ዮሃኒሳ 8:34-57 in Gamo

³⁴ ዬሱሲካ ኢስታስ “ታ ኢንቴስ ቱሙ ጋይስ፤ ናጋራ ኦꬂዛዴይ ዉሪ ናጋራስ ኣይሌ፤

³⁵ ኣይ ዎዴካ ኣይሌይ ሶን ሉፂ ዴዔና። ዬሎይ ጊዲኮ ኣይዴካ ሶን ዴስ።

³⁶ ሂስቲኮ ናዚ ኢንቴና ዎዚኮ ኢንቴ ዎዜቲዳይታ ጊዳና።

³⁷ ኢንቴ ኣብራሃሜ ናይታ ጊዲዳይሳ ታ ኤራይስ። ጊዶ ኣቲን ታ ቃላ ኢንቴ ኤሮ ጊ ኤኮንታ ጊሽ ታና ዎꬋናስ ኮዬታ።

³⁸ ታኒ ታ ኣዋ ኣቻን ቤዪዳይሳ ኢንቴስ ዮታይስ። ኢንቴ ቃሴ ኢንቴ ኣዋፔ ሲዪዳይሳ ኦꬄታ” ጊዴስ።

³⁹ ኢስቲካ ኢዛስ “ኑ ኣዋይ ኣብራሃሜ” ጊዲ ዛሪ ዮቲን፥ ዬሱሲ ኢስታስ “ኢንቴ ኣብራሃሜ ና ጊዲዳኮ ኣብራሃሜꬆ ኦꬃና።

⁴⁰ ኢንቴ ጊዲኮ ታ ፆሳፌ ሲዪዳ ቱማ ኢንቴስ ዮቲን ታና ዎꬋናስ ጊፂ ዴንዲዴታ። ጊዶ ኣቲን ኣብራሃሜይ ሄሳꬆ ኦꬂቤና።

⁴¹ ኢንቴ ኢንቴ ኣዋꬆ ኦꬄታ” ጊዴስ። ኢስቲካ ዛሪዲ “ኑ ላይማን ዬሌቲዳ ና ጊዶኮ። ኑ ኣዋይ ኢሲ ፆሳ ፃላላ” ጊዲ ኢዛስ ዛሪዳ።

⁴² ዬሱሲ ኢስታስ “ኢንቴ ኣዋይ ፆሳ ጊዲዳኮ ታካ ፆሳፌ ኬዛ ዪዳ ጊሽ ኢንቴ ታና ዶሳናኮሺን፤ ታና ኢዚ ኪቲዴስ ኣቲን ታ ታርካ ታ ሼኔን ያቤኬ።

⁴³ ታ ዮቲዛይሳ ኣይስ ዩሺ ቆፔኬቲ? ጋሶይካ ኢንቴ ታ ቃላ ሲያና ኮዮንታ ጊሻሳ።

⁴⁴ ኢንቴ ኢንቴ ኣዋ ፃላዔ ናይታ፤ ኢንቴ ኣዋ ኣሞ ፖላና ኮዬታ፤ ኢዚ ካሴካ ሼምፖ ዎꬊዳዴ። ኢዛ ኣቻን ቱማይ ዶንታ ጊሽ ኢዚ ቱማን ኤቂቤና። ኢዚ ባ ሁዔስ ዎርዳንቻኔ ዎርዶ ኣዋ ጊዲዳ ጊሽ ኢዚ ዎርዶ ሃሳያ ባፔ ሜꬊ ኤኪዲ ሃሳዬስ።

⁴⁵ ታ ቃሴ ቱሙ ሃሳዪዛ ጊሽ ኢንቴ ታና ኣማኔኬታ።

⁴⁶ ኢንቴ ጊዶፌ ታና ኔ ሃኖ ናጋራ ኦꬃዳሳ ጊዲ ማርካራ ላꬃናስ ሞታና ዳንዳዪዛዴይ ዲዜ? ታ ቱሙ ሃሳዪዛዴ ጊዲኮ ሂስቲን ኣዛስ ታና ኣማኔኬቲ?

⁴⁷ ፆሳፌ ጊዲዳ ኣሲ ፆሲ ጊዛ ሲዬስ። ኢንቴ ጊዲኮ ፆሳፌ ጊዶንታ ጊሽ ፆሳ ቃላ ሲዬኬታ” ጊዴስ።

⁴⁸ ኣይሁዳቲካ ዛሪዲ “ኑ ኔና ኔ ‘ሳማሪያ ኣሳ፤ ኔ ቦላ ዳይዳንꬂ ዴስ’ ጊዳይስ ቱሙ ዴኔ?” ጊዳ።

⁴⁹ ዬሱሲ ኢስታስ “ታኒ ታ ኣዋ ቦንቻይስ ኣቲን ዳይዳንꬂ ታ ቦላ ባዋ። ኢንቴ ጊዲኮ ታና ካዉሼታ።

⁵⁰ ታኒ ታስ ቦንቾ ኮይኬ። ታ ቦንቼታና ማላ ኮዪዛዴይ ቃሴ ዴስ። ኢዚካ ፒርዳ ፒርዳናዴ።

⁵¹ ታ ኢንቴስ ቱሙ ጋይስ፤ ኦኒካ ታ ቃላ ናጊኮ ሃይቆ ሙሌካ ሃይቄና” ጊ ዛሪዴስ።

⁵² ኣይሁዳቲ ኢዛ “ኔ ቦላ ዳይዳንꬂ ዲዛይሳ ሃዒ ኑኒ ኤሪዶስ። ኣብራሃሜይ ሃይቂዴስ፤ ናቤቲካ ኢዛꬆ ሃይቂዳ። ኔ ቃሴ ‘ኦኒካ ሙሌ ሃይቆ ቤዬና’ ጋ ዮታሳ።

