ዮሃኒሳ 8:19-50 in Gamo

¹⁹ ኢስቲካ “ኔ ኣዋይ ኣዋን ዲዜ?” ጊዲ ኢዛ ኦይቺዳ። ዬሱሲካ ኢስታስ “ታና ጊዲን ታ ኣዋካ ጊዲን ኢንቴ ኤሬኬታ፤ ኢንቴ ታና ኤሪዛኮ ታ ኣዋካ ኤራናኮሺን” ጊዲ ኢስታስ ዛሪዴስ።

²⁰ ዬሱሲ ሄሳ ኢስታስ ዮቲዳይ ፆሳ ኬꬃ ጊቤን ሚሼ ዎꬂዛ ሳፂኔ ኣቻን ታማርሲሼ ዮቲዴስ ሺን ኢዛስ ኦይኬቲዛ ዎዴይ ጋኮንታ ጊሽ ኦኒካ ኢዛ ኦይኪቤና።

²¹ ዬሱሲ ቃሴካ “ታ ባና ሺን ኢንቴ ታና ኮያናኔ ኢንቴ ኢንቴ ናጋራራ ሃይቃና ኣቲን ታ ቢዛሶ ባና ዳንዳዬኬታ” ጊዴስ።

²² ኣይሁዳቲካ ባ ጊዶን ኢሶይ ኢሳራ ኢዚ “ ‘ታ ቢዛሶ ኢንቴ ባና ዳንዳዬኬታ’ ጊዛይ ባርካ ባና ዎꬋናሴሻ?” ጌቴቲዳ።

²³ ኢዚ ቃሴ ኢስታ “ኢንቴ ጋርሳ ኣሳ፤ ታኒ ቦላ ኣሳ፤ ኢንቴ ሃይሳ ኣላሜ ኣሳ፤ ታኒ ሃ ኣላሜፔ ጊዲኬ።

²⁴ ኢንቴ ታ ኦናኮኔ ኤሪዲ ኣማኖንታ ኣጊኮ ኢንቴ ኢንቴ ናጋራራ ሃይቃና ጊሽ ታ ኢንቴ ኢንቴ ናጋራራ ሃይቃና ጊዳይ ሄሳ ጊሻሳ” ጊዴስ።

²⁵ ኢስቲካ ኢዛ “ኔ ኦኔ?” ጊዳ። ዬሱሲካ ኢስታስ “ሃዒ ጋካናስ ታ ኢንቴስ ኢዛ ጊሽ ዮቲዛዴይ ታና።

²⁶ ታ ኢንቴ ቦላ ሃሳያናይሲኔ ፒርዳዛ ዮዖይ ዳሮይ ዴስ። ጊዶ ኣቲን ታና ኪቲዳዴይ ኣማኔቲዳዴ፤ ታካ ኢዛፔ ሲዪዳይሳ ሃ ኣላሜዛስ ዮታይስ” ጊዴስ።

²⁷ ኢዚ ኢስታስ ኣዋ ጊሽ ዮቲዛይሳ ኣኬኪቤቴና።

²⁸ ሄሳ ጊሽ ዬሱሲ “ኢንቴ ኣሳ ና ꬎቁ ሂስቲዲ ካቂዳ ዎዴ ታኒ ኢዛ ጊዳዴይ ታና ጊዲዳይሳ ኢንቴ ኤራና። ኣዋይ ታና ታማርሲዳይሳ ዮታዲስ ኣቲን ታኒ ታ ሼኔ ማላ ኣይኮካ ኦꬆንታይሳ ኢንቴ ኣኬካና።

