9 Tarae nia sa tie gilaena, mani gilae nono latu si asa; va tumatumae ia sa tie toṉoto meke kote tumae lala nana si asa.
10 Sa pinamaṉana e Zihova si na pinodalaena sa ginilagilana lohina, meke pude tumae nia sa Tamasa Hopena si na ginilae.
11 Ura mi ene gua koa rau, pude soku sari mia rane, meke soku vuaheni si kaqu ta tomo atu pa mia tinoa.
12 Be gilae si goi, sa mua ginilagilana lohina kote pia igo; ba pana kilu au goi, si telemu mo kote ṉovala pule nigo.”
13 Sa barikaleqe, sapu e Duvili pozana si vevehe hola; na lopu tumae balabala si asa meke loketoṉa gilania.
14 Habotu si asa pa sasada koasa nana vetu, babe pa keke vasina ululuna koasa vasileana,
15 meke kukili vura la koa rini pu ene hola; pu korapa ene pa dia siraṉa.
