9 Wixni Partone, ga wa Metone, ga wa Gelamitane, ga wa Mesopotami gajene, Gote gajene, ga wa Kapatosi gajene, Ponto gajene, ga wa Gasya gajene.
10 Prigi gajene, ga wa Pampiri gajene, Gigipto gajene, ga wa pasretkaka Liwya, Surene tukasreta gajene, ga wa Roma giyakatyachine,
11 Goteyone ga wa Goteyo gitaknawachine koxa. Krete gwachine, Garawa gwachine, wyijnako yanumsaletna wixako wtokanuya tsru ruyaklekaka Goyakalupirana.”
12 Rumyekna pejnuruneko. Gi rumatanshinikanutna. Wane chinkakna, “¿Klunerutkange?”
13 Pimrine kgixpiranataklerune. Wane chinna, “Jinanunatkana winga.”
14 Giyagni Petro tunwata wa pamole satupjeneyma. Gichko tokanru runkaklewyegitna. Wane chinna, “Jejine, Goteyone, ga wa pejnuruneko Gerosale gwachingi, gimatanru tye. Gyijnakotokanutanno.
15 Gi rixanu gi wa gimetachinni wa nyi wa nchinanshinikanutyawaka. Gi rixanu tumananustsiwani.
16 Seyni tye kgonutkala wa tokanchi geneklewatachri Gowele chinyawaka:
17 Wane china Goyakalu: Wane rixanu ralipregognepatka. Giwekikaluru Gitanu napookakpotutanru pejnuruneko gaji. Tokanchi geneklewatachinepni pwugenene jejine ga wa suxone. Gmaklutene getanru kaygawlukaka. Gixa tsrutene gipnawatanu gipnawlukaka.
18 Galikakni walgognepatka nwayegrene, nwayegrerone yegi nyokanatanru Giwekikaluru Gitanu. Tokanchi geneklewatachinepni.
19 Koglajrukaka nenekanu tengogneya, ga wa tengognempuko getkalurkaka tyechijneya, jralu, ga wa xirnachri, ga wa chichipgya gimomopgyatachri.
20 Kashrijewnanu tkachi. Ruchpokanu. Ga wa ksuru jraplu, ma mapookanuwachi Gitsrukaachi tsru koglajrugogne.
21 Wane rixanu girukokta Gitsrukaachi giwaka tomsatanu, wale gognetkaako.
22 “Jejine, Gisrayiline gyijnakotanru tye tokanchi: Geso, Nasare gajeru, Walenwa jeji Goyakalu kiglepiranyegiru rixkakanru gixyegiya ruyaklekakaya, ga wa koglajrekakaya, ga wa getkalurkakaya. Tyenwa Goyakalu kamrutanru Waleya gixatskalaya, gimatyawaka koxa gixa.
23 Walenwa samyookaluru Goyakalu giglepokotyawaka wa rushinikanru, ga wa muchikawako rumatgognenatanru. Wale gixa gixripkakanru ga wa giylatanru wa kmukochirerunemyoya. Koroshishkita gitakjixanru.
24 Wale Goyakalu yotunkaka. Gipukchichino kaspukyalu. Gi rixanu gi rumkata chipetkotatka gipukchiya.
25 “Gi rixanu Tawi wane chinpiranyegitlu: Netlu Gitsrukaachi gita ginaple rawgognenatinri. Gi rixanu npotuklesretate rawa, Gi wa nkomyemyetko.
26 Wale chinanu numuwgajita, ga wa numuwleymananuka nyanumata. Ga wa xani nomane koxa gapnanutanu kagwakikolupa chinanu.
27 Gi rixanu gi puknokamtanno gipnachine gwiyawaka. Gi koxa puchichanru wa Pixanu mmukochiretu rujpaginripa.
28 Pumatkakno giweklugapkaka. Pomjikpotutanno Pixa yegi nixinri.
29 “Jejine, nomolene, gichichanno nunkakyapgi pgujetanuwaka tsrupotni gitsrukaachini Tawipirana. Wa gipnachrinatka. Kapnatkana. Ga wa giyomle wixyeglu xanigognenanu.
30 Giyagni tokanchi geneklewatachri rixinri, Tawi gimatlu wa Wale kawchinanu Goyakalu wane chinru wa Tawiklopishaneya gixmanetyawaka Goyakalu gipgujewnakakanru Kristo pogirewatinripa Tawi pogirewatyawakaya.
31 Ma mapookanuwa retinitkalu, runkakletlu Kristo yotunotinripa. Gi wa ruknooko gipnachine gwiyawaka. Gi wa gigituko jpaggianu
32 Wa tye Geso yotunkaka Goyakalu. Walepirana pejnurunekwu gipgujtatachinwu.
33 Giyagni pogirchi rutaaka Goyakalu potuklesretate. Girchi yegi rawyalu gipiratkaluru Giwekikaluru Kpashiripirana. Rawinitkalu rupkakatkalu wa tye gixa getanru ga wa gyijnakotanru.
34 Gi rixanu Tawi gi wa tengogne ya, seyni wale wane china: Gitsrukaachi wane chinru wa Nutsrukate, Npotuklesretate ptuplatanu,
35 Nutakinpotukna pkamnixjene putspanjixgapre rixinripna.
36 “Gimatankoxlu pejnuruneko Gisrayiliklopishangi wa tyeko Geso wa koroshishkita gitakanru, Goyakalu galikakni gitakatkalu Gitsrukaachi ga wa Kristo rixinripa.”
37 Giyagni yijnakotinrina tyepirana, kachingajinatkana. Wane chinkana Petro ga wa pimrine yokanatanune, “Jejine, wumolene, ¿gi wixanutka xani?”
38 Ga wa Petro wane chinna, “Genshinikanutanu. Gkatikolupa wa gixa satkakgi Geso Kristo giwakaya, gkaspukmukochiretikolupa. Gyoptotanru Giwekikaluru Kpashiri geneekaluru.
39 Gi rixanu gixanupni wa gipiratkaluru, ga wa gwugenenenupkoxapa, ga wa gyoptukaklopishatyawakpotunanuka, gi pejnukta wa Gitsrukaachi Woyakalute tomganunepa.”
40 Gixo pimri tokanchi rupgujtalewata. Ruykolewata. Wane china, “Gognetkakikolupa gixa tyegogne gimuweekakanatachine mpotukanyegiya.”
41 Giyagni wa yoptotokanutjene katka. Yogniikalunni walegogne mapa waragka getko yine.
42 Yokanatkalune ginkaklewle romkagitna. Romkagi gimatkakletna. Romkagi jiknajroletlona jimapro. Romkagi gagjigogneretna.
43 Pejnuruneko yine pika. Gixo koglajru ga wa getkaluru kamrutka wanna yokanatkaluneya.
