9 Patianↄ kũ Midianↄ kũ Elamunↄn ó ũ kũ gbɛ̃ kũ ò kú Mɛsↄpↄtamianↄ kũ Yudeao kũ Kapadosiao kũ Pↄntuo kũ Asiao
10 kũ Firigiao kũ Pamfiliao kũ Misilao kũ Libia bùsu kũ à kú Sirɛni sarɛo kũ gbɛ̃ kũ ò bò Romunↄ.
11 Yudanↄ kũ gbɛ̃ kũ ò ń donyĩ zɛ́ sɛ̀nↄn ó ũ kũ Kɛrɛtinↄ kũ Larubunↄ, akũ ótɛn ma òtɛn Luda yãbonsarɛ kɛnanↄ o kũ ó baadi buriyãnↄ.
12 Yã pì ń kũ gbãna ò bídi kɛ̀, òtɛn kↄ̃ lala òtɛn pi: Yã kpate takan gwee?
13 Gbɛ̃kenↄ sↄ̃ òtɛni ń lalandi kɛ ò pì: Í mɛ́ à ń kũ.
14 Akũ Pita fùtɛ à zɛ̀ kũ a gbɛ̃ kpara gbɛ̃nↄn kuri awɛɛdonↄ à yã ò gbãngbãn à pì: Ákↄ̃nↄ Yudanↄ kũ gbɛ̃ kũ á kú Yurusalɛmunↄ pínki, à sã kpá à tó mà yã pì oárɛ.
15 Í dí gbɛ̃ pìnↄ kũ lákũ átɛn da nàro, zaakũ kↄnkↄ mↄ̀ kɛ̃ndon tera.
16 Yã kũ annabi Yoɛli òon dí:
17 Luda pì: Gↄrↄ kpɛdenↄ zĩ mani ma Nini pisi gbɛ̃ sĩnda pínkia, á nɛ́gↄ̃gbɛ̃nↄ kũ á nɛ́nↄgbɛ̃nↄ ni annabikɛyã o, á kɛfɛnnanↄ ni wɛ́gupu e, á mare zↄ̃kↄ̃nↄ ni nana o.
18 Gↄrↄ birenↄa mani ma Nini pisi ma zↄ̀blerinↄa gↄ̃gbɛ̃nↄ kũ nↄgbɛ̃nↄ ń pínki oni annabikɛyã o.
19 Mani sèedanↄ kɛ musu, mani yãbonsarɛnↄ kɛ andunia gũn, aru kũ tɛ́o kũ túsukpɛ síi lukuo nigↄ̃ kún.
20 Ifãntɛ̃ ni sira kũ, mↄvura ni tɛ̃ra kũ lán aru bà ari Dikiri sugↄrↄ zↄ̃kↄ̃ gakuride gↄ̃ gɛ́ ká,
21 gbɛ̃ sĩnda pínki kũ òdi Dikiri sísinↄ ni bo.
22 Isarailanↄ, à yã dí ma. Lákũ á dↄ̃ á zĩdanɛ nà, Luda Yesu Nazɛra mↄ̀árɛ a gbɛ̃ ũ kũ daboyãnↄ kũ yãbonsarɛnↄ kũ sèeda kũ à kɛ̀ a gãi á tɛ́nↄ.
23 Luda zɛ̀o a pↄyenyĩna kũ a dↄ̃naao gũn kũ ò a kpàáwa, akũ a tò kifirinↄ a pà lía ò a dɛ̀.
24 Akũ Luda ga bàa pòroa à a vù, zaakũ à zɛ́ vĩ kũ ga ni fↄ̃ àgↄ̃ a kũnaro.
25 Zaakũ Dauda a yã ò à pì: Madìgↄ̃ Dikiri e ma wɛ́n gↄrↄ sĩnda pínki, lákũ à kú ma ↄplai nà pↄ́ke ni ma lukaro.
26 Abire yãin ma pↄ dìgↄ̃ nna, ma nɛ̀sɛgũn pù. Ma tãmaa vĩ kũ ma mɛ̀ nigↄ̃ kun,
27 zaakũ ĩni ma tó mira gũnlo, ĩni we n gbɛ̃ kũ à kú adona yagi kũro.
28 N ma da wɛ̃̀ndi zɛ́a, ma pↄnna nigↄ̃ pana n kĩnaa.
29 Ma gbɛ̃nↄ, mani fↄ̃ mà ó dizi káaku Dauda yã oárɛ swáswa. À gà ò a vĩ̀ a mira kú wɛ̃tɛ dín ari kũ a gbãrao.
30 A annabikɛ gũn à dↄ̃̀ kũ Luda lɛ́ sɛ̀awa à pì, áni a burinↄ doke ká a kpatan.
