6 nuiti kpein ti zeini gize yooi zu, é zo Liɓan, é zeeli Miselefɔte-Mayime, Sidɔn nuiti kpein. Nà ti ɓɛɛzu Izelayɛle nuiti tuɠɔ. Naa ɠa é ba, naati kpein fe Izelayɛle ya ga kpakutoomai, eɠɛʋelei gè ma levei veeni la,
7 zooi tɛi gaaɠwɛɛna, è fe boloda taaʋuugɔiti zea, ta Manasee ná-bolodai ɠilazuʋɛ.»
8 Manasee ná-bolodai ɠilazuʋɛ zɔi ta Luɓɛn ná-bolodai, ta Gade nɔnɔi, naati ti ta-yooi zɔlɔɔni. Ɠɔoɠɔ GALA ná-botiɠɛ nui Moize feeni ti ya Zuludɛn folo ɠulazu ʋelei,
9 é zo Alɔwɛɛl, ziɛ wolai Aalenɔn laaʋɛ, eyɛsu é zeeli taa wolai ma, é pɛtugi zaamaʋɛ, é ɓɔ gize nɛmɛi kpein ba, é zo Meedeɓa, eyɛsu é zeeli Diɓon,
10 ta Amɔɔl nuiti ta-masagi Siɠon, nii é ɠɛni masadai ɠɛɛzu Ɠɛseɓon, naa ná-taa wolaiti kpein, é zeeli Amɔn nuiti ta-ɠwɛpelemaʋɛ.
11 É ɓɔ Galaade yooi ɓalaagi ʋa, ta Gesuul nuiti ta-yooi, ta Maakate nuiti, ta Ɠɛɛlemɔn gizei, ta Ɓasan kpein é zeeli Saleka,
12 ta Wɔge ná-masadai kpein Ɓasan yooi zu, nii é ɠɛni ga Leefa mavofodai ma ɠaaɓelagi, é masadai ɠɛɛni Asetalɔte ta Edeleyi. Moize zobogi zɔlɔɔni niima masagiti ma, é ti ɓɛ ta-yooi ɠa.
13 Kɛlɛ Izelayɛle nuiti ti la ɠɛni Gesuul nuiti ta Maakate nuiti kpɛɛni, naa ɠa é kɛa ti zeini Izelayɛle nuiti saama, zaaɠaza.
14 Leevi ná-bolodai ɠila kpe ka é la ɠɛni zou zɔlɔɔni ga nɔnɔ. Kɛlɛ gala zalaɠaiti, ti ga Ɠɔoɠɔ GALAGI Izelayɛle ná-GALAGI nɔnɔi, naa ɠa é ga tɔnɔi, eɠɛʋelei é woni la tɔun ma.
15 Moize Luɓɛn ná-bolodai nɔnɔi veeni zea, eɠɛʋelei ta-ʋɛlɛyeɠeiti ti la.
16 Zooi ti sɔlɔɔni, é zoni Alɔwɛɛl, ziɛ wolai Aalenɔn laaʋɛ, ta taa wolai é pɛtugi zaamaʋɛ, gize nɛmɛi kpein ma Meedeɓa ɠobaʋɛ,
17 é li Ɠɛseɓon, ta ma laa wolai kpein ti gize nɛmɛi ma: Diɓon, Ɓamɔte-Ɓaale, Ɓɛte-Ɓaale-Meyon,
18 Yaasa, Kedeemɔte, Meefaate,
19 Kiliyatayime, Siɓema, Seelɛte-Ɠasaɠaal pɛtugi ma ɠizei ma,
20 Ɓɛte-Peyɔɔl, Pizega ɠizei ɠɔɠɔaʋɛ, ta Ɓɛte-Ɠayesimɔte.
21 Gize nɛmɛi maaʋɛ laa wolai naati kpein poluma, ti Amɔɔl nuiti ta masagi Siɠon ná-masadai ma yooi kpein sɔlɔɔni, nii é ɠɛni masadai ɠɛɛzu Ɠɛseɓon. Moize zobogi zɔlɔɔni Siɠon ma, ta Madiyan ɠundiɠiiti, ti ɠoloni Siɠon ʋɛ, ti zeini zooi zu: Evi, Leekɛme, Suul, Ɠuul, ta Leeɓa.
