ዮሃኒሳ 6:3-62 in Gamo

³ ዬሱሲ ባና ካሊዛይታራ ፑዴ ዙማ ቦላ ኬዚ ኡቲዴስ።

⁴ ሄ ዎዴ ኣይሁዳታ ፓዚጋ ባዓሌይ ማቲ ኡቲዴስ።

⁵ ሄ ዎዴ ዳሮ ዴሬይ ኢዛኮ ዪዛይሳ ዬሱሲ ꬎቁ ጊ ፄሊዲ ፒሊጶሳ “ሃይሳ ዴራስ ጊዳና ቁማ ኣዋፔ ሻማና ዳንዳዪዞኒ?” ጊዴስ።

⁶ ዬሱሲ ፒሊጶሳ ሄሳꬆ ኦይቺዳይ ኢዛ ፓጫናስ ጊዲፔ ኣቲን ኢዚ ባ ኦꬃናይሳ ኤሬስ።

⁷ ፒሊጶሲካ ኢዛስ “ኢሲ ኢሳዴስ ኢሲ ባርስ ጊዲዛ ካꬅ ሻሚዛኮካ ናምዑ ፄቱ ዲናሬን ሻሚዳ ካꬂካ ሃይሳስ ጊዴና” ጊዴስ።

⁸ ዬሱሳ ካሊዛይታፔ ኢሶይ ሲሞና ጴፅሮሳ ኢሻ ኢንዲራሲ፥

⁹ “ኢቻሹ ባንጋ ኡኬꬂኔ ናምዑ ሞሌ ኦይኪዳ ኢሲ ናይ ሃይሳን ዴስ። ጊዶ ኣቲን ሃና ሃይሳ ሃ ዴሬዛስ ኣይ ጊዳኔ?” ጊዴስ።

¹⁰ ዬሱሲካ ዛሪዲ “ኣሳ ኡባ ኡቲሲቴ” ጊዴስ። ሄን ጋዳን ዳሮ ማታይ ዲዛ ጊሽ ኣሳይ ኡቲዴስ። ኣሳ ቆዳይካ ኢቻሹ ሺ ጊዲዛዛ።

¹¹ ሄሳፌ ጉዬ ዬሱሲ ኡኬꬃ ኤኪዲ ጋላታ ዎሳ ዎሲዲ ኡቲዳ ኣሳስ ጊሺዴስ። ሞሌዛካ ሄሳꬆካ ጊሼቺዴስ። ኣሳይ ዉሪካ ባስ ጊዲዛዝ ዴሚዴስ።

