1 Tɑcɑɑ təmlɛ tʋ Tɑfiiti yontu nti ɩ sɑmnɑ Ɩsɔ kɛ́ sɑɑ wei Ɩsɔ wɑɑsɑ-ɩ Sɑyuli nɑ ɩ kolontunɑɑ lɛlɑɑ tənɑ niŋ tɑɑ tɔ. Ntɩ tə wɛnnɑ yonyoolɑɑ nyʋɣʋ tʋ yontunɑɑ tɑɑ cənɛ sɩ:
2 Tɑcɑɑ, mɑ luɣu sʋʋ-ŋ kɛ́, nyɑɣɑlɛ mɑ toŋ.
3 Nyɑɣɑlɛ mɑ kʋkpɑmʋɣʋ nɑ mɑ təcɔɔsəlɛ toŋ nyəntɛ, nyɑ́ wɑɑsəɣənɑ-m, nyɑɣɑlɛ mɑ Ɩsɔ nɑ mɑ cɔɔsəɣənɑ-ŋ. Nyɑɣɑlɛ mɑ kpɑ́lʋɣʋ nɑ toŋ wei ɩ wɑɑsəɣɩ-m tɔ.
4 Mɑ sɑmɑ Tɑcɑɑ nɑ kɑwilitɑɣɑ. Nyɑ́ yɑpənɑ-m kolontunɑɑ niŋ tɑɑ.
5 Səm kɑ tʋ-m ɑlukpɑlɑ kɛ́, nɑ pə́ nyɑɑsəɣɩ-m ɩsɩɩ pɔɣɔ ɩsɑɣɑɑ.
6 Atɛtəlɛ kɑ hɔkɑ-m tə ŋmɩɩsɩ kɛ́ nɑ səm nɑ́ɑ́ tuti-m nɑ pə puluɣu.
7 Mɑ yɑ́ɑ́ Tɑcɑɑ kɛ mɑ lɑŋwɑkəllɛ wɑɑtʋ sɩ ɩ́ wɑɑsɩ-m. Mɑ kiisɑɑ nɑ ɩ́ nɩɩ mɑ nɔɣɔ kɛ ɩ təyɑɣɑ tɑɑ.
8 Pɑ́ɑ́nɑ́ kpɑ Ɩsɔ nɑ tɛtʋ sele, nɑ pɔɔŋ nɑ́ɑ́ sele too ɩ kilɑ tɛɛ.
9 Ɩsɔ tɔwɑ kɔkɔ nɑ kɑ cəɣəlɑsɩ nɑ ɩ nɔɣɔ nɑ kɑ nyɔɔsɩ lɩɩnɑ ɩ mɩɩnɑ tɛɛ.
10 Ɩsɔ lumsɑ ɩsɔtɔnʋɣʋ nɑ ɩ́ tii. Nɑ ɩ nɔɔhɛɛ tɛɛ kɛ́ ɩsɔtɔnʋɣʋ kpɩɩsəŋ nyəŋkʋ.
11 Ɩsɔ cɑɣɑ ɩsɔtɑɑ tillu tɔɔ nɑ ɩ́ kʋləɣɩ hʋntʋ, kɛ heelim tɔɔ.
12 Ɩsɔ tɑkɑ ɩ təɣɩ səkpɛtʋɣʋ nɑ ɩ́ wɛ tɛʋ ŋmʋntʋɣʋ kʋkpɛɛtʋɣʋ tɛɛ.
13 Ɩsɔ nyɑləməlɛ tɛɛ-ɩ nɔɣɔ nɑ tə́ yɑsəɣɩ ɩsɔŋmʋntʋ nɑ tə́ lɔkɩ tɛʋ tɔmpɛɛ nɑ kɔkɔ cəɣəlɑsɩ.