²⁹ ታና ኪቲዳይሲ ኢዚ ታናራ ዴስ። ኣይ ዎዴካ ታ ኡፋይሲዛዝ ኦꬂዛ ጊሽ ኢዚ ታና ፃላላ ዬጊ ኣጊቤና” ጊዴስ።

³⁰ ኢዚ ሄሳ ዮቲዳ ማላ ዳሮ ኣሳይ ኢዛን ኣማኒዴስ።

³¹ ዬሱሲ ባና ኣማኒዳ ኣይሁዳታ “ኢንቴ ቱሙ ታ ቃላን ዲኮ ኢንቴ ቱማፔ ታና ካሊዛይታ ጊዳና።

³² ቱማይ ኣዛኮኔ ኢንቴ ኤራናኔ ቱማይካ ኢንቴና ዎዛና” ጊዴስ።

³³ ኢስቲካ ኢዛስ ዛሪዲ “ኑኒ ኣብራሃሜ ናይታኮ! ኑ ኦናስካ ኣይሌቲ ኤሮኮ። ሂስቲን ኔ ኑና ዋናዳ ኢንቴ ዎዜታና ጋይ?” ጊዳ።

³⁴ ዬሱሲካ ኢስታስ “ታ ኢንቴስ ቱሙ ጋይስ፤ ናጋራ ኦꬂዛዴይ ዉሪ ናጋራስ ኣይሌ፤

³⁵ ኣይ ዎዴካ ኣይሌይ ሶን ሉፂ ዴዔና። ዬሎይ ጊዲኮ ኣይዴካ ሶን ዴስ።

³⁶ ሂስቲኮ ናዚ ኢንቴና ዎዚኮ ኢንቴ ዎዜቲዳይታ ጊዳና።

³⁷ ኢንቴ ኣብራሃሜ ናይታ ጊዲዳይሳ ታ ኤራይስ። ጊዶ ኣቲን ታ ቃላ ኢንቴ ኤሮ ጊ ኤኮንታ ጊሽ ታና ዎꬋናስ ኮዬታ።

³⁸ ታኒ ታ ኣዋ ኣቻን ቤዪዳይሳ ኢንቴስ ዮታይስ። ኢንቴ ቃሴ ኢንቴ ኣዋፔ ሲዪዳይሳ ኦꬄታ” ጊዴስ።

³⁹ ኢስቲካ ኢዛስ “ኑ ኣዋይ ኣብራሃሜ” ጊዲ ዛሪ ዮቲን፥ ዬሱሲ ኢስታስ “ኢንቴ ኣብራሃሜ ና ጊዲዳኮ ኣብራሃሜꬆ ኦꬃና።

⁴⁰ ኢንቴ ጊዲኮ ታ ፆሳፌ ሲዪዳ ቱማ ኢንቴስ ዮቲን ታና ዎꬋናስ ጊፂ ዴንዲዴታ። ጊዶ ኣቲን ኣብራሃሜይ ሄሳꬆ ኦꬂቤና።

⁴¹ ኢንቴ ኢንቴ ኣዋꬆ ኦꬄታ” ጊዴስ። ኢስቲካ ዛሪዲ “ኑ ላይማን ዬሌቲዳ ና ጊዶኮ። ኑ ኣዋይ ኢሲ ፆሳ ፃላላ” ጊዲ ኢዛስ ዛሪዳ።

⁴² ዬሱሲ ኢስታስ “ኢንቴ ኣዋይ ፆሳ ጊዲዳኮ ታካ ፆሳፌ ኬዛ ዪዳ ጊሽ ኢንቴ ታና ዶሳናኮሺን፤ ታና ኢዚ ኪቲዴስ ኣቲን ታ ታርካ ታ ሼኔን ያቤኬ።

⁴³ ታ ዮቲዛይሳ ኣይስ ዩሺ ቆፔኬቲ? ጋሶይካ ኢንቴ ታ ቃላ ሲያና ኮዮንታ ጊሻሳ።

⁴⁴ ኢንቴ ኢንቴ ኣዋ ፃላዔ ናይታ፤ ኢንቴ ኣዋ ኣሞ ፖላና ኮዬታ፤ ኢዚ ካሴካ ሼምፖ ዎꬊዳዴ። ኢዛ ኣቻን ቱማይ ዶንታ ጊሽ ኢዚ ቱማን ኤቂቤና። ኢዚ ባ ሁዔስ ዎርዳንቻኔ ዎርዶ ኣዋ ጊዲዳ ጊሽ ኢዚ ዎርዶ ሃሳያ ባፔ ሜꬊ ኤኪዲ ሃሳዬስ።

⁴⁵ ታ ቃሴ ቱሙ ሃሳዪዛ ጊሽ ኢንቴ ታና ኣማኔኬታ።

⁴⁶ ኢንቴ ጊዶፌ ታና ኔ ሃኖ ናጋራ ኦꬃዳሳ ጊዲ ማርካራ ላꬃናስ ሞታና ዳንዳዪዛዴይ ዲዜ? ታ ቱሙ ሃሳዪዛዴ ጊዲኮ ሂስቲን ኣዛስ ታና ኣማኔኬቲ?

⁴⁷ ፆሳፌ ጊዲዳ ኣሲ ፆሲ ጊዛ ሲዬስ። ኢንቴ ጊዲኮ ፆሳፌ ጊዶንታ ጊሽ ፆሳ ቃላ ሲዬኬታ” ጊዴስ።

⁴⁸ ኣይሁዳቲካ ዛሪዲ “ኑ ኔና ኔ ‘ሳማሪያ ኣሳ፤ ኔ ቦላ ዳይዳንꬂ ዴስ’ ጊዳይስ ቱሙ ዴኔ?” ጊዳ።

⁴⁹ ዬሱሲ ኢስታስ “ታኒ ታ ኣዋ ቦንቻይስ ኣቲን ዳይዳንꬂ ታ ቦላ ባዋ። ኢንቴ ጊዲኮ ታና ካዉሼታ።

⁵⁰ ታኒ ታስ ቦንቾ ኮይኬ። ታ ቦንቼታና ማላ ኮዪዛዴይ ቃሴ ዴስ። ኢዚካ ፒርዳ ፒርዳናዴ።

¹⁹ Istika “Ne Aaway awan dizee?” giidi iza oychida. Yesusikka istas “Tana gidin ta aawakka gidin inte erekketa; inte tana erizako ta Aawakka eranakoshin” giidi istas zaarides.