¹² ኣሳይ ዉሪካ ካሊ ሚን ዬሱሲ ባና ካሊዛይታ “ማዳን ኣቲዳ ካꬃ ኢሲኖካ ኣሾንታ ሺሺቴ” ጊዴስ።

¹³ ኢስቲካ ኣሳይ ሚሺን ኢቻሹ ኡኬꬃፌ ኣቲዳ ታማኔ ናምዑ ሌማቴ ኩሜꬅ ሺሺዳ።

¹⁴ ኣሳቲካ ዬሱሲ ኦꬂዳ ማላታ ቤዪዲ “ሃይሳዴይ ቱማፔ ሃ ኣላሜ ያና ናቤዛኮ!” ጊዴስ።

¹⁵ ኣሳይ ቃሴ ዎልቃራ ዬሱሳ ካዎꬃና ቆፒዳይሳ ኤሪዲ ዬሱሲ ቃሴካ ኢስታፌ ሃኪ ቢዲ ዙማ ቦላ ኬዚዴስ።

¹⁶ ጋዴይ ቃሚሺን ዬሱሳ ካሊዛይቲ ዱጌ ኣባኮ ዎꬊዳ።

¹⁷ ዎጎሎን ጌሊዲ ቂፊርናሆሜ ባና ኬዚዳ። ኢስቲ ኬዚሺን ጋዴይ ꬉሚዴስ። ዬሱሲ ሄሳ ጋካናሲካ ኢስታኮ ዪቤና።

¹⁸ ዎልቃማ ጫርኮይ ጫርኪዛ ጊሽ ኣባይ ኬሂ ቃፂዴስ።

¹⁹ ኢዛ ካሊዛይቲ ባጋ ሳቴ ኦጌ ማላ ዎጎሎዛ ላጊዳፔ ጉዬ ዬሱሲ ኣባ ቦላራ ቶሆራ ሃሙቲ ዎጎሎዛኮ ማቲሺን ዴሚዲ ባቢዳ።

²⁰ ኢዚካ ኢስታስ “ታናኮ! ባቦፍቴ!” ጊዴስ።

²¹ ኢስቲካ ኢዛ ኡፋይሳራ ጌዴ ዎጎሎዛ ጊዶ ኤካና ኮይዳ። ሄራካ ዎጎሎዚካ ኢስቲ ባናሶ ጋኪዴስ።

²² ኣባፌ ሄ ፒንꬃን ኣቲዳ ኣሳይ ዎንቴꬃ ጋላስ ኣባ ቦላ ኢሲ ዎጎሎይ ፃላ ዲዛሮ ቤዪዴስ። ዬሱሳ ካሊዛይቲ ካሴ ባርካ ቢዳይሳኔ ዬሱሲ ኢስታራ ዎጎሎን ጌሎንታይሳ ኤሪዳ።

²³ ጊዶ ኣቲን ሃንኮ ዎጎሎቲ ፂቢራዶሴፔ ዴንዲዲ ዬሱሲ ጋላታ ዎሳ ዎሲን ኣሳይ ካꬃ ሚዳሶ ዪዳ።

²⁴ ኣሳቲካ ዬሱሲ ዎይኮ ኢዛ ካሊዛይቲ ሄን ባይንዳይሳ ቤዪዲ ሄ ዎጎሎታን ጌሊዲ ዬሱሳ ኮሽ ቂፊርናሆሜ ቢዴስ።

²⁵ ኣባፌ ሄ ፒንꬃን ኢዛ ዴሚዲ “ኣስታማሬ! ኔ ኣይዴ ሃይሳ ያዲ?” ጊዳ።

²⁶ ዬሱሲካ ኢስታስ “ታ ኢንቴስ ቱማ ጋይስ ኢንቴ ታና ኮዪዛይ ካꬅ ሚ ካሊዳ ጊሽ ኣቲን ማላታ ቤዪዳ ጊሽ ጊዴና።

²⁷ ꬋያና ካꬃስ ኦꬆፍቴ። ጊዶ ኣቲን ሄሳፌ ኣꬂዲ ፆሳ ኣዋይ ኣማንꬂዛ ማታሜ ኢዛ ቦላ ሾጪዳ ጊሽ ኣሳ ናይ ኢንቴስ ኢሚዛ ሜርና ዴዖስ ጊዲዛ ካꬃስ ኦꬂቴ” ጊዴስ።

²⁸ ኢስቲካ ኢዛ “ሂስቲን ፆሳ ኦሶ ኦꬃናስ ኑ ኣይ ኦꬂኖ?” ጊዳ።

²⁹ ዬሱሲካ “ፆሳ ኦሶይ ፆሲ ኪቲዳ ኢዛ ናዛን ኣማኖ” ጊዲ ኢስታስ ዛሪዴስ።

³⁰ ኢስቲካ ኢዛስ “ኑ ቤዪዲ ኔና ኣማናና ማላ ኔ ኑና ኣይ ማላታ ቤሳኔ? ቃሴካ ኣይ ኦꬃኔ?

³¹ ‘ኢስቲ ማና ማላ ኢስታስ ቁማ ሳሎፔ ኢሚዴስ’ ጌቴቲ ፃፌቲዳ ማላ ካሴ ኑ ኣዋቲ ባዞ ቢታን ማና ጌቴቲዛ ካꬅ ሚዳ” ጊዳ።

³² ዬሱሲ ኢስታስ “ታ ኢንቴስ ቱሙ ጋይስ፤ ሳሎፔ ዎꬊዳ ቁማ ኢንቴስ ኢሚዳይ ሙሴ ጊዴና። ቱሙ ቁማ ሳሎፔ ኢንቴስ ኢሚዛይ ታ ኣዋ።

