Yuhanis 3:20-36

²⁰Ta totoang atuil man daek sa-saa banan lo ngas, kom langa na lo. Oen kom langa na in kaloe se one lo, lole langa na kolong lulit oen in daek dadaat tas sam.

²¹Mo atuil in daek muid asa man in toma ngas, maas le halin langa na kaloe se one. Langa na tulu noan, oen daek muid Ama Lamtua in koma ka.”

²²Hidi na kon, Yesus nol Un ima-ii las putis deng kota Yerusalem, le lakos daad tahang se dale Yudea. Se na, oen sarain atuli.

²³Dedeng na lam Herodes nol un nenan nas tamang Yuhanis in Sarain Atuli ka lako se bui dalen lo bii. Ta un kon sarain atuil se iung Ainon, man dani nol iung Salim, undeng se na lam, muik ui mamo. Kon atuli las taan in maa bus el Yuhanis sii, le un sarain one.

²⁵Lam muik hadat mes ne agama Yahudi la, man tek noan, tao apan le niu, halas-sam boel in kohe-kanas. Se la muik atuil Yahudi mesa, man tao dais nol Yuhanis ima-ii las, deng dais na.

²⁶Kon oen maas se Yuhanis le tekan noan, “Ama guru nangan neta tam lo ka? Atuling man in nuting ama se palun Yordan halin nua, man ama tek noan, Un nam mo Kristus sa, kon sarain atuli! Ta muik in maa bus el kita li pait lo ka! Lole totoang atuli li taan in laok bus el Una lua sii kam!”

²⁷Yuhanis situs noan, “Elia! Etan Ama Lamtua Allah in ne sorga ku sai lalan bel atuli li lo kam, atuli li tao nal saa lo.

²⁸Mi esan ming son, auk tek langa-langa noan, ‘Auk niam Kristus man kit in natang-natang nga lo. Mo Ama Lamtua nutus auk maang muna le sai lalan bel Kristus!’

²⁹Naleta el, bikloeb in mana le sapa ki niam mo muik un bihatan. Mo un tapa man in dil nol una ka, dalen kolo isi nikit un ming biklobeng in mana le sapa na fala ka. Yesus nam banansila el biklobeng in le sapa ka. Nol auk niam tuladang el Un saksin man aa deng Una. Undeng na, le auk daleng kolo isi.

³⁰In muun dui ka, Un musti daid atuil tene taplaeng, molam auk musti senet le daid atuil ana.”

³¹Yuhanis tupang napiut un in aa ka noan, “Un niu maa deng Ama Lamtua Allah in ne apan-dapa kua, tiata Un tene dui deng totoang. Mo auk suma deng apan-kloma kia, tiata auk banansila el totoang atuil in ne apan-kloma ki ngias. Auk aa deng dais lelo-lelon se apan-kloma kia. Mo Atuling man in niu maa deng Ama Lamtua in ne apan-dapa kua ka, muun dui deng totoang.

³²Ta Un tek deng asa man Un esa in neta, nol in ming son nas. Mo atuli li sium asa man Un in tek son nas lo.

³³Eta atuli sium asa man Atuling in deng dapa ku in teka ngas sam, un kon tulu taad son noan, Ama Lamtua in aa ka toma.

³⁴Atuling man Ama Lamtua in niung maa ka, Un tek deng Ama Lamtua Allah in hida ka. Undeng Ama Lamtua bel Un Koo la son, nol muik tahan in pesa lo.

³⁵Lole Ama in ne sorga ku, neka-namnau Un Ana ka isi. Nol Un sao totoang nas se Un Ana ka ima.

³⁶Tiata atuil in parsai se Aan na ka, haup in nuli man hidi nutus taan lo ka. Mo atuil in parsai se Un lo, nol tao muid Un in hida ka lo ngas, haup in nuli lo, hidim Ama Lamtua Allah tulu Un in komali ka tutungus, nol hukung one.”