ዮሃኒሳ 7:3-42 in Gamo

³ ሄሳ ጊሽ ዬሱሳ ኢሻቲ ኢዛኮ ሺቂዲ “ኔና ካሊዛይቲ ኔ ኦꬂዛ ኦሶዛ ቤያና ማላ ኔ ሃይሳፌ ዴንዳዳ ዩሁዳ ዴሬ ባ፤

⁴ ጋሶይካ ቆንጬን ኤሬታና ኮዪዛዴይ ባ ኦሶ ጌማን ኦꬄና። ኔካ ሃይታንታ ዉርሳ ኦꬃሼ ኔና ኣላሜን ቆንጪሳና ኮሼስ” ጊዳ።

⁵ ኢስቲ ሄሳ ጊዳ ጋሶይ ኢዛ ኢሻታካ ጊዲን ኢዛን ኣማኖንታይታ ጊዲዳ ጊሻሳ።

⁶ ዬሱሲካ ኢስታስ “ታ ዎዴይ ቡሮ ጋኪቤና፤ ኢንቴ ዎዴይ ጊዲኮ ኡባ ዎዴ ኢንቴስ ጊጋኮ።

⁷ ዴሬይ ኢንቴና ኢፃና ዳንዳዬና። ታና ጊዲኮ ኢፄስ፤ ጋሶይካ ታ ኣላሜ ኦሶይ ኢታ ጊዲዳይሳ ኢዛስ ማርካቲዛ ጊሻሳ።

⁸ ሃዒ ኢንቴ ጌዴ ባዓሌዛሶ ቢቴ። ታስ ዎዴይ ጋኮንታ ጊሽ ሃይሳ ሃ ባዓሌዛሶ ታ ቢኬ” ጊዴስ።

⁹ ሄሳ ጊዲ ዬሱሲ ጋሊላን ኣቲዴስ።

¹⁰ ጊዶ ኣቲን ኢዛ ኢሻቲ ባዓሌዛሶ ቢዳፔ ጉዬ ዬሱሲ ቆንጬራ ጊዶንታ ቆታራ ባዓሌዛሶ ቢዴስ።

¹¹ ኣይሁዳቲ “ኢዚ ኣዋን ዲዜ?” ጊሼ ባዓሌዛሶን ኮይዳ።

¹² ዴሬይካ ኢዛ ጊሽ ጊዶራ ሳሱኪ ሃሳዬቲዴስ። ኢሲ ኢሲ ኣሳቲ “ኢዚ ሎዖ ኣሳ” ጊሺን ባጋይ ቃሴ “ሎዖ ጊዴና። ኢዚ ዴሬ ባሌꬄስ” ጊዳ።

¹³ ጊዶ ኣቲን ኣይሁዳታ ዳናታስ ባቢዛ ጊሽ ኦኒካ ኢዛ ጊሽ ቆንጬን ሃሳይቤና።

¹⁴ ባዓሌዚ ዉራና ባጋ ጋኪሺን ዬሱሲ ፆሳ ኬꬄ ቢዲ ታማርሶ ኦይኪዴስ።

¹⁵ ኣይሁዳቲ “ሃይሲ ኣዴዚ ታማሮንታ ዲሼ ሃይሳ ዉርሲ ዎስቲ ኤሪዴ?” ጊዲ ማላሌቲዳ።

¹⁶ ሄሳ ጊሽ ዬሱሲ “ታ ታማርሲዛ ቲሚርቴይ ታና ኪቲዳ ታ ኣዋፔ ታስ ኢሜቲዴስ ኣቲን ታፔ ጊዴና።

¹⁷ ታና ኪቲዳይሳ ሼኔ ኦꬃና ኮዪዛዴይ ዲኮ ሃይሲ ሃ ቲሚርቴይ ፆሳፌ ቤቲዳይሳ ዎይኮ ታ ታፔ ሃሳይዳይሳ ጊዲኮካ ኤራና።

¹⁸ ባፔ ሃሳዪዛዴይ ባ ቦንቾ ኮዬስ። ኪቲዳዴ ቦንቾ ኮዪዛዴይ ጊዲኮ ኢዚ ቱማንቻ። ዎርዶይ ኢዛ ቦላ ዴና።

¹⁹ ሙሴይ ኢንቴስ ዎጋ ኢሚዴስ ጊዴኔ? ጊዲኮካ ኢንቴ ጊዶን ዎጋ ናጊ ፖሊዳዴይ ኦኒካ ዴና። ኢንቴ ኣዛስ ታና ዎꬋና ኮዬቲ?” ጊዴስ።

