2 mamu vekoa sa magu pa leomu pana keke tie ṉaṉaluta si agoi.
3 Lopu okoro ni sari gana ginani leleadi, ura na sinekesekei koai sari ginani arini.
4 Lopu va sigiti pule nigo koasa hinatana sa tinagotago; gilae mamu noso.
5 Mata puri mo goi si taloa dia mo sari tinagotago, na kote ari tatapurudi meke tapuru la dia pa galegalearane guana atata.
6 Mu lopu hena sa ginani tanisa tie puhi, mu lopu okoro ni sari gana ginani leleadi;
7 Ura arini sari tie sapu balabala sisigiti pa poata. “Hena mamu napo,” kote guni nigo sa, ba sa bulona si lopu gua tu asa.
8 Kote lua vura ni goi sari vasina hite pu ele henai goi, meke loke laedi mo sari mua zinama leadi.
9 Lopu norea sa tie pekipeki, na kote va sisire ni sa sari zinama ginilagilana tamugoi.
10 Mu lopu va rizua sa patu voloso pukeranena babe vagi pania sa pepeso tanisa pu loke tamana.
11 Ura Asa pu lavelave ni si ṉiṉirana; meke Asa kote turaṉa la nigo pa vinari pitui.
12 Va naqiti pa bulomu sari na tinarae mamu va taliṉa la koari na zinama tumatumae.
13 Mu lopu tuqe pule nia sa ginegese koasa koburu; pana seke nia kolu goi, si lopu kaqu mate nia sa.
14 Mu seke nia kolu, mamu harupia sa nana tinoa pa minate.
15 Tuqu, be gilae sa bulomu, si kote qetu hola sa buloqu;
16 sa maqomaqoqu si kote qetu pana zama va gotogoto sari na berumu.
17 Lopu va malumia sa bulomu pude va gulea i sari tie tavete va sea, ba mu pamaṉa nia doduru totoso se Zihova.
18 Hinokara, koa nana sa lineana tamugoi vugo repere, meke sa mua lineana asa si lopu kaqu ta kumata palae.
19 Tuqu, va avoso mae, mamu koa gilae, mamu kopu nia sa bulomu koasa siraṉa toṉotona.
20 Mu lopu somana ni si arini pu napo sisigiti vaeni, babe inevaṉa turaṉi sari na tie mari henahenadi,
21 ura sari tie naponapo meke saripu mari henahenadi si kote kamo malaṉa, meke sa puta si kote sage ni poko rikarikatadi rini.
22 Mu avosia sa tamamu pu ponigo sa tinoa, meke lopu hakohako nia sa tinamu pana kaleqe si asa.
23 Mu holu vagia sa hinokara meke lopu holuholu pania; vagia sa ginilagilana lohina, vina tumatumae, meke ginilae.
