18 Tarae nia na va toṉotia sa tumu koreo, vasina mo koa sa hinarupu, be lopu gua si kote vari tokae si goi koasa nana minate.
19 Sa tie bubugoro haru si kaqu vagia sa laena, pana harupia goi, si kaqu harupu pilipule ia tugo goi.
20 Avosi sari na vina balau mamu va tabei sari na tinarae, meke pa vina betona si kote gilae si goi.
21 Soku sari na hiniva pa bulona sa tie, ba sa hiniva te Zihova si kote gorevura.
22 Sapu okoro nia sa tie si na tataru nabuna, leana si be malaṉa ba lopu na tie kokoha.