²⁰ ዴሬይካ ኢዛ “ኔ ቦላ ዳይዳንꬂ ዴስ! ኔና ዎꬋና ኮዪዛይ ኦኔ?” ጊዴስ።

²¹ ዬሱሲካ ኢስታስ “ታ ኢሲ ኦሶ ኦꬃዲስ፤ ኢንቴ ዉሪካ ሃኖ ሃ ኦሶይን ማላሌቴታ።

²² ሙሴይ ኢንቴስ ቃፃራ ዎጋ ኢሚዴስ፤ ሄ ዎጋይካ ኢሜቲዳይ ካሴ ኣዋታፔ ቤቲዴስ ኣቲን ሙሴፔ ጊዴና። ሂስቲን ሄኮ ኢንቴካ ሳምባታ ጋላሲካ ኣስ ቃፃሬታ።

²³ ሂስቲኮ ሙሴ ዎጋይ ሻሬቶንታ ማላ ኣሲ ሳምባታ ጋላስ ቃፃሬቲዛዝ ጊዲኮ ሂስቲን ታ ሳምባታ ጋላስ ኣሳስ ኩሜꬃ ኣሳቴꬅ ፓꬂን ኣዛስ ታ ቦላ ሃንቄቴቲ?

²⁴ ሱሬ ፒርዳ ፒርዲቴ ኣቲን ኣሳ ኣይፌሶ ፄሊዲ ማዶ ፒርዳ ፒርዶፍቴ” ጊ ዛሪዴስ።

²⁵ ዬሩሳላሜ ኣሳፔ ኢሲ ኢሲ ኣሳቲ “ኢስቲ ዎꬋና ኮዪዛ ኣዴዚ ሃይሳ ጊዴኔ?

²⁶ ሄኮ ኢዚ ቆንጬን ሃሳዬስ ሺን ኢስቲ ኢዛ ኣይኮካ ጊቤቴና። ሃይስ ፆሲ ኪቲዳዴ ጊዲዳይሳ ዳናቲ ቱሙ ኤሪዞሻ?

²⁷ ሂስቲን ሃይሲ ኣዴዚ ኣዋ ኣሳኮኔ ኑ ኤሮስ። ፆሲ ኪቲዳዴይ ዪሺን ቃሴ ኢዚ ኣዋፔኮኔ ኤሪዛዴይ ኦኒካ ዴና” ጊዳ።

²⁸ ሄሳ ጊሽ ዬሱሲ ፆሳ ኬꬃን ታማርሲሼ ባ ቃላ ꬎቁ ሂስቲዲ “ኢንቴ ታና ቱሙ ኤሬታ። ታ ኣዋፔ ዪዳኮኔ ኢንቴ ኤሬታ። ቃሴ ታኒ ታ ሼኔን ያቤኬ። ታና ኪቲዳይሲ ኢዚ ቱማንቻ። ጊዶ ኣቲን ኢንቴ ቃሴ ኢዛ ኤሬኬታ።

²⁹ ታ ጊዲኮ ኢዛ ኣቻፌ ዪዳ ጊሺኔ ኢዚ ታና ኪቲዳ ጊሽ ታ ኢዛ ኤራይስ” ጊዴስ።

³⁰ ሄሳ ዎዴ ኢዛ ኦይካናስ ኮይዳ፤ ጊዶ ኣቲን ቡሮ ዎዴይ ጋኪቤና ጊሽ ኦኒካ ኦይኪቤና።

³¹ ጊዲኮካ ዴሬዛፔ ዳሮይ ኢዛን ኣማኒዴስ። ኣሳይ “ፆሲ ኪቲዳዴይ ዪዛ ዎዴ ሃይሲ ኣዴዚ ኦሶ ማላታፔ ቦላራ ሃራ ኦꬃኔ?” ጊዴስ።

³² ኣሳይ ዬሱሳ ጊሽ ጋርሳራ ሳሱኬቲ ሃሳዬቲሺን ፋርሳዌቲ ሲዪዳ። ሄሳ ጊሽ ቄሴታ ሃላቃቲኔ ፋርሳዌቲ ዬሱሳ ኦይካናስ ፆሳ ኬꬃ ፔንጌ ናጊዛይታ ዬዲዳ።

³³ ሄ ዎዴ ዬሱሲ “ታ ኢንቴናራ ጉꬃ ዎዴ ዳሻና፤ ሄሳፌ ጉዬ ታና ኪቲዳይሳኮ ታ ሲማ ባና።

³⁴ ኢንቴ ታና ኮያና ሺን ዴሜኬታ። ኢንቴ ታ ዲዛሶ ያናስ ዳንዳዬኬታ” ጊዴስ።

³⁵ ሄሳ ጊሽ ኣይሁዳታ ዳናቲ ባ ጊዶን ኢሶይ ኢሳራ “ሃይሲ ኣዴዚ ኑ ዴሞንታ ማላ ኣዋ ባኔሻ? ኦኔ ኤሪዛይ ጊሪኬታ ጊዶ ላሌቲ ዲዛ ኣይሁዳታኮ ቢዲ ጊሪኬታ ታማርሳኔሻ?

