1 Aleluya! Lɛ̀sina ó Ludanɛ mana, à nna akũsↄ̃ à kũ̀ ò a táaki lɛ́.
2 Dikiri tɛn Yurusalɛmu futɛ dↄ, à Isaraila zĩ̀zↄnↄ kàkara àtɛn ɛra à su kũńwo.
3 Àdi gbɛ̃ kũ ń nɛ̀sɛɛ yàkanↄ laakari kpátɛńnɛ, àdi ń bↄ̀ pípińnɛ.
4 À susunɛnↄ lɛ́ dↄ̃, àdi ń baadi sísi a tↄ́a.
5 Ó Dikiri zↄ̃kↄ̃, à iko vĩ manamana, a ↄ̃ndↄ̃ lɛ́ vĩro.
6 Dikiri dì zĩdabusarinↄ gba gbãna, ama àdi ↄ tↄ̃ yãvãnikɛrinↄa ari zĩtɛ.
7 À lɛ̀ sí Dikirinɛ kũ a sáabukɛnaao, à ó Luda táaki lɛ́ kũ mↄrↄↄo.
8 Àdi tó legũ sisi, àdi zĩtɛ gba legũ, àdi tó sɛ̃̀ butɛ sĩ̀sĩnↄa.
9 Àdi pↄ́ble kpá nↄ̀bↄnↄa kũ kãakãanna nɛ́nↄ, tó òtɛn wiki pɛ́.
10 Adi kɛ sↄ̃ gbãnakɛ mɛ́ àdi kánɛro, adi kɛ gↄ̃sagbãnakɛ mɛ́ àdi kɛnɛro.
11 Gbɛ̃ kũ ò a vĩna vĩnↄ mɛ́ àdi kánɛ, gbɛ̃ kũ ń wɛ́ dↄ a gbɛ̃kɛinↄ.
12 Yurusalɛmudenↄ, à Dikiri tↄ́ bo, Zaiↄ̃denↄ, à á Luda táaki lɛ́.
13 Zaakũ àdi arubarika daágu, àdi á wɛ̃tɛ bĩnilɛnↄ gbãna karaárɛ.
14 Àdi á gba aafia ari á bùsulɛ lɛ́n, àdi pↄ́buri mana kpááwa à kã.
15 Àdi yã o à kpãzã zĩtɛnɛ, a yã dì ká gↄ̃̀nↄgↄ̃nↄ.
16 Àdi tó legũgbɛ kↄ́tɛ púu lán buu bà, àdi tó plí kpá lán túbu bà,
17 àdi legũgbɛ fã lán gbɛ̀kↄsↄↄ bà. Dí mɛ́ ani fↄ̃ à zɛ a ĩa yĩdaii?
