4 Yãke dì kpáńnɛro, aafia mↄ̀ḿma akũsↄ̃ ò mɛ̀kpana.
5 Òdi wari kɛ lán dakenↄ bàro, òdi gyã kɛ lán dakenↄ bàro.
6 Òdi ĩadãna da ń wakan lán mↄ̀wakarɛ bà, òdi pãsĩkɛ da pↄ́kasa ũ.
7 Ń swɛ̃̀ɛ kɛ̀ gbãna kũ yãvãnikɛnaao, yã bɛ̃̀nɛ ń nɛ̀sɛɛ pà.
8 Òdi gbɛ̃ lalandi kɛ òdi yã vãni liḿma, òdi gbãna mↄńnɛ ń zↄ̃kↄ̃kɛ yãi.
9 Òdi pi: Luda kipa ò ↄsi ká, akũsↄ̃ ń yã mɛ́ àdi ble andunia gũn.
10 Abire yãi òdi ɛra ń kpa, òdi yã kũ ò ò pínki sí yãpura ũ.
11 Òdi pi: Luda dↄ̃ mámɛɛ? Luda Musude dↄ̃na kà lɛ yá?
12 Ǹ yãvãnikɛrinↄ gwa, òdi yãke damu kɛro, ń gwenaa dìgↄ̃ kara gↄrↄ sĩnda pínki.
13 Ase ma nɛ̀sɛ pura pãn yá? Ma a ↄ bↄ̀tɛ taarin swáswa pãmɛ yá?
14 Ndìgↄ̃ ma gbɛ̃ gↄrↄ sĩnda pínki, ndìgↄ̃ ma sã gágamɛnɛ lákũ gu dìgↄ̃ dↄ nà.
15 Tó ma zɛ kũ yã dí taka onaao, abirekũ nigↄ̃ de bona n gbɛ̃nↄ kpɛ yã ũmɛ.
16 Kũ ma laasunn lɛ̀ yã pìia de mà dↄ̃, à kɛ̀mɛnɛ zĩ'ũ.
17 Sé kũ ma gɛ̃ Luda kúkia, gbasa ma wɛ́ kɛ̃̀ lákũ oni láka nà.
18 N ń dá guzãrɛ kpa yãpura, ndì ↄ sↄ̃ńyĩ ò lɛ́tɛ ò kakatɛ.
19 Òdi gↄ̃ kakatɛna pↄ́ ũ kãnto, vĩnapↄnↄ dì ń le ò láka.
20 Lákũ nana dì gɛ̃tɛ kũ ĩao nà tó gbɛ̃ vù, tó n futɛ Dikiri, ǹ tó ò gɛ̃tɛ lɛ.
21 Kũ ma nɛ̀sɛɛ yàka, akũsↄ̃ ma pↄ sira kũ̀,
22 ma kɛ yↄ̃nkↄ, má yãke dↄ̃ro, ma gↄ̃nnɛ lán nↄ̀bↄsɛ̃ntɛ bà.
23 Bee kũ abireo madìgↄ̃ kú kũnwo, ń ma kũna ma ↄplaa.
24 Ndì domɛnɛ arɛ kũ n lɛ́dammao, ĩni láka ǹ ma sí n gakuri gũn.
