32 Tɑcɑɑ nyɑ́ tike təkoŋ ntɛ́ Ɩsɔ. Tɑ Ɩsɔ nyɑ́ tike təkoŋ ntɛ́ kʋkpɑmʋɣʋ ŋku kʋ kentiɣi-tʋ tɔ.
33 Nyɑ́ hɑɑkənɑ-m tomɑ. Nɑ ń tiikiɣi-m mpɑɑʋ kʋsiɣisuɣu tɑɑ.
34 Nɑ ń yeki nɑ mɑ́ pəsəɣɩ sewɑ nɑ nɑɑni kɛ pulɑsɩ tɔɔ ɩsɩɩ nɑm.
35 N fɑləsɑ mɑ niŋ nɑ yoou, nɑ mɑ́ nyɩ tɔɔʋ toŋ nyəŋkʋ tɔʋ.
36 N yɑpɑ mɑ nyʋɣʋ nɑ pə́ wɛɛ ɩsɩɩ kʋkentuɣu. Nyɑ́ toŋ teesiɣi-m nɑ mɑ́ wɛɛnɑ tomɑ.
37 Nyɑ́ hɑsəɣənɑ mɑ nɔɔhɛɛ tɛɛ, pʋlʋpʋ ɩɩ tuuliɣi-m.
38 Nɑ mɑ́ tɔɣɔnəɣɩ mɑ kolontunɑɑ nɑ mɑ́ kpɑɑkɩ-wɛ, mɑ́ tɑ wɑkəlɩ-wɛ mɑɑ mələɣɩ.
39 Nɑ mɑ́ huɣi-wɛɣɛ ɑtɛ, nɑ pɑ́ wɛ mɑ nɔɔhɛɛ tɛɛ pɑɑ tɑsəɣɩ kʋlʋɣʋ.
40 Nyɑ́ hɑɑkənɑ-m yoou toŋ nɑ ń yeki nɑ mɑ kolontunɑɑ həntəɣɩ-m ɑtɛ.
41 N yeki nɑ mɑ kolontunɑɑ seeki-m nɑ mɑ́ wɑkələɣɩ-wɛ tənɑŋnɑŋ.
42 Pɑ wiiwɑ nɔɣɔlʋ tɑ wɑɑsɩ-wɛ. Nɑ pɑ́ yɑɑ Ɩsɔ, Ɩsɔ tɑ́ cɔ.
43 Mɑ nuɣutɑ-wɛɣɛ nɑ pɑ́ pəsɩ ɩsɩɩ mʋsʋɣʋ ŋku heelim kpɑkəɣɩ tɔ. Nɑ mɑ́ fɛlɩ-wɛ ɩsɩɩ hɑpəlɛ tɔɔ ɑfəlɑ.
44 N yɑpɑ-m mɑ yəlɑɑ nɔhɔntɛ tɑɑ nɑ ń sɩɩ-m piitimnɑɑ nyʋɣʋ tʋ, nɑ yəlɑɑ mpɑ mɑ tɑɑ nyɩ tɔ pɑ́ lɑkɩ-m təmlɛ.
45 Ye mɑ nyənɑ-wɛɣɛ ɩsəlɛ, pɑ nɩɩnɑ-m kɛ́. Kpɑɩ nyə́mɑ piyɑ seekinɑ-m.
46 Sɩ nɑɑni leki-səɣɩ nɑ sɩ seliɣi sɩ koloosi ɑcɑlɛɛ tɑɑ nɑ sɩ lɩɩkɩ.
47 Tɑcɑɑ nyɑ́ wɛnnɑ. Nyɑɣɑlɛ mɑ kʋkpɑmʋɣʋ ŋku kʋ kentiɣi-m tɔ, mɑɑ sɑ-ŋ. Mɑɑ tɑlɑ mɑ Ɩsɔ mɑ wɑɑsʋlʋ nyɑ́.
48 Nyɑ́ lɛɛtəɣənɑ nɑ mɑ nɔɣɔ, nɑ ń tisiɣi piitimnɑɑ kɛ mɑ tɛɛ.