²⁰ Yesusi hessa istas yootiday Xoossa Keeththa gibben miishe woththiza saaxine achchan tamarsishe yootides shin izas oyketiza wodey gakkonta gish oonikka iza oykkibeenna.

²¹ Yesusi qasseka “Ta baana shin inte tana koyananne inte inte nagarara hayqqana attin ta bizaso baana dandayekketa” gides.

²² Ayhudatikka ba giddon issoy issara izi “ ‘Ta bizaso inte baana dandayekketa’ gizay barka bana wodhanaseshaa?” geetettida.

²³ Izi qasse ista “Inte garsa asa; tani bolla asa; inte hayssa alame asa; tani ha alameppe gidikke.

²⁴ Inte ta oonakkonne eridi ammanonta aggikko inte inte nagarara hayqqana gish ta inte inte nagarara hayqqana giday hessa gishassa” gides.

²⁵ Istika iza “Ne oonnee?” gida. Yesusikka istas “Ha7i gakkanaas ta intes iza gish yootizadey tana.

²⁶ Ta inte bolla haasayanayssinne pirdaza yo7oy daroy dees. Gido attin tana kiittidadey ammanettidade; takka izappe siyidayssa ha alamezas yootays” gides.

²⁷ Izi istas Aawa gish yootizayssa akeekibettena.

²⁸ Hessa gish Yesusi “Inte Asa Naa dhoqu histidi kaqqida wode tani iza gidadey tana gididayssa inte erana. Aaway tana tamarsidayssa yootadis attin tani ta shene mala aykkokka ooththontayssa inte akeekana.

²⁹ Tana kiittidayssi izi tanara dees. Ay wodekka ta ufayssizaz ooththiza gish izi tana xalala yeggi aggibenna” gides.

³⁰ Izi hessa yootida mala daro asay izan ammanides.

³¹ Yesusi bana ammanida Ayhudata “Inte tumu ta qaalan diikko inte tumappe tana kaallizayta gidana.

³² Tumay aazakkone inte erananne tumaykka intena wozana” gides.

³³ Istika izas zaaridi “Nuni Abrahaame naytakko! Nu oonaska aylleti erokko. Histin ne nuna waanada inte wozettana gay?” gida.

³⁴ Yesusikka istas “Ta intes tumu gays; nagara ooththizadey wuri nagaras aylle;

³⁵ Ay wodekka aylley soon luxi dee7enna. Yeloy gidikko aydekka soon dees.

³⁶ Histikko naazi intena wozikko inte wozetidayta gidana.

³⁷ Inte Abrahaame nayta gididayssa ta erays. Gido attin ta qaala inte ero gi ekkonta gish tana wodhanas koyeeta.

³⁸ Tani ta Aawa achchan beyidayssa intes yootays. Inte qasse inte aawappe siyidayssa ooththeta” gides.

³⁹ Istika izas “Nu aaway Abrahaame” giidi zaari yootin, Yesusi istas “Inte Abrahaame naa gididakko Abrahaametho ooththana.

⁴⁰ Inte gidikko ta Xoossafe siyida tuma intes yootin tana wodhanas gixxi dendideta. Gido attin Abrahaamey hessatho ooththibeenna.

⁴¹ Inte inte aawatho ooththeta” gides. Istika zaaridi “Nu layman yeletida naa gidokko. Nu aaway issi Xoossa xalala” giidi izas zaarida.

⁴² Yesusi istas “Inte Aaway Xoossa gididakko takka Xoossafe keza yida gish inte tana dosanakkoshin; tana izi kiittides attin ta tarka ta shenen yabeekke.

⁴³ Ta yootizayssa ays yuushi qoppeketii? Gaasoyka inte ta qaala siyana koyonta gishassa.

⁴⁴ Inte inte aawa Xala7e nayta; Inte aawa amo polana koyeeta; izi kasekka shempo wodhidade. Iza achchan tumay doonta gish izi tuman eqqibenna. Izi ba hu7es wordanchanne wordo aawa gidida gish izi wordo haasaya bappe medhi ekkidi haasayees.

⁴⁵ Ta qasse tumu haasayiza gish inte tana ammanekketa.

⁴⁶ Inte giddofe tana ne hanno nagara ooththadasa giidi markara laththanas mootana dandayizadey dizee? Ta tumu haasayizade gidikko histin aazas tana ammanekketii?

⁴⁷ Xoossafe gidida asi Xoossi giza siyees. Inte gidikko Xoossafe gidonta gish Xoossa qaala siyekketa” gides.

⁴⁸ Ayhudatikka zaaridi “Nu nena ne ‘Samaariya asa; ne bolla daydanthi dees’ gidays tumu dennee?” gida.

⁴⁹ Yesusi istas “Tani ta Aawa bonchays attin daydanthi ta bolla baawa. Inte gidikko tana kawushsheeta.

⁵⁰ Tani taas boncho koykke. Ta bonchettana mala koyizadey qasse dees. Izikka pirda pirdanade.