15כל ימי עני רעים וטוב לב משתה תמיד׃
16טוב מעט ביראת יהוה מאוצר רב ומהומה בו׃
17טוב ארחת ירק ואהבה שם משור אבוס ושנאה בו׃
18איש חמה יגרה מדון וארך אפים ישקיט ריב׃
19דרך עצל כמשכת חדק וארח ישרים סללה׃
20בן חכם ישמח אב וכסיל אדם בוזה אמו׃
21אולת שמחה לחסר לב ואיש תבונה יישר לכת׃
22הפר מחשבות באין סוד וברב יועצים תקום׃
23שמחה לאיש במענה פיו ודבר בעתו מה טוב׃
24ארח חיים למעלה למשכיל למען סור משאול מטה׃
25בית גאים יסח יהוה ויצב גבול אלמנה׃
מִשְׁלֵי 15
מִשְׁלֵי 15:15-25