1 Dauda lɛ̀ɛ. Luda, ǹ ma sura ba, zaakũ í ma kũ ma wakalɛ.
2 Foko tɛni ma mↄ́ ma ka zã̀, gɛ̀sɛpɛtɛki kunlo, ma kpatɛ í lòkoton, ísↄ̃ tɛn damala.
3 Ma wiki lɛ̀ ma kpasa, ma kòtoo nà, ma wɛ́ dↄ̀ ma Ludai ari ma wɛ́ tɛn sira kũ.
4 Gbɛ̃ kũ ò zã̀magu pãnↄn dasi de ma mìkãla. Ma ibɛrɛnↄn lɛ́ vĩro, ò ye ò ma dɛ pↄ́ke wíńnɛ sari. Pↄ́ kũ mádi a kpãni oron ò pì mà kpáḿma.
5 Luda, ń ma yↄ̃nkↄyãnↄ dↄ̃, ma taarinↄn utɛnannɛro.
6 Dikiri Luda Zĩ̀karide, gbɛ̃ kũ ń wɛ́ dↄnyĩnↄ ǹsun tó wé'i ń kũ ma yãiro. Isarailanↄ Luda, gbɛ̃ kũ òdi n ki wɛtɛnↄ ǹsun tó ń tↄ́ yaka ma yãiro.
7 Zaakũ n yãin matɛn sↄ̃sↄ̃na fↄ̃, akũ ma gasuu gↄ̃̀ kpá ma wɛ́i.
8 Ma gↄ̃ zĩ̀tↄ ũ ma gbɛ̃nↄ tɛ́, ma gↄ̃ boado ũ ma da bedenↄ tɛ́.
9 N ↄn yã ma kũ gbãna manamana, gbɛ̃nↄ dↄkɛna kũnwo gↄ̃̀mɛnɛ.
10 Tó ma lɛ́ yĩ̀ pↄsira gũn, òdigↄ̃ ma sↄ̃sↄ̃.
11 Tó ma uta kasanↄ fĩ̀fĩma, òdigↄ̃ ma lalandi kɛ.
12 Gbɛ̃ kũ ò vutɛna gãnulɛanↄ dì ma pi, ígbãnamirinↄ dì lɛ̀ da ma yãi.
13 Ama tó à gↄ̃̀ ma yãi, Dikiri, mↄkↄ̃n manigↄ̃ wɛ́ kɛmma a gↄrↄa. Ǹ wema Luda n gbɛ̃kɛ zↄ̃kↄ̃ yãi, ǹ ma sura ba yãpura.
14 Ǹ ma bo fokon, ǹsun tó mà vlɛ̃nlo. Ǹ ma bo í lòkoton, ǹ ma sí ma zãngurinↄa.
15 Ǹsun tó ísↄ̃ damalaro, ǹsun tó mà kpátɛ í lòkotonlo, ǹsun tó wɛ̀ɛ tatamalɛro.
16 Ǹ wema Dikiri, zaakũ n gbɛ̃kɛ mana, ǹ arɛ dↄma n sùru zↄ̃kↄ̃ↄ gũn.
17 Ǹsun mìkpɛrɛ zu n zↄ̀bleriinɛro, ǹ wema likalika, zaakũ ma gↄ̃ kagura gũmmɛ.
18 Ǹ namai ǹ ma mì sí, ǹ ma sura ba ma ibɛrɛnↄa.
19 Ń ma sↄ̃sↄ̃na dↄ̃ kũ ma wé'idammanaao kũ ma kpebonaao, ntɛn gbɛ̃ kũ ò ma kũna kũ yãonↄ e.
20 Sↄ̃sↄ̃naa ma swɛ̃̀ɛ zↄ̃̀, ma gↄ̃ gbãna sari, gbɛ̃ kũ ani ma wɛ̃nda gwan ma wɛ̀tɛ, mádi lero, gbɛ̃ kũ ani ma nɛ̀sɛ kpátɛmɛnɛn ma wɛ́ dↄ̀i, à kunlo.
