15 Tuqu, be gilae sa bulomu, si kote qetu hola sa buloqu;
16 sa maqomaqoqu si kote qetu pana zama va gotogoto sari na berumu.
17 Lopu va malumia sa bulomu pude va gulea i sari tie tavete va sea, ba mu pamaṉa nia doduru totoso se Zihova.
18 Hinokara, koa nana sa lineana tamugoi vugo repere, meke sa mua lineana asa si lopu kaqu ta kumata palae.
19 Tuqu, va avoso mae, mamu koa gilae, mamu kopu nia sa bulomu koasa siraṉa toṉotona.
20 Mu lopu somana ni si arini pu napo sisigiti vaeni, babe inevaṉa turaṉi sari na tie mari henahenadi,
21 ura sari tie naponapo meke saripu mari henahenadi si kote kamo malaṉa, meke sa puta si kote sage ni poko rikarikatadi rini.
22 Mu avosia sa tamamu pu ponigo sa tinoa, meke lopu hakohako nia sa tinamu pana kaleqe si asa.
23 Mu holu vagia sa hinokara meke lopu holuholu pania; vagia sa ginilagilana lohina, vina tumatumae, meke ginilae.
24 Sa tamana sa tie toṉoto si kote qetu hola; qetu si asa pu tagoa si keke koburu gilaena.
25 Mani qetu sari tiatamamu; mani qetu sa barikaleqe pu podo igo.
26 Tuqu va mae ia sa bulomu, meke sari matamu si mani doṉo luli sari qua hahanana.
27 Ura na maqota si na pou lohina, meke na barikaleqe barabaratana si na berukehe variva mate.
28 Tome aqa guana tie hikohiko si asa, meke va soku i sa sari na tie pu loke dia rinaṉeraṉe.
29 Esei si ta sigiti? Esei si talotaṉa? Esei si tasuna? Esei si nominomi? Esei si bakora hoboro? Esei si ziṉara matana?
30 Arini pu qetuqetu nia sa napo vaeni, pu la podeki sari soku votivotiki vaeni.
31 Mu lopu doṉo totoa sa vaeni pana ziṉara si asa, totoso pinoro sa pa korapa kapa, meke totoso onolo gore sa.
32 Pa vina betona si kote garata guana noki meke hilili guana kukuasa si asa.
33 Sari matamu si kote dogoro hoboro tiṉitoṉa variva pupuhudi, meke kote zama ni ginugua bonidi pa bulomu.
34 Kote guana keke tie putamu pa lamana si goi, puta panaulu koari na iku pa dedegere vaka tepetepe.
35 “Tupa au rini,” kote gua si goi; “ba lopu sigitau! Komitau rini, ba lopu va nonoga ia rau! Totoso sa si kote vaṉunu rau pude qu hata pule napo?” kote gua.
