6 Kũ má kakũnna, ma Dikiri sìsi, ma wiki lɛ̀ ma Ludaa, akũ à ma kòtoo mà zaa a bɛa, ma wiki kà à kĩnaa, à gɛ̃̀ a sãn.
7 Zĩtɛ lùkaluka à yĩ̀gãyĩgã, kpinↄ dègedege ari ń zĩnin. Ò lùkaluka kũ à pↄ fɛ̃̀ yãi.
8 Túsukpɛ bò a yĩn, tɛ́ kũ àdi ń kpata bò a lɛ́n, a yↄ̃̀nↄ tɛn tɛ́ kɛ a arɛ.
9 À musu wɛ̃̀ à kìpa, legũ sìsi a gɛ̀sɛ gbáru.
10 Àtɛn vura dina kɛrubu kpɛ, àtɛn yàa kɛ ĩala.
11 À gusira dà a zĩdala, ludambɛ sira kũ̀ a kúkila.
12 Zaa a gakuri tɛ́kɛnaa gũn legũ tɛn sisi, legũgbɛ tɛn kↄtɛ, legũ tɛn pi pãsĩpãsĩ.
13 Dikiri pàta zaa musu, Luda Musude kòto dↄ legũpũtãna ũ.
14 À kàa fã̀ ma ibɛrɛnↄa à ń fãkↄ̃a, à tò legũ pìḿma à pɛ̀ḿma.
15 Kũ n pataḿma Dikiri, kũ n pↄ́ bò n yĩn, ísira zĩtɛ bò gupuraa, andunia zĩni gↄ̃̀ katɛna punsi.
16 À ↄ bò zaa musu à ma kũ, à ma bo swada gũn.
17 À ma si ma ibɛrɛ gbãna ↄ̃i kũ ma zãnguri kũ ń gbãna demalanↄ.
18 Ò lɛ̀tɛma ma sunyĩkɛgↄrↄa, ama Dikiri zɛ̀ kũmao.
19 À ma bo à ma gba mɛ̀poroki, à ma sura bà kũ à yemai yãi.
