Yuhanis 21:7-17

⁷Auk kon baab se na, ta auk tek Petrus noan, “Inaah! Un nam kit Lamtuan na!” Ming auk in aa ela ka kon, Simun Petrus pake un kado la pait, hidim pitin taam lako tubu ka dalen, le nangen lako tuu kua.

⁸Lui la katang deng tuu ka, nataka le suma meter ngatus sii. Ta un tapan nas tuku-bes lui la pait lakos tuu ka, nol pel pukat man ikan in inu na, deng lui la ulin na.

⁹Oen lakos lius se tuu ka lam, oen ngat net ai opon bua mes kaloe nabael se la. Se ai opon na dapa, muik ikan. Nol ruti kon muik se na.

¹⁰Yesus tek oen noan, “Kil nol ikan bubuit deng ikan man apin halas-sam mi in nala ngas maa.”

¹¹Kon Simun Petrus sake lako pait lui la dapa, le pel nol pukat ta lako tuu ka. Pukat na inu nol ikan tene sii. Ikan nas mamon na ngatus buk limas tilu. Ikan nas mamon na ela na mo, pukat na sait ana mes lo kon.

¹²Hidi kon Yesus haman oen le tekas noan, “Maa le kaa napat le!” Oen tanan son noan, Un nam mo oen Lamtuan na. Tiata oen barain ketan lo noan, “Ku nia mo asii la?”

¹³Hidim Yesus kat ikan na nol ruti la, le laok bel one.

¹⁴Na lalis tiul deng Yesus in tulu-balang apa ka bel Un ima-ii las, se dedeng Un in nuli pait deng Un in mate ka ka.

¹⁵Nikit oen kaa hidi kon, Yesus ketan Simun Petrus noan, “Simun, Yuhanis ana, elola la? Ku namnau Auk dui deng ku tapam mias, in namnau Au kia le?” Kon un siut noan, “Baktebes Papa! Paap taan auk in namnau Papa ka son.” Ti Yesus hid un noan, “Etan ela lam, lolo-poa Auk lae-blai las babanan le halin nam oen haup in kaa-ninu.”

¹⁶Kon Yesus keket un pait noan, “Simun, Yuhanis ana. Elola? Ku namnau Au, tam lo ka?” Un siut noan, “Auk namnau Paap baktebes! Paap taan auk in namnau ka son.” Kon Yesus hid un noan, “Etan ela lam, papa-paiduil Auk lae-blai las nol babanan.”

¹⁷Hidi kon Yesus keket un pait noan, “Simun, Yuhanis ana. Elola? Ku namnau Auk el ku tapam tam lo ka?” Kon nam, Petrus dalen na ili, undeng Yesus keket un oe tiul noan, “Ku namnau Au tam lo ka?” Hidim un siut noan, “Paap man taan totoang dasi lias. Tiata Paap taan son noan, auk niam Paap tapa, tamlom lo ka.” Kon Yesus hid un pait noan, “Etan ela lam, lolo-poa Auk lae-blai las babanan, le halin oen haup in kaa-ninu.