتَرٍ مُ رَقَن عَ نفَشَكٍرٍنيِيٍ يَتِ مَ، عَ مُ رَقَن عَ بٌورٍيٍ قَن مَ. عَ نَ عٍ مَشَندِ، عٍ مُ عٍ تُلِ مَتِمَ عَ رَ.

⁸ مِشِ نَشَن شَشِلِ قٍنمَ، عَ قٍ قَنيِ رَبَمَ نّ عَ يّتّ بّ. مِشِ نَشَن قَهَامُي قٍنمَ، عَ شَ قٍ سْونّيَمَ نّ.

⁹ تْوحّفّتِ قَمَ نّ حَشَنكَتّ سْتْدٍ، هَلَكِ بِرَ مَ نّ وُلٍ قَلّ قْشْ رَ.

¹⁰ نَاقُلِ مُ لَن شَشِلِتَرٍ يِ رَ، عَلْ عَ تٌ مُ لَن كٌنيِ قَن شَ كُنتِفِيٍ يَامَرِ.

¹¹ لْننِلَ بْحّ تٍ شْنْ، عَ مُ كٌنبِ رَفبِلٍنمَ. نَ كُي عَ بِنيّ سْتْمَ نّ.

¹² مَنفّ شَ شْنّ مَنِيَ يّتّ شَاحّ رَ، عَ شَ هِننّ قَن مَنِيَ شِنِ رَ بُرّشّ شِندٍ مَ.

¹³ دِ شَشِلِتَرٍ كْنتْقِلِ نَن بّندُنمَ عَ بَبَ مَ، فِنّ شَ سْنشْي شُنشُرِ لُشِ نّ عَلْ يٍ نَشَن لُمَ مِنِ رَ قّحّ يَلٍ دِ كُي، عَ مُ عَ عِتِمَ.

¹⁴ مِشِ بَنشِ نُن هَرِفٍ سْتْمَ عٍ بَبَ كّ رَ، كْنْ عَلَ نَن فِنّ شَشِلِمَ قِمَ شّمّ مَ.

¹⁵ تُننَشْنّ مِشِ لُمَ نّ شِشْلِ كُي، عَ كَامّ نَن تُن سْتْمَ.

¹⁶ مِشِ نَشَن عَلَ شَ سّرِيّ رَبَتُمَ، عَ عَ يّتّ رَتَنفَمَ نّ قَشّ مَ، كْنْ نَشَن مُ عَ حّنفِ سَمَ عَ حّرّ كِ شْن مَ، عَ قَشَمَ نّ.

¹⁷ سٍتَرٍ كِقٍ نَ مَنِيَشِ عَلَتَلَ دٌنِقٍ نَن نَ. عَلَ قَمَ نّ نَ دٌنِ رَفبِلٍندٍ عَ مَ.

¹⁸ عِ شَ قٍ بِرِن نَبَ عِ شَ دِ شُرُقٍ رَ عَلَكٌ عَ شَ كِسِ، شَ نَ مُ عَ رَ، عَ قَشَمَ نّ.

¹⁹ مِشِ نَشَن لُمَ شْنْ رَ، عَ نَ سَرٍ قِمَ نّ. شَ عِ عَ مَلِ كٍرٍن، عَ مَن فبِلٍنمَ نّ نَ مَ.

²⁰ عِ شَ عِ تُلِ مَتِ مَرَ سِ رَ، عِ شَ تِن عٍ شَ عِ شَرَن، عَلَكٌ عِ شَ قِندِ شَشِلِمَ رَ.

²¹ مَحْشُن فبٍفبٍ نَ مِشِ بْحّ كُي، كْنْ عَلَتَلَ وَشْنقٍ نَن كَمَلِمَ.

²² عَدَ مَدِ وَ مَ عَ بٌورٍ شَ دُفُتّفّحَ عَ مَ. سٍتَرٍ قِسَ وُلٍ قَلّ بّ.

²³ عَلَتَلَ شَ يَرَفَاشُي مِشِ رَكِسِمَ نّ. نَ مِشِ نَ عَ سَ كْي رَ، عَ مُ هَنمّمَ تْورّ يٌ رَ.

²⁴ تُننَشْنّ عَ دٌنسٍ تٌنفٌمَ نّ عَ بّلّشّ، كْنْ عَ مُ وَكِلِمَ عَ رَ سٌقٍ رَ عَ دّ عِ.

²⁵ مِشِ مَيٍلٍ بْنبْ، عَلَكٌ شَشِلِتَرٍ شَ شَشِلِ سْتْ. شَشِلِمَ نَ رَ سِ، عَلَكٌ عَ شَشِلِ شُن شَ مَسَ.

²⁶ دِ نَشَن عَ بَبَ كَسَرَ مَ، عَ عَ نفَ كٍرِ، مِشِ رَيَافِشِ نَ عَ رَ.