4 Mɑ sɑmɑ Tɑcɑɑ nɑ kɑwilitɑɣɑ. Nyɑ́ yɑpənɑ-m kolontunɑɑ niŋ tɑɑ.
5 Səm kɑ tʋ-m ɑlukpɑlɑ kɛ́, nɑ pə́ nyɑɑsəɣɩ-m ɩsɩɩ pɔɣɔ ɩsɑɣɑɑ.
6 Atɛtəlɛ kɑ hɔkɑ-m tə ŋmɩɩsɩ kɛ́ nɑ səm nɑ́ɑ́ tuti-m nɑ pə puluɣu.
7 Mɑ yɑ́ɑ́ Tɑcɑɑ kɛ mɑ lɑŋwɑkəllɛ wɑɑtʋ sɩ ɩ́ wɑɑsɩ-m. Mɑ kiisɑɑ nɑ ɩ́ nɩɩ mɑ nɔɣɔ kɛ ɩ təyɑɣɑ tɑɑ.
8 Pɑ́ɑ́nɑ́ kpɑ Ɩsɔ nɑ tɛtʋ sele, nɑ pɔɔŋ nɑ́ɑ́ sele too ɩ kilɑ tɛɛ.
9 Ɩsɔ tɔwɑ kɔkɔ nɑ kɑ cəɣəlɑsɩ nɑ ɩ nɔɣɔ nɑ kɑ nyɔɔsɩ lɩɩnɑ ɩ mɩɩnɑ tɛɛ.
10 Ɩsɔ lumsɑ ɩsɔtɔnʋɣʋ nɑ ɩ́ tii. Nɑ ɩ nɔɔhɛɛ tɛɛ kɛ́ ɩsɔtɔnʋɣʋ kpɩɩsəŋ nyəŋkʋ.
11 Ɩsɔ cɑɣɑ ɩsɔtɑɑ tillu tɔɔ nɑ ɩ́ kʋləɣɩ hʋntʋ, kɛ heelim tɔɔ.
12 Ɩsɔ tɑkɑ ɩ təɣɩ səkpɛtʋɣʋ nɑ ɩ́ wɛ tɛʋ ŋmʋntʋɣʋ kʋkpɛɛtʋɣʋ tɛɛ.
13 Ɩsɔ nyɑləməlɛ tɛɛ-ɩ nɔɣɔ nɑ tə́ yɑsəɣɩ ɩsɔŋmʋntʋ nɑ tə́ lɔkɩ tɛʋ tɔmpɛɛ nɑ kɔkɔ cəɣəlɑsɩ.
14 Ɩsɔtɑɑ Ɩsɔ Sɔsɔ nɔɣɔ nɩɩ ɩsɔtɑɑ kɛ́ ɩsɩɩ tɛʋ holɑ.
15 Ɩsɔ tɔwɑ mɑ kolontunɑɑ kɛ nyəmɑ́ nɑ ɩ́ yɑsɩ-wɛ. Nɑ ɩ́ tisi pɑ tɔɔ kɛ́ cɑlɑnɑɑ kɛ sɔsɔm nɑ pɑ́ se yem yem.
16 Tɑcɑɑ mʋ pɑ́ɑ́nɑ́ nɑ ɩ́ woso ɩ mɩɩnɑ tɛɛ, nɑ teŋku tɛtʋ nyɩɩ nɑ pə́ nɑ́ ɑntulinyɑ kite.
17 Ɩlɛnɑ ɩ́ tisi ɩ niŋ nɑ ɩsɔtɑɑ nɑ ɩ́ ləsɩ-m lʋm sɔsɔɔm tɑɑ.
18 Nɑ ɩ́ yɑ-m mɑ kolontunɑɑ toŋ nyə́mɑ mpɑ pɑ tɛɛ-m tɔ pɑ niŋ tɑɑ.
19 Mɑ wɑhɑlɑ wule kɛ pɑ tutɑ-m, ɩlɛnɑ Tɑcɑɑ wɑɑsɩ-m.
20 Ɩsɔ sɔɔlɑ-m tɔɣɔ ɩ wɑɑsɑ-m sɩ mɑ́ cɑɣɑnɑ mɑ tɩ.
21 Mɑ təŋɑ tɑmpɑnɑ tɔɣɔ n lɑpɑ-m mpʋ, mɑ kʋsiɣisim lɑpʋ kɑsəyɑɣɑ ntɛ́.
22 Mɑ təŋɑ Tɑcɑɑ tɔm kɛ́, mɑ tɑ wɑkələnɑ-ɩ.
23 Mɑ təŋɑ nyɑ́ kʋsəsɩɩtʋ tənɑ tɔɣɔ. Mɑ tɑ yɔkɩ nyɑ́ kiiu nɑkʋlɩ.
24 Mɑ luɣu fɛɩ tɑɑlɩ nɔɣɔlʋ, tɔɣɔ mɑ kpɑ mɑ təɣɩ ɩsɑɣɑtʋ təlɑtɛ.
25 Ɩlɛnɑ Tɑcɑɑ lɛɛtɩ-m mɑ tɑmpɑnɑ təŋʋɣʋ tɔɔ. Mɑ kʋsiɣisim lɑpʋ kɑsəyɑɣɑ ntɛ́ nɑ ń nyəmɑ́.
26 Kʋpɑntʋ kɛ n fɛləɣɩ tə lɑtʋ. Nɑ ń təŋ tɑmpɑnɑ nɑ ń lɑnɑ ɑ təŋlʋ.
27 Yʋlʋ ɩ́ wɛ tənɑŋŋ ḿpʋɣʋ n lɑkɩ-ɩ. Ɩlɛnɑ ń kisi ɩsɑɣɑʋ kɛ ɩ ɩsɑɣɑtʋ tɔɔ.
28 N wɑɑsəɣɩ təpɑsəlɑɑ. Ɩlɛnɑ ń tisiɣi kɑlɑmpɑɑnɩ nyə́mɑ.
29 Mɑ Ɩsɔ Tɑcɑɑ yekinɑ nɑ mɑ nyɑɑləm nɑɑkɩ. Nɑ pə́ kɛɛləɣɩ mɑ səkpɛtʋɣʋ.
30 Nyɑ́ toŋ kɛ mɑ ŋmɑɑkənɑ koluŋɑ ɩcɑtɛ, nɑ mɑ́ sʋʋ nɑ mɑ́ tuti mɑ kolontunɑɑ.
31 Tɑcɑɑ nyɑ́ kʋlɑpʋtʋ wɛ kɛ́ təcʋŋŋ. Nɑ nyɑ́ kʋyɔɣɔtʋtʋ fɛɩ sikɑ. N kentiɣi mpɑ pɑ cɔɔsəɣənɑ-ŋ tɔ ɩsɩɩ kpɑ́lʋɣʋ
32 Tɑcɑɑ nyɑ́ tike təkoŋ ntɛ́ Ɩsɔ. Tɑ Ɩsɔ nyɑ́ tike təkoŋ ntɛ́ kʋkpɑmʋɣʋ ŋku kʋ kentiɣi-tʋ tɔ.
33 Nyɑ́ hɑɑkənɑ-m tomɑ. Nɑ ń tiikiɣi-m mpɑɑʋ kʋsiɣisuɣu tɑɑ.
