ዮሃኒሳ 9:2-39 in Gamo

² ኢዛ ካሊዛይቲ ኢዛ “ኣስታማሬ! ሃይሲ ኣዴዚ ቆቄ ጊዲ ዬሌታና ማላ ናጋራ ኦꬂዳይ ኦኔ? ኢዛ ዬሊዳይቲ ኦꬂዶዬ? ኢዚ ኦꬂዴ?” ጊዲ ዬሱሳ ኦይቺዳ።

³ ዬሱሲካ ኢስታስ “ኢዛ ጊዲንካ ኢዛ ዬሊዳይቲካ ናጋራ ኦꬂቤቴና። ኢዚ ሄሳꬆ ሃኒዳይ ፆሳ ኦሶይ ኢዛ ቦላ ቆንጫናሳ።

⁴ ጋላሳራ ታና ኪቲዳዴ ኦሶ ኦꬃናስ ታስ ቤሴስ። ቡሮ ኦኒካ ኦꬃናስ ዳንዳዮንታ ቃማይ ያና።

⁵ ሃ ቢታ ቦላ ዲዛ ዎዴ ሃ ቢታስ ፖዖይ ታና” ጊዴስ።

⁶ ሄሳ ጊ ሲሚዲ ቢታ ቦላ ጩች ጩቲዲ ባ ጩቻን ኡርቃ ሹጊሲዲ ኣዴዛ ኣይፌዛ ሄ ኡርቃ ቲዪዲ፥

⁷ “ባዳ ሴሊሆሜን ኣሳይ ፃማቄቲዛሶን ሜጬታ” ጊዴስ። ሴሊሆሜ ጉሲ ኪቴቲዳይሳ ጉሳ። ኣዴዚካ ቢዲ ሜጬቲዲኔ ፄሊሼ ሲሚ ዪዴስ።

⁸ ኢዛ ዶꬃቲኔ ካሴ ኢዚ ሄን ዎሲሺን ቤዪዳ ኣሳይ “ሃይሳዴይ ካሴ ኡቲዲ ዎሲዛ ኣዴዛ ዴኔ?” ጊዳ።

⁹ ኢስታፌ ኢሲ ኢሲ ኣሳቲ “ኤ ኢዛኮ” ጊዳ። ባጋይቲ “ኢዛ ዴና” ጊዳ። ኢዚ ቃሴ “ታ ኢዛኮ” ጊዴስ።

¹⁰ ኢስቲካ “ሂስቲን ኔ ኣይፌይ ዋኒ ፄሊዴ?” ጊዲ ኦይቺዳ።

¹¹ ኢዚካ ዛሪዲ “ዬሱሳ ጌቴቲዛ ኣሲ ቢታ ቦላ ኡርቃ ሙኑቂዲ ታ ኣይፌዛ ሄ ኡርቃ ቲዪዲኔ ታና ‘ባዳ ሴሊሆሜን ሜጬታ’ ጊ ዮቲን ታ ባዳ ሜጬታዳ ፄላናስ ዳንዳያዲስ” ጊዴስ።

¹² ኢስቲካ “ሂስቲን ሄሳዴይ ሃዒ ኣዋን ዲዜ?” ጊዳ። ኢዚካ “ታ ኤሪኬ” ጊዴስ።

¹³ ኢስቲካ ሄ ካሴ ኣይፌ ቆቄ ኣዴዛ ፋርሳዌታኮ ኤፊዳ።

¹⁴ ዬሱሲ ኡርቃ ሙኑቂዲ ኣዴዛ ኣይፌ ፓꬂዳ ጋላሳይ ኣይሁዳታ ሳምባታ ጋላሳ።

¹⁵ ሄሳ ጊሽ ፋርሳዌቲ ኣዴዛ ኢዚ ዎስቲ ፄሊዳኮኔ ኢዛ ኦይቺዳ። ኣዴዚካ ዛሪዲ “ኢዚ ታ ኣይፌን ኡርቃ ቲዪዴስ፤ ታካ ሜጬታዲስ፤ ሄኮ ሃዒ ፄላዲስ” ጊዴስ።

