21 pude va tumatumae nigo sa hinokara meke sa rinaṉeraṉe, pude boka olaṉa pa hinokara si goi koa rini pu garunigo.
22 Mu lopu hikoi saripu malaṉa sina ṉiṉiramu, sapu gua; babe ṉoṉovali sari tie habahuala pa totoso vari pitui,
23 sina kote turu turaṉi Zihova si arini, meke kote saputu vagi pule ni Sa sari likakalae koarini pu ṉoṉovali saripu habahuala.
24 Mu lopu la baeria sa tie bubugoro haruna, lopu koa turaṉia sa tie sapu lopu sana hoke bugoro,
25 na kote gua meke gugua asa si agoi meke ta hebae nia goi.
26 Mu lopu va egoa pude tabaria sa gale tana votiki tie, babe vekoa si keke mua tinago pude zuka ia sa lipulipu.
27 Sina be lopu boka tabaria goi sa gale, si sa mua teqe si kote atu saputu vagia rini sipu korapa eko ia goi.