³³ ጋሶይካ ፆሳ ቁማይ ሳሎፔ ዎꬊዲ ኣላሜስ ዴዖ ኢሚዛይሳ” ጊዴስ።

³⁴ ሄሳ ጊሽ ኣሳይ “ጎዶ ሄሳ ማላ ቁማ ኑስ ኡባ ዎዴ ኢማርኪ!” ጊዴስ።

³⁵ ዬሱሲካ ኢስታስ “ዴዖ ቁማይ ታና፤ ታኮ ዪዛ ኣሲ ሙሌካ ጋፌቴና፤ ታና ኣማኒዛዴይ ኣይዴካ ሳሜቴና።

³⁶ ካሴ ታ ኢንቴስ ጊዳ ማላ ኢንቴ ታና ቤይዴታ ሺን ኣማኒቤይኬታ።

³⁷ ታ ኣዋይ ታስ ኢሚዛይ ዉሪካ ታኮ ያና። ታኮ ዪዛዴ ታ ጌዴ ካሬ ጎዲኬ።

³⁸ ጋሶይካ ታ ሳሎፔ ዎꬊዳይ ታና ኪቲዳይሳ ሼኔ ኦꬃናስ ኣቲን ታ ሼኔ ኦꬃናስ ጊዴና።

³⁹ ታና ኪቲዳይሳ ሼኔይ ታስ ኢሚዳይታፔ ኢሳዴካ ꬋይሶንታ ዉርሴꬃ ጋላስ ታ ዴንꬃና።

⁴⁰ ኤ ታ ሼኔይ ናዛ ቤዪዲ ኢዛ ኣማኒዛዴይ ዉሪ ሜርና ዴዖ ዴማናሳ። ታኒካ ዉርሴꬃ ጋላስ ኢዛ ሃይቆፔ ዴንꬃና” ጊዴስ።

⁴¹ ሄሳ ጊሽ ዬሱሲ “ሳሎፔ ዎꬊዳ ቁማይ ታና” ጊዳ ጊሽ ኣይሁዳቲ ኢዛ ቦላ ዙዙሜቲዳ።

⁴² “ሃይሲ ዮሴፌ ና ዬሱሳ ጊዴኔ? ኢዛ ኣዋኔ ኢዛ ኣዮ ኑ ኤሮኮኒ? ሂስቲን ሃዒ ኢዚ ‘ሳሎፔ ዎꬋዲስ’ ዋኒ ጊዜ?” ጊዳ።

⁴³ ዬሱሲካ ኢስታስ “ኢንቴ ኢንቴ ጊዶን ዙዙሜታ።

⁴⁴ ታና ኪቲዳ ታ ኣዋይ ፄይጊዳዴፌ ኣቲን ታኮ ያና ዳንዳዪዛዴይ ኦኒካ ዴና። ባርካ ታኮ ያና ዳንዳዪዛይ ኦኒካ ዴና። ታኮ ዪዛዴካ ዉርሴꬃ ጋላስ ታ ኢዛ ሃይቆፔ ዴንꬃና።

⁴⁵ ናቤታ ማፃፋታን ኣሳይ ዉሪ ፆሳፌ ታማሪዳዴ ጊዳና ጌቴቲ ፃፌቲዴስ። ሄሳ ጊሽ ኣዋፔ ሲይዲ ታማሪዳ ኣሲ ዉሪ ታኮ ያና።

⁴⁶ ሄሳ ጉሲ ኣዋ ቤዪዳ ኣሲ ዴስ ጉሲ ጊዴና። ኣዋ ቤዪዳይ ፆሳ ኣቻፌ ዪዳይሳ ፃላ።

⁴⁷ ታ ኢንቴስ ቱማ ጋይስ፤ ታናን ኣማኒዳ ኣሳስ ሜርና ዴዖይ ዴስ።

⁴⁸ ታኒ ዴዖ ቁማ።

⁴⁹ ካሴ ኢንቴ ኣዋቲ ባዞ ቢታን ማና ሚዳ። ጊዶ ኣቲን ዉሪካ ሃይቂዳ።

⁵⁰ ሳሎፔ ዎꬊዳ ቁማይ ሃይሳ። ሃይሳ ሚዛዴይ ሙሌካ ሃይቄና።

⁵¹ ሳሎፔ ዎꬊዳ ዴዖ ቁማይ ታና። ሃይሳ ሃ ቁማፔ ሚዛዴይ ዉሪካ ሜርናስ ዳና። ኣላሜስ ዴዖ ጊዳና ማላ ታ ኢሚዛ ቁማይ ታ ኣሾዛ” ጊዴስ።

⁵² ሄሳ ዎዴ ኣይሁዳቲ “ሃይሲ ኣዴዚ ኑ ኢዛ ኣሾ ማና ማላ ዎስቲ ኢማኔ?” ጊዲ ባ ጊዶን ፓላሜቲዳ።

⁵³ ሄሳ ጊሽ ዬሱሲ ኢስታ “ታ ኢንቴስ ቱሙ ጋይስ፤ ኣሳ ና ኣሾ ኢንቴ ሞንታ ኣጊኮ፥ ኢዛ ሱꬂካ ኡዮንታ ኣጊኮ ኢንቴስ ዴዖይ ዴና።

