13 Umbe, migkaǥi en maan si Delila te, “Taman en guntaan is kedlimbungi nu wey kedterteru-i nu kedì. Sigi en, keǥiya nu en is paaǥi te kegkevekusa kenikew.” Migkaǥi si Samson te, “Emun idragkes te edhavel is pitu he selapid te vulvul ku ziyà te lilizen te hevelan, ne egkeiring dà is desen ku te zesen te zuma he menge etew.”
14 Umbe, hein nekelipezeng si Samson, inhiket ni Delila is pitu he selapid te vulvul ni Samson diyà te lilizen te hevelan, ne nemensag sikandin te, “Samson, duen nekeuma he menge Filistihanen su edekepen ke zan.” Ne mid-enew si Samson ne nelaglag is hevelan wey hinavel.
15 Umbe, migkeǥiyan sikandin ni Delila te, “Egkeǥiyen nu he mahal a kenikew, piru kenè bes tutuu. Su ketetelu ad kenikew limbungi. Wazè nu keǥiya kedì ke hendei ebpuun is desen nu.”
16 Andew-andew is kebpenginginsà dutun te vahi ki Samson ne hein neuǥet kenè en sikandan ebpekaantus.
17 Umbe, migkaǥi zin en duen te vahi is tutuu. Ke sikandin te, “Wazà meǥuntingi is bulvul ku minsan kesevaha. Minsan hein ikeǥingey e pa, mibpeveyveyaan ad te Megbevayà pinaaǥi te kedhimuwa kedì he Nazareo. Umbe emun egkeǥuntingan is bulvul ku, egkeiring dà is desen ku te zesen te zuma he menge etew.”
18 Neǥezam ni Delila he tutuu is migkaǥi ni Samson. Umbe zuen midsuǥù din he ibpekaǥi ziyà te menge pengulu te menge Filistihanen he medlikù dan su migkaǥi en ni Samson diyà te kandin is tutuu. Umbe midlikù sikan is menge pengulu, ne mid-uwit dan en te selapì he ibayad dan diyà te ki Delila.
19 Impelipezeng ni Delila si Samson he impeulun diyà te vuvun din, ne hein nehurep en, mid-umew sikandin te sevaha he etew he ibpevangul zin ki Samson. Umbe mibmeluya si Samson, ne impezakep sikandin ni Delila.
20 Mibensag si Delila te, “Samson, duen menge Filistihanen he nekeuma su edekepen ke zan.” Ked-enew ni Samson kunaan din ke ebpekaawà sikandin pinaaǥi te kebeeli zin te iring duen te nehuna he mibeelan din. Wazè din metueni he mid-ewaan en sikandin te Nengazen.
21 Midakep sikandin te menge Filistihanen ne midluǥit dan is menge mata zin. Mid-uwit dan sikandin diyà te Gaza ne migkedinahan dan te brunsi. Midhimu zan sikandin he perepenggaling te trigu ziyà te seled te pirisuwan.
22 Piru ednaneynaney en edsuvul is bulvul zin.
23 Duen timpu, he midtiǥum is menge pengulu te menge Filistihanen su edsilibra zan wey ebpemuhat dan te mahabet he menge pemuhat he para te ed-ezapen dan he si Dagon. Dutun te kedsilibra zan migkanta zan is edhenduen te: “Mibpengelinteuwan te ed-ezapen tew he mezaag tew si Samson is kuntada tew.”
24 Ne hein naahà sikandin te menge etew midalig dan is ed-ezapen dan. Ke sikandan te, “Impalad te ed-ezapen tew kayi te kenitew is kuntada tew he mibeǥey te zekelà he kezeetan kayi te tanè tew wey midhimatey te mahabet kenitew.”
25 Tenged te kelipey zan, neisip dan he edhimuwen dan si Samson he velvelayen. Umbe impeǥawas dan si Samson dutun te pirisuwan ne impehitindeg dan diyà te pid-elangan te zezuwa he tukud ne midhimu zan he egkeengitan.