¹⁶ ፋርሳዌታፔ ኢሲ ኢሲ ኣሳቲ “ሃይሲ ኣዴዚ ሳምባታ ቦንቾንታዴ ጊዲዳ ጊሽ ኢዚ ፆሳፌ ጊዴና” ጊዳ። ባጋይ ቃሴ “ናጋራንቻይ ሃይሳ ማላ ማላታ ዋኒ ኦꬃና ዳንዳይዜ? ጊዳ። ሄሳ ጊሽ ኢስታ ጊዶን ፓላማይ ሜꬌቲዴስ።

¹⁷ ሂስቲን ካሴ ኣይፌ ቆቄ ኣዴዛኮ ሲሚዲ “ሃ ኔ ኣይፌ ፓꬂዳ ኣዴዛ ጊሽ ኔ ኣይ ጋይ? ጊዳ። ኣዴዚ ዛሪዲ “ኢዚ ናቤኮ!” ጊዴስ።

¹⁸ ኣይሁዳቲ ኣዴዛ ዬሊዳ ኣዬይራኔ ኣዋራ ፄይጊሲ ኤሂሳና ጋካናስ ኣዴዚ ካሴ ቆቄ ጊዲዳይሳ ኣማኒቤቴና።

¹⁹ ኢስቲካ ዬሊዳይታ “ኢንቴ ‘ኑስ ቆቄ ናይ ዬሌቲዴስ’ ጊዛ ናዚ ሃይሴ? ሂስቲን ሃዒ ዋኒዲ ፄላና ዳንዳዪዴ?” ጊዳ።

²⁰ ዬሊዳይቲካ ሂዝጊ ዛሪዳ “ኢዚ ኑ ና ጊዲዳይሳኔ ቆቄ ጊዲዲ ዬሌቲዳይሳ ኤሮስ።

²¹ ሃዒ ቃሴ ኢዚ ዋኒ ፄላና ዳንዳዪዳኮኔ ኢዛ ኣይፌ ኦኒ ፖጊዳኮኔ ኑ ኤሮኮ። ኢዚ ባና ዳንዳዪዳዴ ጊዲዳ ጊሽ ኢዚ ባ ጊሽ ዮታናስ ዳንዳዬስ፤ ኢዛ ኦይቺቴ” ጊዳ።

²² ኢዛ ዬሊዳይቲ ሄሳꬆ ጊዳይ ኦኒካ ዬሱሳ ኢዚ ኪርስቶሳ ጊዲ ማርካቲዳይ ዉሪ ኣይሁዳታ ዎሳ ኬꬃፌ ጎዴታና ማላ ኣይሁዳቲ ካሴ ሴራ ኦꬂዳ ጊሽ ኣይሁዳታስ ባቢዲ ጊዳ።

²³ ሄሳ ጊሽ “ኢዛ ዬሊዳይቲ ኢዚ ባና ዳንዳዪዳዴ ጊዲዳ ጊሽ ኢዛ ኦይቺቴ” ጊዳ።

²⁴ ካሴ ቆቄ ኣዴዛ ቃሴካ ፄይጊዲ “ሃይሶ ኔ ቱማዮ ዮታዳ ፆሳ ቦንቻ። ሃይሲ ኣዴዚ ናጋራንቻ ጊዲዳይሳ ኑ ኤሮስ” ጊዳ።

²⁵ ኢዚካ “ኢዚ ናጋራንቻ ጊዲን ታ ኤሪኬ። ጊዶ ኣቲን ታ ካሴ ቆቄ ጊዲዳሮኔ ቃሴ ሃዒ ታ ፄሊዛሮ ሃኖ ፃላ ኤራይስ” ጊዴስ።

²⁶ ኢስቲ ቃሴ ኢዛ “ኢዚ ኔስ ኣይ ኦꬂዴ? ኔ ኣይፌዛ ዎስቲ ፖጊዴ?” ጊዲ ኦይቺዳ

²⁷ ኢዚካ “ታ ኢንቴስ ካሴ ዮቲን ዎዝናን ዎꬂ ሲይቤኬታ ሺን ሃዒ ቃሴ ኣዛስ ዛሬꬂ ሲያና ኮዬቲ? ኢንቴካ ኢዛ ካሊዛይታ ጊዳና ኮዬቲ?” ጊዴስ።