⁵⁴ ታ ኣሾ ሚዛዴሲኔ ታ ሱꬅ ኡዪዛዴስ ኡባስ ሜርና ዴዖይ ዴስ። ታካ ኢዛዴ ዉርሴꬃ ጋላስ ሃይቆፔ ዴንꬃና።

⁵⁵ ጋሶይካ ታ ኣሾይ ቱሙ ቁማ። ታ ሱꬃይካ ቱሙ ኡሻ።

⁵⁶ ታ ኣሾ ሚዛይኔ ታ ሱꬅ ኡዪዛይ ዉሪ ታናን ዳና። ታካ ኢዛዴን ዳና።

⁵⁷ ዴዖ ኣዋይ ታና ኪቲዳ ማላኔ ታካ ኢዛን ዴዖን ዲዛ ማላ ሄሳꬆካ ታ ኣሾ ሚዛዴይ ዉሪ ታናን ዴዖን ዳና።

⁵⁸ ሄሳ ጊሽ ሳሎፔ ዎꬊዳ ቁማይ ሃይሳ። ኢዚካ ካሴ ኢንቴ ኣዋቲ ሚዳይሳ ማላ ጊዴና። ጋሶይካ ሄ ቁማ ሚዳይቲ ሃይቂዳ። ሃ ቁማ ሚዛይቲ ጊዲኮ ሜርናስ ዳና” ጊዴስ።

⁵⁹ ዬሱሲ ሃይሳ ቂፊርናሆሜን ኣይሁዳታ ዎሳ ኬꬃን ታማርሲዛ ዎዴ ዮቲዴስ።

⁶⁰ ኢዛ ካሊዛይታፔ ዳሪዛይቲ ሄሳ ሲይዲ “ሃይሲ ዮዖዚ ዴፆ፤ ሃይሳ ኦኒ ኤካና ዳንዳዪዜ?” ጊዳ።

⁶¹ ዬሱሲካ ኢዛ ካሊዛይቲ ሄሳ ዮዖዛ ጊሽ ዙዙሜቲዳይሳ ባ ዎዝናን ኤሪዲ “ሃይሲ ኢንቴና ዴፂዜ?

⁶² ኣሳ ናይ ኪርስቶሲ ባ ዲዛሶ ሲሚ ኬዚሺን ቤይኮ ኢንቴ ኣይ ጋኔ?

³ Yesusi bana kaallizaytara pude zuma bolla kezi uttides.

⁴ He wode Ayhudata Paaziga ba7aaley mati uttides.

⁵ He wode daro derey izakko yizayssa Yesusi dhoqu gi xeelidi Piliphoosa “Hayssa deraas gidana quma awappe shammana dandayizonii?” gides.

⁶ Yesusi Piliphoosa hessatho oychiday iza paacanas giidippe attin izi ba ooththanayssa erees.

⁷ Piliphoosikka izas “Issi issades issi bars gidiza kath shamizakkokka nam7u xeetu dinaren shammida kaththikka hayssas gidenna” gides.

⁸ Yesusa kaallizaytappe issoy Simoona Phexroosa isha Indiraassi,

⁹ “Ichashu banga ukethinne nam7u mole oykkida issi nay hayssan dees. Gido attin hanna hayssa ha derezas ay gidanee?” gides.

¹⁰ Yesusikka zaaridi “Asa ubba uttissite” gides. Heen gadaan daro maatay diza gish asay uttides. Asa qoodaykka ichashu shi gidizaza.

¹¹ Hessafe guye Yesusi uketha ekkidi galata woossa woossidi uttida asas gishides. Molezakka hessathoka gishechchides. Asay wurikka baas gidizaz demmides.

¹² Asay wurikka kalli min Yesusi bana kaallizayta “Maaddan attida kaththa issinoka ashshonta shiishshite” gides.

¹³ Istika asay mishin ichashu ukethafe attida tammanne nam7u leemate kumeth shiishida.

¹⁴ Asatikka Yesusi ooththida malata beyidi “Hayssadey tumappe ha alame yaana nabezakko!” gides.

¹⁵ Asay qasse wolqara Yesusa kawoththana qoppidayssa eridi Yesusi qasseka istafe haakki biidi zuma bolla kezides.

¹⁶ Gadey qammishin Yesusa kaallizayti duge abbako wodhdhida.