⁵³ ኔ ኑ ኣዋ ኣብራሃሜፔ ኣꬋይ? ኢዚ ሃይቂዴስ፤ ናቤቲካ ሃይቂዳ ሂስቲን ኔ ኔና ኦና ጋና ኮያዲ?” ጊዳ።

⁵⁴ ዬሱሲካ ኢስታስ “ታ ታርካ ታና ቦንቺኮ ታ ቦንቾይ ሃዳ። ታና ቦንቺዛዴይ ጊዲኮ ኢንቴ ‘ኢዚ ኑ ፆሳ’ ጊዛይ ታ ኣዋ።

⁵⁵ ኢንቴ ኢዛ ኤሮንታ ኣጊኮካ ታ ቃሴ ኤራይስ። ታ ኢዛ ኤሪኬ ጊኮ፥ ታካ ኢንቴ ማላ ዎርዳንቻ ጊዳይስ። ታ ቃሴ ኢዛ ኤራይስ፥ ኢዛ ቃላካ ናጋይስ።

⁵⁶ ኢንቴ ኣዋ ኣብራሃሜይ ታ ጋላስ ቤያናስ ኣሞቲዲ ቤይዴሲኔ ኡፋዬቲዴስ” ጊዴስ።

⁵⁷ ኣይሁዳቲ ቃሴ “ኔስ ቡሮ ኢቻሹ ታሙ ላይꬅ ኩሞንታ ኔኒ ኣብራሃሜ ቤያዲ?” ጊዳ።

³⁴ Yesusikka istas “Ta intes tumu gays; nagara ooththizadey wuri nagaras aylle;

³⁵ Ay wodekka aylley soon luxi dee7enna. Yeloy gidikko aydekka soon dees.

³⁶ Histikko naazi intena wozikko inte wozetidayta gidana.

³⁷ Inte Abrahaame nayta gididayssa ta erays. Gido attin ta qaala inte ero gi ekkonta gish tana wodhanas koyeeta.

³⁸ Tani ta Aawa achchan beyidayssa intes yootays. Inte qasse inte aawappe siyidayssa ooththeta” gides.

³⁹ Istika izas “Nu aaway Abrahaame” giidi zaari yootin, Yesusi istas “Inte Abrahaame naa gididakko Abrahaametho ooththana.

⁴⁰ Inte gidikko ta Xoossafe siyida tuma intes yootin tana wodhanas gixxi dendideta. Gido attin Abrahaamey hessatho ooththibeenna.

⁴¹ Inte inte aawatho ooththeta” gides. Istika zaaridi “Nu layman yeletida naa gidokko. Nu aaway issi Xoossa xalala” giidi izas zaarida.

⁴² Yesusi istas “Inte Aaway Xoossa gididakko takka Xoossafe keza yida gish inte tana dosanakkoshin; tana izi kiittides attin ta tarka ta shenen yabeekke.

⁴³ Ta yootizayssa ays yuushi qoppeketii? Gaasoyka inte ta qaala siyana koyonta gishassa.

⁴⁴ Inte inte aawa Xala7e nayta; Inte aawa amo polana koyeeta; izi kasekka shempo wodhidade. Iza achchan tumay doonta gish izi tuman eqqibenna. Izi ba hu7es wordanchanne wordo aawa gidida gish izi wordo haasaya bappe medhi ekkidi haasayees.

⁴⁵ Ta qasse tumu haasayiza gish inte tana ammanekketa.

⁴⁶ Inte giddofe tana ne hanno nagara ooththadasa giidi markara laththanas mootana dandayizadey dizee? Ta tumu haasayizade gidikko histin aazas tana ammanekketii?

⁴⁷ Xoossafe gidida asi Xoossi giza siyees. Inte gidikko Xoossafe gidonta gish Xoossa qaala siyekketa” gides.

⁴⁸ Ayhudatikka zaaridi “Nu nena ne ‘Samaariya asa; ne bolla daydanthi dees’ gidays tumu dennee?” gida.

⁴⁹ Yesusi istas “Tani ta Aawa bonchays attin daydanthi ta bolla baawa. Inte gidikko tana kawushsheeta.

⁵⁰ Tani taas boncho koykke. Ta bonchettana mala koyizadey qasse dees. Izikka pirda pirdanade.

⁵¹ Ta intes tumu gays; oonikka ta qaala naagikko hayqo mulekka hayqqenna” gi zaarides.

⁵² Ayhudati iza “Ne bolla daydanthi dizayssa ha7i nuni eridos. Abrahaamey hayqqides; nabetikka izatho hayqqida. Ne qasse ‘Oonikka mule hayqo beyenna’ ga yootasa.

⁵³ Ne nu aawa Abrahaameppe aadhdhay? Izi hayqqides; nabetikka hayqida histin ne nena oona gaana koyadii?” gida.

⁵⁴ Yesusikka istas “Ta tarka tana bonchikko ta bonchoy hada. Tana bonchizaddey gidikko inte ‘Izi nu Xoossa’ gizay ta Aawa.

⁵⁵ Inte iza eronta aggikkokka ta qasse erays. Ta iza erike giikko, takka inte mala wordancha gidays. Ta qasse iza erays, iza qaalakka naagays.

⁵⁶ Inte aawa Abrahaamey ta gallas beyanas amottidi beydessinne ufayetides” gides.

⁵⁷ Ayhudati qasse “Nees buro ichashu tammu layth kumonta neni Abrahaame beyadii?” gida.