6 Lɑ nɑ tɛʋ ŋmɛləsɩ nɑ ń yɑsɩ mɑ kolontunɑɑ. Tɔ-wɛɣɛ nyɑ́ nyəmɑ́ nɑ pɑ́ yɑ́ yem yem.
7 Loosi nyɑ́ niŋ nɑ ɩsɔtɑɑ nɑ ń hɛtɩ-m, nɑ ń yɑ-m kpɑɩ nyə́mɑ mpɑ pɑ wɛ ɩsɩɩ lʋm sɔsɔɔm tɔ pɑ ɑsolɑ tɑɑ.
8 Kɑloolɑɣɑ kɛ pɑ nɔɔsɩ yɔɣɔtəɣɩ, nɑ pɑ́ kpɑɑsəɣɩ pɑ niŋ ntɔɣɔŋ nɑ pɑ tuukinɑ pɔpɔtʋ.
9 Hɑɩ, Ɩsɔ, mɑɑ yoo-ŋ yontu kʋfɑtʋ, nɑ mɑ́ sɑ-ŋ ŋmɩɩsɩ nɑɑnʋwɑ cəmʋɣʋ tɔɔ.
10 Nyɑ́ wɑɑsəɣənɑ ɑwulɑɑ. Nyɑ́ yɑpənɑ nyɑ́ təmlɛ tʋ Tɑfiiti kɛ lɑɣɑtɛ nɔɣɔ tɑɑ.
11 Hɛtɩ-m nɑ ń yɑ-m kpɑɩ nyə́mɑ niŋ tɑɑ. Kɑloolɑɣɑ kɛ pɑ nɔɔsɩ yɔɣɔtəɣɩ, nɑ pɑ́ kpɑɑsəɣɩ pɑ niŋ ntɔɣɔŋ nɑ pɑ́ tuukinɑ pɔpɔtʋ.
12 Tɑ pəyɑlɑɑ ɩ́ wɛɛ ɩsɩɩ tɩɩŋ wei ɩ wɛ tɑwɑ tɑɑ nɑ ɩ́ pɩɩkɩ ɩ pəcɑɑtʋ tɔ. Tɑ pɛɛlɑɑ ɩ́ wɛɛ ɩsɩɩ Ɩsɔ təsɛɛlɛ ɑkelenɑɑ mpɑ pɑ lɑpɑ kɑcɔkɑ kɛ teu tɔ.
