Zone 4:21-54 in Roviana

²¹ Meke zama la koasa se Zisu, “Va avoso mae. Korapa mae sa totoso sapu lopu kaqu vahesia rina tie sa Tamasa pa toqere hoi babe pa Zerusalema.

²² Gamu na tie Sameria si vahesia si Asa sapu lopu gilania gamu; ba gami na tie Ziu si gilana valeania mami si Asa sapu vahesia gami, sina sa tinaharupu si vura mae gua koa gami na tie Ziu.

²³ Ba korapa mae sa rane, meke ele kamo mo hie sapu kaqu vahesi va hinokaria rina tie sa Tamasa pa maqomaqo dia meke pa hinokara. Ura asa sa vinahesi sapu hiva hola nia sa Tamasa.

²⁴ Sina na maqomaqo sa Tamasa, ke arini pu vahesia si kaqu vahesia pa Maqomaqo meke pa hinokara si Asa.”

²⁵ Meke zama sa barikaleqe, “Gilania rau sapu kaqu mae sa Mesaea” (sapu sa Karisito), “meke pana mae tu Sa, si kaqu tozi va hinokarani gita Sa sari doduru tiṉitoṉa,” gua si asa.

²⁶ Meke olaṉa la ia Zisu si asa, “Arau mo si Asa sapu korapa zama atu koa goi kamahire,” gua si Asa.

²⁷ Meke pa totoso tugo asa si pule mae mo sari Nana disaepeli meke magasa hola nia ri kasa si Asa, sipu dogoria rini, sapu korapa vivinei turaṉia Sa si keke barikaleqe. Ba loke tie ari kasa si odi hiva nanasa, “Nasa si hiva nia goi,” gua, babe nanasa la ia se Zisu, “Na vegua ke vivinei turaṉia tu Goi sa barikaleqe sana?” gua.

²⁸ Meke veko pania sa barikaleqe sa nana vovoina kolo, meke pule la pa vasileana, meke tozi ni sa sari na tie vasina,

²⁹ “Mae gamu, mamu dogoria si keke tie sapu tozi nau sari doduru ginugua saripu ele hoke evevaṉi rau. Hokara Asa beka sa Karisito?”

³⁰ Ke taluarae koasa dia vasileana nomana sari na tie meke la koe Zisu.

³¹ Ba sipu korapa mae gua sari na tie si tepa ososo nia rina disaepeli se Zisu, “Titisa, henahena paki,” gua si arini.

³² Ba olaṉa se Zisu, “Sa gequ ginani si koa nana sapu lopu hite gilania gamu,” gua si Asa.

³³ Ke podalae vari nanasi teledia sari na disaepeli, “Hokara kaiqa tie paleke ponia ginani sia?”

³⁴ Meke zama se Zisu, “Sa gequ ginani si pude va tabea mo sa hiniva tanisa pu garunuqu, meke pude va gorevura i sari Nana tinavete saripu poni Nau Sa.

³⁵ Hoke zama guahe si gamu, ‘Ka made sidara koa meke kamo sa totoso pakepakete,’ gua. Ba maqu tozini gamu, doṉo viliti valeani sari na linetelete pa inuma. Ele komiha sari meke garo pude ta pakete.

³⁶ Sa tie sapu pakepakete si vagia sa sa nana tinabara kamahire, meke varigara ni sa, sari na vuadi pa tinoa hola, gua asa ke sa tie sapu lelete, meke sa tie sapu pakepakete si kaqu qetuqetu varigara.

³⁷ Hinokara tugo sapu ta zamae, ‘Keke tie si lelete meke keke pule si pakepakete,’ gua.

³⁸ Garunu gamu Rau pude la paketi sari na vuvua pa inuma saripu lopu mabo ni gamu, ba kaiqa tie tu mabo letei, ba gamu si paketi sari vuadi koa sa laena sa dia minabo.”

³⁹ Meke sokudi rina tie Sameria pa vasileana asa si va hinokaria se Zisu, sina koa gua koasa zinama tanisa barikaleqe sapu guahe: “Ele tozi nau Sa sari doduru ginugua saripu hoke evevaṉi rau,” gua.

⁴⁰ Ke totoso mae koa Sa sari na tie Sameria si tepa ososo nia rini si Asa pude koa paki koa rini, ke koa karua ranena tu vasina se Zisu.

⁴¹ Meke soku pule tie Sameria si va hinokara koa gua koasa tinarae te Zisu.

⁴² Meke zama la koasa barikaleqe si arini, “Va hinokara kamahire si gami, lopu sapu gua mo pu tozini gami goi, ba sina avoso sotia telemami si Asa, meke gilana valeania gami sapu Asa hinokara tugo sa hinarupu tanisa kasia popoa.”

⁴³ Meke sipu hola karua rane vasina, si taluarae la pa Qaleli se Zisu.

⁴⁴ (Ele zama nia tu Zisu telena koari Nana disaepeli sapu guahe: “Sa poropita si lopu hoke ta pamaṉae pa nana popoa soti,” gua.)

⁴⁵ Totoso kamo Sa pa Qaleli, si va kamoa rina tie vasina si Asa, sina somanadi tugo koasa Inevaṉa Pasova pa Zerusalema si arini, meke dogori rini sari doduru tiṉitoṉa saripu taveti Sa vasina.

⁴⁶ Meke topue pule la pa vasileana Kena pa popoa Qaleli se Zisu, vasina iliri nia vaeni Sa sa kolo. Meke koa nana vasina si keke palabatu qavuna sapu moho sa tuna koreo pa Kepaniami.

⁴⁷ Meke sipu avoso nia sa sapu ele taluarae pa Ziudia meke koa Nana pa Qaleli se Zisu gua, si la tutuvia sa si Asa, meke tepa ia sa pude luli la salaṉia sa tuna koreo sapu tata mate, gua.

⁴⁸ Meke zama la koasa se Zisu, “Be lopu dogori gamu sari na vina gilagila na tinavete variva magasadi si kaqu va hinokara si gamu,” gua si Asa.

⁴⁹ “Baṉara, tuturei mae sipu lopu ele mate sa tuqu,” gua sa palabatu.

⁵⁰ Meke zama se Zisu, “Mu pule la, sa tumu koreo si kote magogoso nana mo!” Ke va hinokaria sa palabatu sa zinama te Zisu meke topue pule la si asa.

⁵¹ Meke sipu korapa ene pule la sa si tutuvia ri nana nabulu meke tozi nia ri sapu, “Ele magogoso tu sa tumu koreo,” gunia rini.

⁵² Ke nanasa la i sa, “Pa totoso sa si podalae magogoso si asa?” Meke olaṉa si arini, “Pa keke koloko veluvelu norae tu si beto maṉini si asa,” gua si arini.

⁵³ Meke gilania sa sapu asa tugo sa totoso sapu tozi nia Zisu si asa, “Sa tumu koreo si kote magogoso,” gua. Ke va hinokaria ri doduru tie pa nana vetu se Zisu.

⁵⁴ Hie tugo sa vina rua tinavete variva magasa sapu evaṉia Zisu sipu taluarae mae gua pa Ziudia meke la pa Qaleli si Asa.