31 והקטיר הכהן את החלב המזבחה והיה החזה לאהרן ולבניו׃
32 ואת שוק הימין תתנו תרומה לכהן מזבחי שלמיכם׃
33 המקריב את דם השלמים ואת החלב מבני אהרן לו תהיה שוק הימין למנה׃
34 כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל׃
35 זאת משחת אהרן ומשחת בניו מאשי יהוה ביום הקריב אתם לכהן ליהוה׃
36 אשר צוה יהוה לתת להם ביום משחו אתם מאת בני ישראל חקת עולם לדרתם׃
37 זאת התורה לעלה למנחה ולחטאת ולאשם ולמלואים ולזבח השלמים׃
