2 Co nyɑ́ kpɑ́lʋɣʋ nɑ nyɑ́ yoou wontu, nɑ ń kɔɔ mɑ wɑɑsʋɣʋ.
3 Kpɛɛ nyɑ́ ŋmɑntɑɑɣɑ nɑ mɑ kʋnyɔntʋlɑɑ tɔɔ. Heeli-m sɩ n kɑ yɑ mɑ nyʋɣʋ.
4 Tʋ fɛɛlɛ kɛ mɑ weesuɣu ləsəlɑɑ nɑ pə́ liɣiti-wɛ. Mpɑ pɑ hɔkəɣɩ sɩ pɑ́ lɑ-m ɩsɑɣɑtʋ tɔ, pɑ́ məlɩ wɑɑlɩ nɑ pɑ́ kɑ́ nyɔɔŋ.
5 Pə́ yɑsɩ-wɛ ɩsɩɩ heelim kpɑɣɑ nyɩɩlʋɣʋ kɛ wɑɑtʋ wei Tɑcɑɑ ɩsɔtɑɑ tillu tɔɣɔnəɣɩ-wɛ tɔ.
6 Nɑ səkpɛtʋɣʋ nɑ sotu wɛɛ pɑ mpɑɑʋ tɑɑ kɛ wɑɑtʋ wei Tɑcɑɑ ɩsɔtɑɑ tillu wɛ pɑ wɑɑlɩ tɔ.
7 Mpi tɔ, mʋsʋŋ kɛ pɑ nyəpɑ-m kɑtɔkɑ, nɑ pɑ́ huli mɑ mpɑɑʋ tɑɑ kɛ́ pʋʋɣʋ sɩ mɑ́ hoti.
8 Wɑkəlʋɣʋ ɩ́ tuti-wɛ nɑ pɑ mɑɣɑmɑɣɑ pɑ kɑtɔkɑ kpɑ-wɛ, nɑ pɑ́ hoti pɑ pʋʋɣʋ tɑɑ nɑ pɑ́ lɑ́ ɑsɑɑlɑ.
9 Amɑ mɑ lɑŋlɛ kɑ́ hʋləmənɑ Tɑcɑɑ nɑ mɑ́ yɔɔlənɑ nyɑ́ wɑɑsʋɣʋ.
10 Ɩlɛnɑ mɑ́ yɔɣɔtɩ mɑ tɑɑ sɩ, Tɑcɑɑ fɛɩnɑ sɑɑlɑ. N wɑɑsəɣɩ kʋnyɔntɔɣɔlʋ kɛ toŋ tʋ niŋ tɑɑ. Nɑ ń wɑɑsɩ wɑhɑlɑ tʋ nɑ kʋnyɔntʋ kɛ wei ɩ tɔkɩ pɑ ɩsɛ tɔ ɩ niŋ tɑɑ.
11 Pɔpɔtʋ ɑseetɑ nyə́mɑ pɔɔsəɣɩ-m ɩsɑɣɑtʋ nti mɑ tɑ nyɩ tɔ.
12 Nɑ pɑ́ lɔɔkɩ-m. Mɑ pəsɑ kʋcɔɔʋ fɛləɣɩ nyɑŋ kɛ́.
13 Pəyele sɑɑ wei pə wɩɩkɑɣɑ mpɛ tɔ mɑ suukɑɣɑ ləyɑɣɑ wontu kɛ́ nɑ mɑ́ hɔkəɣɩ nɔɣɔ, nɑ mɑ́ sələməɣɩ Ɩsɔ nɑ nyʋɣʋ kɑmɑ sɩ pə́ wɑɑ-wɛ.