³⁶ ኢዚ ‘ኢንቴ ታና ኮያና ሺን ዴሜኬታ፤ ታ ዲዛሶ ኢንቴ ያናስ ዳንዳዬኬታ’ ጊሺን ሄሲ ኣይ ጉሴ?” ጊዳ።

³⁷ ጊታ ባዓሌዛ ዉርሴꬃ ጋላስ ዬሱሲ ዴንዲ ኤቂዲኔ ባ ቃላ ꬎቁ ሂስቲዲ “ሃꬅ ሳሜቲዳዴይ ዲኮ ሃ ታኮ ዪዲ ኡዮ።

³⁸ ጌሻ ማፃፋይ ጊዳ ማላ ታና ኣማኒዛዴፌ ዴዖ ሃꬃ ፑልቶይ ፑልታና” ጊዴስ።

³⁹ ኢዚ ሄሳ ጊዳይ ኢዛን ኣማኒዛይቲ ቡሮፔ ኤካና ፂሎ ኣያና ጊሻሳ። ጋሶይካ ዬሱሲ ቦንቼቲዛ ዎዴይ ቡሮ ጋኮንታ ጊሽ ፂሎ ኣያናይ ኢሜቲቤና።

⁴⁰ ሄሳ ጊሽ ዴሬዛፔ ኢሲ ኢሲ ኣሳቲ ሄ ቃላ ሲይዲ “ያና ጊዛ ናቤይ ቱማፔ ሃይሳ” ጊዳ።

⁴¹ ሃራቲ “ሃይስ ፆሲ ኪቲዳዴ” ጊዳ። ባጋይቲ ቃሴ “ፆሲ ኪቲዳዴይ ጋሊላፔ ዋኒ ያኔ?

⁴² ፆሲ ኪቲዳዴይ ዳዉቴ ዜሬꬃፌ ዬሌታናይሳኔ ዳዉቴ ካታማ ቤቴሌሜፔ ያናይሲ ካሴ ጌሻ ማፃፋን ፃፌቲቤኔ?” ጊዳ።

³ Hessa gish Yesusa ishati izakko shiiqidi “Nena kaallizayti ne ooththiza oosoza beyana mala ne hayssafe dendada Yuhuda dere ba;

⁴ gaasoyka qoncen erettana koyizadey ba ooso geeman ooththenna. Nekka haytanta wursa ooththashe nena alamen qoncisana koshshees” gida.

⁵ Isti hessa gida gaasoy iza ishataka gidin izan ammanontayta gidida gishassa.

⁶ Yesusikka istas “Ta wodey buro gakkibeenna; inte wodey gidikko ubba wode intes giigakko.

⁷ Derey intena ixana dandayenna. Tana gidikko ixees; gaasoyka ta alame oosoy iita gididayssa izas markattiza gishassa.

⁸ Ha7i inte gede ba7aalezaso biite. Taas wodey gakkonta gish hayssa ha ba7aalezaso ta biikke” gides.

⁹ Hessa giidi Yesusi Galilan attides.

¹⁰ Gido attin iza ishati ba7aalezaso bidappe guye Yesusi qoncera gidonta qotara ba7aalezaso bides.

¹¹ Ayhudati “Izi awan dizee?” gishe ba7aalezason koyda.

¹² Dereyka iza gish giddora sasuki haasayettides. Issi issi asati “Izi lo7o asa” gishin baggay qasse “Lo7o gidenna. Izi dere baleththees” gida.

¹³ Gido attin Ayhudata daannatas babbiza gish oonikka iza gish qoncen haasaybenna.

¹⁴ Ba7aalezi wurana bagga gakkishin Yesusi Xoossa Keeththe biidi tamarso oykkides.

¹⁵ Ayhudati “Hayssi addezi tamaronta dishe hayssa wursi wosti eridee?” giidi malaletida.

