ዮሃኒሳ 6:52-71 in Gamo

⁵² ሄሳ ዎዴ ኣይሁዳቲ “ሃይሲ ኣዴዚ ኑ ኢዛ ኣሾ ማና ማላ ዎስቲ ኢማኔ?” ጊዲ ባ ጊዶን ፓላሜቲዳ።

⁵³ ሄሳ ጊሽ ዬሱሲ ኢስታ “ታ ኢንቴስ ቱሙ ጋይስ፤ ኣሳ ና ኣሾ ኢንቴ ሞንታ ኣጊኮ፥ ኢዛ ሱꬂካ ኡዮንታ ኣጊኮ ኢንቴስ ዴዖይ ዴና።

⁵⁴ ታ ኣሾ ሚዛዴሲኔ ታ ሱꬅ ኡዪዛዴስ ኡባስ ሜርና ዴዖይ ዴስ። ታካ ኢዛዴ ዉርሴꬃ ጋላስ ሃይቆፔ ዴንꬃና።

⁵⁵ ጋሶይካ ታ ኣሾይ ቱሙ ቁማ። ታ ሱꬃይካ ቱሙ ኡሻ።

⁵⁶ ታ ኣሾ ሚዛይኔ ታ ሱꬅ ኡዪዛይ ዉሪ ታናን ዳና። ታካ ኢዛዴን ዳና።

⁵⁷ ዴዖ ኣዋይ ታና ኪቲዳ ማላኔ ታካ ኢዛን ዴዖን ዲዛ ማላ ሄሳꬆካ ታ ኣሾ ሚዛዴይ ዉሪ ታናን ዴዖን ዳና።

⁵⁸ ሄሳ ጊሽ ሳሎፔ ዎꬊዳ ቁማይ ሃይሳ። ኢዚካ ካሴ ኢንቴ ኣዋቲ ሚዳይሳ ማላ ጊዴና። ጋሶይካ ሄ ቁማ ሚዳይቲ ሃይቂዳ። ሃ ቁማ ሚዛይቲ ጊዲኮ ሜርናስ ዳና” ጊዴስ።

⁵⁹ ዬሱሲ ሃይሳ ቂፊርናሆሜን ኣይሁዳታ ዎሳ ኬꬃን ታማርሲዛ ዎዴ ዮቲዴስ።

⁶⁰ ኢዛ ካሊዛይታፔ ዳሪዛይቲ ሄሳ ሲይዲ “ሃይሲ ዮዖዚ ዴፆ፤ ሃይሳ ኦኒ ኤካና ዳንዳዪዜ?” ጊዳ።

⁶¹ ዬሱሲካ ኢዛ ካሊዛይቲ ሄሳ ዮዖዛ ጊሽ ዙዙሜቲዳይሳ ባ ዎዝናን ኤሪዲ “ሃይሲ ኢንቴና ዴፂዜ?

⁶² ኣሳ ናይ ኪርስቶሲ ባ ዲዛሶ ሲሚ ኬዚሺን ቤይኮ ኢንቴ ኣይ ጋኔ?

⁶³ ኣሳስ ዴዖ ኢሚዛይ ፆሳ ኣያናኮ! ኣሳ ዎልቃይ ቃሴ ኣይኔ ጎዔና፤ ታ ኢንቴስ ዮቲዳ ቃላይ ዴዖ ኢሚዛ ኣያና።

⁶⁴ ጊዶ ኣቲን ኢንቴ ጊዶን ኢሲ ኢሲ ኣማኖንታ ኣሳቲ ዴቴስ” ጊዴስ። ዬሱሲ ኢስታስ ሄሳ ጊዳይ ኮይሮፔ ዶሚዲ ኢስታ ጊዶን ኣማኖንታይቲ ኦናንታኮኔ ቃሴ ኢዛ ኣꬂ ኢማናዴይካ ኦናኮኔ ኤሪዛ ጊሻሳ።

⁶⁵ ካሌꬂዲካ ዬሱሲ “ኣዋ ሼኔይ ባይንዳ ታኮ ሃ ያና ዳንዳዪዛዴይ ዴና ጋዳ ታ ኢንቴስ ዮቲዳይ ሄሳሳ” ጊዴስ።

⁶⁶ ሄሳፌ ዴንዲዳይሳን ኢዛ ካሊዛይታፔ ዳሮቲ ጉዬ ሲሚዳ። ሄ ጋላሳፌ ዶሚዲ ዬሱሳ ካሎ ኣጊዳ።

⁶⁷ ሄሳ ጊሽ ዬሱሲ ባና ካሊዛ ታማኔ ናምዓታ “ኢንቴካ ባና ኮዬቲ?” ጊዴስ።

⁶⁸ ሄሳ ዎዴ ሲሞና ጌቴቲዛ ጴፅሮሲ “ጎዶ ኔስ ሜርና ዴዖይ ቃላይ ዲሺን ኑ ኦናኮ ባኔ?

