3 Pa ginilagilana lohina si ta kuri sa vetu, meke pa ginilae si tava nabu si asa;
4 pa tinumatumae si tava siṉi sari losena, koari na tinago leleadi meke arilaedi.
5 Na tie gilae si nomana nana ṉiniraṉira, meke sa tie tumatumae si ṉiṉira hola la tu;
6 pude la pa vinaripera si kaqu ta totolie si agoi, ba pana soku tie si vari tokae pa binalabala si koa sa minataqara.
7 Sa ginilagilana lohina si ululu hola koasa tie pekipeki; ke pa vinarigara palabatu si loke nana zinama si asa.
8 Asa pu balabala hata kinaleana si kote ta pozae na tie sekesekei.
9 Sari hiniva tomedi pude tavete va kaleana si na sinea, meke na tie va gugue si ta hakohakoedi pa tie.
10 Pana malohoro si goi pa totoso tasuna, si hitekena mo sa mua ṉiniraṉira.
11 Harupi si arini pu korapa ta turaṉa la pa minate; tuqe pule vagi sarini pu korapa tedeve la pude ta seke va mate.
12 Pana zama si goi, “Ba lopu na qua ginugua si hie,” gua. Ba Tamasa tumae ni sari bulo tie meke dogorigo Nana. Asa pu kopu nia sa mua tinoa si gilanigo tugo Nana. Kote pia igo Sa luli gua koari na mua tinavete.
