14 Mɑ nyənɑɣɑ-wɛɣɛ mɑ newɑɑ yɑɑ mɑ tɑɑpɑlɑɑ kɛ́, nɑ pɑ tɔm wɑkələɣɩ mɑ lɑŋlɛ. Nɑ mɑ́ tɔŋ nɔɔhəlɛ nɔɔhəlɛ. Nɑ ɩsɛ kɑmɑ ɑtɛ ɩsɩɩ mɑ too kʋlʋlʋ səpənɑ.
15 Ɩlɛnɑ mpɛ pɑ́ woŋiɣi mɑɣɑ sɑɑ wei mɑ cɛŋləɣɩ tɔ. Nɑ pɑ́ pɛɛləɣɩ mɑ tɔɔ kɛ́ nɔɣɔ. Kpɑɩ nyə́mɑ mpɑ mɑ tɑ nyɩ tɔ, pɑɑ hɛɛsəɣɩ mɑ tɔm kɛ kɑpusi mɑpʋ.
16 Pə copɑ-m nɑ pɑ́ woŋ nɑ pɑ́ kpɑləsɩ. Nɑ pɑ́ nyɩɩkɩ-m kelɑ nɑ pɑ́ɑ́nɑ́.
17 Tɑcɑɑ wɑɑtʋ wei kɛ́ n kɑ́ hɛɛsɩ-m nyənʋɣʋ nɑ ɩsɛ? Kenti-m tɔɣɔlɑsɩ nsɩ nɑ ń yɑ-m sɩ səkpɑŋ tɑɑ.
18 Ɩlɛ mɑɑ sɑ-ŋ kotilɑɑ tɑɑ. Nɑ mɑ́ sɛɛ-ŋ yəlɑɑ sɑmɑɑ tɑɑ.
19 Tɑɑ yele nɑ mɑ kolontunɑɑ mpɛ pɑ́ pɑɑnɑ mɑ wɑhɑlɑ. Mpɑ ɩnɩ pɑ tɑɑ kpɑɑnɑ-m mʋsʋŋ tɔ, pɑ yele təmɑɣɑ ɩsɛ cəpəlʋɣʋ kɛ mɑ tɔm.
20 Pɑɑ yɔɣɔtəɣɩ tɔm kʋpɑntʋ pəyele pɑ cɑkənɑ yəlɑɑ mpɑ pɑ wɛ təpɑmm tɔɣɔ tɑm.
21 Pɑ hɑɑkɩ pɑ nɔɔsɩ nɑ mɑ tɔɔ nɑ pɑ́ woŋiɣi nɑ pɑ́ kpɑləsəɣɩ sɩ: Tə nɑ-ŋ kɛ́ nɑ tɑ́ ɩsəpile təkelekele.
22 Tɑcɑɑ, n nɑwɑ mpi pə lɑpɑ tɔ, Tɑɑ hɑtələnɑ-m, pəyele tɑɑ su.
23 Hɑɩ Tɑcɑɑ, kʋlɩ nɑ ń hɑ-m tɑmpɑnɑ, mɑ cɑɑ Ɩsɔ, sɛɛnɑ mɑ tɔɔ.