¹⁶ Hessa gish Yesusi “Ta tamarsiza timirtey tana kiittida ta Aawappe taas imettides attin taappe gidenna.

¹⁷ Tana kiittidayssa shene ooththana koyizadey diikko hayssi ha timirtey Xoossafe beettidayssa woykko ta taappe hasaydayssa gidikkokka erana.

¹⁸ Bappe haasayizaddey ba boncho koyees. Kiittidade boncho koyizadey gidikko izi tumancha. Wordoy iza bolla deenna.

¹⁹ Musey intes woga immides gidennee? Gidikkoka inte giddon woga naagi polidadey oonikka deenna. Inte aazas tana wodhana koyetii?” gides.

²⁰ Dereyka iza “Ne bolla daydanthi dees! Nena wodhana koyizay oonnee?” gides.

²¹ Yesusikka istas “Ta issi ooso ooththadis; inte wurikka hanno ha oosoyn malaleteta.

²² Musey intes qaxara woga immides; he wogaykka imettiday kase aawatappe beettides attin Museppe gidenna. Histin hekko inteka Sambata gallasikka as qaxxareta.

²³ Histikko Muse wogay shaaretonta mala asi Sambata gallas qaxxaretizaz gidikko histin ta Sambata gallas asas kumeththa asateth pathin aazas ta bolla hanqettetii?

²⁴ Suure pirda pirdite attin asa ayfeso xeelidi maado pirda pirdofte” gi zaarides.

²⁵ Yerusalame asappe issi issi asati “Isti wodhana koyiza addezi hayssa gidenee?

²⁶ Hekko izi qoncen hasayes shin isti iza aykkokka gibeetenna. Hays Xoossi kiittidade gididayssa daannati tumu erizoshaa?

²⁷ Histin hayssi addezi awa asakkone nu eroos. Xoossi kiittidadey yishin qasse izi awappekkonne erizadey oonikka deenna” gida.

²⁸ Hessa gish Yesusi Xoossa Keeththan tamarsishe ba qaala dhoqu histidi “Inte tana tumu ereeta. Ta Aawappe yidakkonne inte ereeta. Qasse tani ta shenen yabeekke. Tana kiittidayssi izi tumancha. Gido attin inte qasse iza erekketa.

²⁹ Ta gidikko iza achchafe yida gishshinne izi tana kiittida gish ta iza erays” gides.

³⁰ Hessa wode iza oykkanas koyda; Gido attin buro wodey gakkibeenna gish oonikka oykkibeenna.

³¹ Gidikokka derezappe daroy izan ammanides. Asay “Xoossi kiittidadey yiza wode hayssi addezi ooso malatappe bollara hara ooththanee?” gides.

³² Asay Yesusa gish garsara sasuketi haasayettishin Farsaaweeti siyida. Hessa gish Qeeseta halaqatinne Farsaaweeti Yesusa oykkanas Xoossa Keeththa penge naagizayta yeddida.

³³ He wode Yesusi “Ta intenara guuththa wode daashshana; Hessafe guye tana kiittidayssako ta simma baana.

³⁴ Inte tana koyana shin demmekketa. Inte ta dizaso yaanas dandayekketa” gides.

³⁵ Hessa gish Ayhudata daannati ba giddon issoy issara “Hayssi addezi nu demmonta mala awa baaneshaa? Oone erizay Giriketa giddo laaletti diza Ayhudatakko biidi Giriketa tamarsaneshaa?

³⁶ Izi ‘Inte tana koyana shin demmekketa; Ta dizaso inte yaanas dandayekketa’ gishin hessi ay guussee?” gida.

³⁷ Gita ba7aaleza wursetha gallas Yesusi dendi eqqidinne ba qaala dhoqu histidi “Haath saamettidadey diikko ha taakko yiidi uyo.

³⁸ Geeshsha Maxaafay gida mala tana ammanizadefe de7o haaththa pultoy pultana” gides.

³⁹ Izi hessa giday izan ammanizayti buroppe ekkana Xillo Ayana gishassa. Gaasoyka Yesusi bonchettiza wodey buro gakkonta gish Xillo Ayanay imettibenna.

⁴⁰ Hessa gish derezappe issi issi asati he qaala siydi “Yaana giza nabey tumappe hayssa” gida.

⁴¹ Harati “Hays Xoossi kiittidade” gida. Baggayti qasse “Xoossi kiittidadey Galilappe waani yaanee?

⁴² Xoossi kiittidadey Dawute zerethafe yelettanayssanne Dawute katama Beetelemeppe yaanayssi kase Geeshsha Maxaafan xaafetibenee?” gida.