⁶⁹ ኔ ጌሻ ፆሳ ና ጊዲዳይሳ ኤሪዲ ኑኒ ኣማኒዶስ” ጊዴስ።

⁷⁰ ዬሱሲካ ኢስታ “ታ ኢንቴና ታማኔ ናምዓታ ዶራቤኪና? ሂስቲን ኢንቴፌ ኢሶይ ፃላዔ” ጊዴስ።

⁷¹ ኢዚ ሄሳ ጊዳይ ሲሞና ና ኣስቆሮንቶ ዩሁዳ ጊሻሳ። ኣይሲ ጊኮ ዩሁዳይ ታማኔ ናምዓታፔ ኢሳ ጊዲዳኮካ ዬሱሳ ኣꬂ ኢማናይ ኢዛ ጊዲዳ ጊሻሳ።

⁵² Hessa wode Ayhudati “Hayssi addezi nu iza asho maana mala wosti immanee?” giidi ba giddon palametida.

⁵³ Hessa gish Yesusi ista “Ta intes tumu gays; Asa Naa asho inte moonta aggikko, iza suuthikka uyonta aggikko intes de7oy deenna.

⁵⁴ Ta asho mizadessinne ta suuth uyizades ubbas merna de7oy dees. Takka izaade wursetha gallas hayqoppe denthana.

⁵⁵ Gaasoyka ta ashoy tumu quma. Ta suuthaykka tumu ushsha.

⁵⁶ Ta asho mizaynne ta suuth uyizay wuri tanan daana. Takka izaaden daana.

⁵⁷ De7o Aaway tana kiittida malanne takka izan de7on diza mala hessathoka ta asho mizadey wuri tanan de7on daana.

⁵⁸ Hessa gish saloppe wodhdhida qumay hayssa. Izikka kase inte aawati midayssa mala gidenna. Gaasoyka he quma midayti hayqqida. Ha quma mizayti gidikko mernas daana” gides.

⁵⁹ Yesusi hayssa Qifirnahoomen Ayhudata Woosa Keeththan tamarsiza wode yootides.

⁶⁰ Iza kaallizaytappe darizayti hessa siydi “Hayssi yo7ozi deexxo; hayssa ooni ekkana dandayizee?” gida.

⁶¹ Yesusikka iza kaallizayti hessa yo7oza gish zuuzumetidayssa ba woznan eridi “Hayssi intena deexizee?

⁶² Asa Nay Kirstoosi ba dizaso simmi kezishin beykko inte ay gaanee?

⁶³ Asas de7o immizay Xoossa Ayanakko! Asa wolqay qasse ayne go7enna; ta intes yootida qaalay de7o immiza ayana.

⁶⁴ Gido attin inte giddon issi issi ammanonta asati deettes” gides. Yesusi istas hessa giday koyroppe doommidi ista giddon ammanontayti oonantakkonne qasse iza aaththi immanaddeyka oonakkone eriza gishassa.

⁶⁵ Kaalethidikka Yesusi “Aawa sheney baynda taakko ha yaana dandayizaddey deenna gaada ta intes yootiday hessassa” gides.

⁶⁶ Hessafe dendidayssan iza kaallizaytappe daroti guye simmida. He gallassafe doommidi Yesusa kaallo aggida.

⁶⁷ Hessa gish Yesusi bana kaalliza tammanne nam7ata “Inteka baana kooyetii?” gides.

⁶⁸ Hessa wode Simoona geetettiza Phexroosi “Godo nees merna de7oy qaalay dishin nu oonakko baanee?

⁶⁹ Ne geeshsha Xoossa naa gididayssa eridi nuni ammanidos” gides.

⁷⁰ Yesusikka ista “Ta intena tammanne nam7ata doorabeekkinaa? Histin intefe issoy Xala7e” gides.

⁷¹ Izi hessa giday Simoona naa Asqoroonto Yuhuda gishassa. Ayssi giikko Yuhuday tammanne nam7atappe issa gididakkokka Yesusa aaththi immanay iza gidida gishassa.