29 Wɛ̃tɛ wã̀, gbɛ̃nↄ bàa lɛ̀ òtɛn sí kↄ̃kakarakɛkin, akũ ò Masedonia bùsu gbɛ̃nↄn pla Gayusi kũ Arisitaku kũ òdi gɛ́ wɛ̃tɛa kũ Pↄluonↄ kũ̀ ò gɛ̀ɛ kũńwo gwe.
30 Pↄlu ye à gɛ̃ zà pìi gũn, akũ Yesudenↄ dí wenɛro.
31 Asia bùsu gbɛ̃ zↄ̃kↄ̃ kenↄ bi a gbɛ̃nnanↄmɛ, akũ ò gbɛ̃nↄ zĩ̀a ò lɛ dàa àsun gɛ̃ zànlo.
32 Kↄ̃kakaranaa yàka, gbɛ̃nↄ tɛn wiki lɛ́ òtɛn kↄ̃ yã maro, zaakũ pari dↄ̃ tó bↄ́yãin ò kàkarairo.
33 Yudanↄ ↄ sↄ̃̀ Alɛsandai à yã o, akũ zàa gũn gbɛ̃kenↄ tɛn lɛ́ dↄa. Akũ Alɛsanda ↄ kɛ̀ńnɛ de ò yĩtɛ, à ye à Yudanↄ bàka bo yãn gbɛ̃nↄ wára.
34 Kũ ò a dↄ̃̀ Yuda ũ, akũ ń pínki wiki sìkũn lɛɛlɛ lán awa pla bà ò pì: Ɛfesudenↄ Atɛmi zↄ̃kↄ̃.
35 Akũ wɛ̃tɛ gbɛ̃ zↄ̃kↄ̃ ń zuka zɛ̀ à pì: Ɛfesudenↄ, gbɛ̃ sĩnda pínki dↄ̃ kũ á de tãna zↄ̃kↄ̃ Atɛmi kpɛ́ dãkpãri ũ kũ a surakpasao.