²⁸ ሄሳፌ ጉዬ ኢዛ “ኑ ሙሴ ካሊዛዴንታ፤ ኔ ኢዛ ካሊዛዴ ጊዳ።

²⁹ ካሴ ፆሲ ሙሴራ ሃሳዬቲዳይሳ ኑ ኤሮስ። ሃይሲ ኣዴዚ ኣዋፔ ዪዳኮኔ ኑ ኤሮኮ” ጊዳ።

³⁰ ኣዴዚካ ኢስታስ “ኢዚ ኣዋፔኮኔ ኢንቴ ኤሮንታይሲ ማላሊሴስ። ጊዶ ኣቲን ታ ኣይፌ ፄሊሲዳዴይ ኢዛ።

³¹ ፆሲ ባስ ያዪዛዴሲኔ ኢዛ ሼኔ ኦꬂዛዴስ ኣቲን ናጋራንቻ ኣስ ሲዮንታይሳ ኑ ኤሮስ።

³² ኣይፌ ቆቂዲ ዬሌቲዳዴ ኣይፌይ ፄሊዴስ ጊዛይሳ ኣላሜይ ሜꬌቶሳፔ ኦኒካ ሲዪ ኤሬና።

³³ ሃይሳዴይ ፆሳፌ ጊዶንታኮ ሃይሳ ኦꬃናስ ዳንዳዬና” ጊ ዛሪዴስ።

³⁴ ኢስቲካ ኢዛ “ኔኒ ኔስ ሙሌ ኣሳቴꬃይ ናጋራን ሙኑቄቲን ዬሌቲዳይሲ ኑና ታማርሳና ዋና ፃላዲ?” ጊዲ ኢዛ ጎዲዳ።

³⁵ ኣዴዛ ጎዲዳይሳ ዬሱሲ ሲይዴስ። ኢዛ ዴሚዲኔ “ኔ ኣሳ ናን ኣማናይ?” ጊዴስ።

³⁶ ኣዴዚካ “ጎዶ! ታ ኢዛን ኣማናና ማላ ኢዚ ኦኔ?” ጊዲ ኦይቺዴስ።

³⁷ ዬሱሲካ “ኔ ኢዛ ቤያዳሳ፤ ሃዒ ኔናራ ሃሳዪዛይ ኢዛኮ!” ጊዴስ።

³⁸ ኣዴዚካ “ጎዶ! ኢዛ ኣማናዲስ” ጊዲ ኢዛስ ሆኪ ጎይኒዴስ።

³⁹ ዬሱሲካ “ቆቄቲ ፄላና ማላኔ ፄሊዛይቲ ቆቃና ማላ ፒርዳናስ ታ ሃይሳ ሃ ኣላሜ ያዲስ” ጊዴስ።

² Iza kaallizayti iza “Astamaare! Hayssi addezi qooqe gidi yellettana mala nagara ooththiday oonnee? Iza yelidayti ooththidoyee? Izi ooththidee?” giidi Yesusa oychida.

³ Yesusikka istas “Iza gidinka iza yelidaytikka nagara ooththibetenna. Izi hessatho haniday Xoossa oosoy iza bolla qoncanassa.

⁴ Gallassara tana kiittidade ooso ooththanas taas bessees. Buro oonikka ooththanas dandayonta qammay yaana.

⁵ Ha biitta bolla diza wode ha Biittas poo7oy tana” gides.

⁶ Hessa gi simmidi biitta bolla cuch cuttidi ba cuchchan urqa shugisidi addeza ayfeza he urqa tiyidi,

⁷ “Baada Selihoomen asay xammaqettizason meeceta” gides. Selihoome guussi kiitettidayssa guussa. Addezikka biidi meecettidinne xeellishe simmi yides.

⁸ Iza dooththatinne kase izi heen woossishin beyida asay “Hayssadey kase uttidi woossiza addeza dennee?” gida.

⁹ Istafe issi issi asati “Ee izakko” gida. Baggayti “Iza deenna” gida. Izi qasse “Ta izakko” gides.

¹⁰ Istika “Histin ne ayfey waani xeellidee?” giidi oychida.

¹¹ Izikka zaaridi “Yesusa geetettiza asi biitta bolla urqa munuqidi ta ayfeza he urqa tiyidinne tana ‘Baada Selihoomen meeceta’ gi yootin ta baada meecetada xeellanas dandayadis” gides.

