3 Lopu ele va nonoga ia rau sa ginilagilana lohina, babe tumae nia sa Tamasa Hopena.
4 Esei si ele sage la pa maṉauru meke gore pule mae? Esei ele boka varigara ni pa ola limana sa givusu? Esei ele hadeni pa keke kukuru poko sari na kolo? Esei ele taveti sari doduru hukihukirina sa kasia popoa? Esei sa pozana, meke sa pozana sa tuna koreo? Tozi nau be gilania goi!
5 Doduru zinama te Tamasa si tava sosodedi sapu hinokara; na lave si Asa koari pu la koa aqorae koa Sa.
6 Mu lopu hodai sari Nana zinama, na kote gegese igo Sa meke va sosodea sapu koha si goi.
7 Kei Zihova, karua ginugua mo si tepai rau koa Goi: lopu heki ni koa rau sipu lopu ele mate si rau:
8 Va seu i koa rau sari zinama lopu hinokara meke kokohadi; lopu va malaṉa au ba lopu va tagotago au tugo, ba poni au sa gequ ginani doduru rane.
9 Na be soku gequ si kote lopu raṉe Igo rau, meke kote zama, “Esei se Zihova?” Ba be pana malaṉa si rau meke hikohiko, si kote ṉoṉovala ia rau sa pozana e Zihova sa qua Tamasa.
10 Mu lopu nanae na zutu ṉoṉovalia sa nabulu koasa nana palabatu; na kote leve nigo sa meke kote tinasuna si goi.
11 Koadia sarini pu leve ni sari tamadia meke lopu mana ni sari tinadia;
12 sarini pu via, gua pa dia binalabala ba sari na kinaleadi si lopu ele tava via;
13 sari matadia si doṉo va gore tie, meke liṉaliṉana va titie;
14 sari livodia si guana vedara meke sari asedi si guana sotoi kobi magu pude ṉovali saripu malaṉa pa popoa pepeso, meke saripu loke gedi pa vari korapadi rina tinoni.
15 Sa tie puhi si karua tuna vineki, “Poni au! Poni au!” gua sari karua. Koadia sari ka ṉeta tiṉitoṉa sapu lopu boka deṉa, ka made sapu lopu hoke zama, “Pada mo!”
16 Sa lovu, sa barikaleqe sapu tige, sa pepeso qega, sapu lopu boka beto napo kolo, meke sa nika, sapu lopu hoke zama, “Pada mo!”
17 Sa tie sapu va sisire nia sa tamana, sapu kilua sa vina tabe la koasa tinana, si kote gani i rina kurukuru pu hoke gani tie matedi, meke sari matadi si kote ta lobiti vagi koarini.
18 Koadia sari ka ṉeta tiṉitoṉa sapu lopu boka beto magasa ni rau, ka made sapu lopu boka va bakali arau:
19 sapu vea tedoro gua sa atata pa galegalearane, sapu vea gotolo gua sa noki koari na patu nomadi, sapu vea kalaha gua sa vaka koari na ololobagea, meke vea tataru gunia sa koreo sa vineki.
20 Gua hie sa hahanana tanisa barikaleqe barabaratana: Ganigani si asa meke ṉuzapia sa ṉuzuna meke zama, “Arau si loketoṉa sinea tavetia.”
21 Ka ṉeta tiṉitoṉa hire si hoke niu nia sa popoa pepeso, ka made sapu lopu boka va tana i sa:
22 sa nabulu sapu evaṉae na baṉara, sa tie pekipeki sapu soku nia ginani,
23 sa barikaleqe variva hakohakona sapu varihaba, meke sa nabulu vineki sapu hobea sa barikaleqe ṉati hiniva.
24 Ka made tiṉitoṉa pa popoa pepeso sapu hiteke, ba tumatumaedi hola:
25 Sari menemene sapu hiteke hola dia ṉiniraṉira, ba hata vekoi rini sari gedi ginani pa totoso maṉini;
26 Sa horakisi sapu guana kurezu si lopu ṉiṉirana, ba tavete nana qoqoro koari na patupatu
27 na kupokupo sapu loke dia baṉara ba ene pa hopeke dia tokele;
28 na varilazu sapu boka saputu vagia mo pa lima, ba koa nana pa vetu tadi na baṉara.
29 Koadia si ka ṉeta tiṉitoṉa sapu ene va baṉabaṉarae, ka made sapu rizu guana tie arilaedi:
30 na laione, sapu ṉiṉirana koari doduru kurukuru ṉame, sapu lopu keke si togolo nia sa;
31 sa enena sa kokorako kokoreo, sa qoti kokoreo, meke sa baṉara pa kenuna sa nana qeto minate.