¹² Istika “Histin hessadey ha7i awan dizee?” gida. Izikka “Ta erike” gides.

¹³ Istika he kase ayfe qooqe addeza Farsaaweetakko efida.

¹⁴ Yesusi urqa munuqidi addeza ayfe pathida gallassay Ayhudata Sambata gallasa.

¹⁵ Hessa gish Farsaaweeti addeza izi wosti xeellidakkonne iza oychida. Addezikka zaaridi “Izi ta ayfen urqa tiyides; takka meecetadis; hekko ha7i xeelladis” gides.

¹⁶ Farsaaweetappe issi issi asati “Hayssi addezi Sambata bonchontadde gidida gish izi Xoossafe gidenna” gida. Baggay qasse “Nagaranchay hayssa mala malata waani ooththana dandayzee?” gida. Hessa gish ista giddon palamay medhettides.

¹⁷ Histin kase ayfe qooqe addezako simmidi “Ha ne ayfe pathida addeza gish ne ay gay?” gida. Addezi zaaridi “Izi nabekko!” gides.

¹⁸ Ayhudati addeza yelida aayeyranne aawara xeygisi ehisana gakkanaas addezi kase qooqe gididayssa ammanibetenna.

¹⁹ Istika yelidayta “Inte ‘nuus qooqe nay yeletides’ giza naazi hayssee? Histin ha7i waanidi xeellana dandayidee?” gida.

²⁰ Yelidaytikka hizgi zaarida “Izi nu naa gididayssanne qooqe gididi yeletidayssa eroos.

²¹ Ha7i qasse izi waani xeellana dandayidakkonne iza ayfe ooni pogidakkonne nu erokko. Izi bana dandayiddade gidida gish izi ba gish yootanas Dandayees; iza oychite” gida.

²² Iza yelidayti hessatho giday oonikka Yesusa izi Kirstoosa giidi markattiday wuri Ayhudata woossa keeththafe goodettana mala Ayhudati kase seera ooththida gish Ayhudatas babbidi gida.

²³ Hessa gish “Iza yelidayti izi bana dandayiddade gidida gish iza oychite” gida.

²⁴ Kase qooqe addeza qasseka xeygidi “Haysso ne tumayo yootada Xoossa boncha. Hayssi addezi nagarancha gididayssa nu eroos” gida.

²⁵ Izikka “Izi nagarancha gidin ta erike. Gido attin ta kase qooqe gididaronne qasse ha7i ta xeellizaro hanno xalla erays” gides.

²⁶ Isti qasse iza “Izi nees ay ooththidee? Ne ayfeza wosti pogidee?” giidi oychida

²⁷ Izikka “Ta intes kase yootin woznan woththi siybekketa shin ha7i qasse aazas zaarethi siyana koyetii? Inteka iza kaallizayta gidana koyetii?” gides.

²⁸ Hessafe guye iza “Nu Muse kaallizadenta; ne iza kaallizade gida.

²⁹ Kase Xoossi Musera haasayettidayssa nu eroos. Hayssi addezi awappe yidakkonne nu erokko” gida.

³⁰ Addezikka istas “Izi awappekkonne inte erontayssi malalises. Gido attin ta ayfe xeelisidadey iza.

³¹ Xoossi baas yayyizadessinne iza shene ooththizades attin nagarancha as siyontayssa nu eroos.

³² Ayfe qooqidi yeletidade ayfey xeellides gizayssa alamey medhetosappe oonikka siyi erenna.

³³ Hayssadey Xoossafe gidontakko hayssa ooththanas dandayenna” gi zaarides.

³⁴ Istika iza “Neni nees mule asatethay nagaran munuqetin yeletidayssi nuna tamarsana waana xaladii?” giidi iza goodida.

³⁵ Addeza goodidayssa Yesusi siydes. Iza demmidinne “Ne Asa Nan ammanay?” gides.

³⁶ Addezikka “Godo! Ta izan ammanana mala izi oonnee?” giidi oychides.

³⁷ Yesusikka “Ne iza beyadasa; ha7i nenara haasayizay izakko!” gides.

³⁸ Addezikka “Godo! Iza ammanadis” giidi izas hokki goynnides.

³⁹ Yesusikka “Qooqeti xeellana malanne xeellizayti qooqana mala pirdanas ta hayssa ha alame yadis” gides.