¹⁷ Wogolon gelidi Qifirnahoome baana kezida. Isti kezishin gadey dhumides. Yesusi hessa gakkanaasikka istako yibenna.

¹⁸ Wolqama carkoy carkiza gish abbay keehi qaaxides.

¹⁹ Iza kaallizayti bagga saate oge mala wogoloza laagidappe guye Yesusi abba bollara tohora hamutti wogolozakko matishin demmidi babbida.

²⁰ Izikka istas “Tanakko! Babbofte!” gides.

²¹ Istika iza ufayssara gede wogoloza giddo ekkana koyda. Heerakka wogolozikka isti baanaso gakkides.

²² Abbafe he pinthan attida asay wontetha gallas abba bolla issi wogoloy xalla dizaaro beyides. Yesusa kaallizayti kase barka bidayssanne Yesusi istara wogolon gelontayssa erida.

²³ Gido attin hanko wogoloti Xibiraadooseppe dendidi Yesusi galata woossa woossin asay kaththa midaso yida.

²⁴ Asatika Yesusi woykko iza kaallizayti heen bayndayssa beyidi he wogolotan gelidi Yesusa kosh Qifirnahoome bides.

²⁵ Abbafe he pinthan iza demmidi “Astamare! Ne ayde hayssa yadii?” gida.

²⁶ Yesusikka istas “Ta intes tuma gays inte tana koyizay kath mi kaallida gish attin malata beyida gish gidenna.

²⁷ Dhayana kaththas ooththofte. Gido attin hessafe aaththidi Xoossa aaway ammanthiza maatame iza bolla shocida gish Asa Nay intes immiza merna de7os gidiza kaththas ooththite” gides.

²⁸ Istika iza “Histin Xoossa ooso ooththanas nu ay ooththinoo?” gida.

²⁹ Yesusikka “Xoossa oosoy Xoossi kiittida iza naazan ammano” giidi istas zaarides.

³⁰ Istika izas “Nu beyidi nena ammanana mala ne nuna ay malata bessanee? Qasseka ay ooththanee?

³¹ ‘Isti maana mala istas quma saloppe immides’ geetetti xaafetida mala kase nu aawati bazzo biittan manna geetettiza kath mida” gida.

³² Yesusi istas “Ta intes tumu gays; saloppe wodhdhida quma intes immiday Muse gidenna. Tumu quma saloppe intes immizay ta Aawa.

³³ Gaasoyka Xoossa qumay saloppe wodhdhidi alames de7o immizayssa” gides.

³⁴ Hessa gish asay “Godo hessa mala quma nuus ubba wode immarki!” gides.

³⁵ Yesusikka istas “De7o qumay tana; taakko yiza asi mulekka gafettenna; tana ammanizadey aydekka saametenna.

³⁶ Kase ta intes gida mala inte tana beydeta shin ammanibeeyketa.

³⁷ Ta Aaway taas immizay wurikka taakko yaana. Taakko yizade ta gede kare goodikke.

³⁸ Gaasoyka ta saloppe wodhdhiday tana kiittidayssa shene ooththanas attin ta shene ooththanas gidenna.

³⁹ Tana kiittidayssa sheney taas immidaytappe issadeka dhayssonta wursetha gallas ta denthana.

⁴⁰ Ee ta sheney naaza beyidi iza ammanizadey wuri merna de7o demmanassa. Tanikka wurseththa gallas iza hayqoppe denthana” gides.

⁴¹ Hessa gish Yesusi “Saloppe wodhdhida qumay tana” gida gish Ayhudati iza bolla zuuzumettida.

⁴² “Hayssi Yoosefe naa Yesusa gidenee? Iza aawanne iza aayo nu erokkonii? Histin ha7i izi ‘Saloppe wodhdhadis’ waani gizee?” gida.

⁴³ Yesusikka istas “Inte inte giddon zuuzumeta.

⁴⁴ Tana kiittida ta Aaway xeygidadefe attin taakko yaana dandayizaddey oonikka deenna. Barka taakko yaana dandayizay oonikka deenna. Taakko yizadekka wursetha gallas ta iza hayqoppe denthana.

⁴⁵ Nabeta maxaafatan asay wuri Xoossafe tamaridade gidana geetetti xaafetides. Hessa gish Aawappe siydi tamarida asi wuri taakko yaana.

⁴⁶ Hessa gussi aawa beyida asi dees gussi gidenna. Aawa beyiday Xoossa achchafe yidayssa xalla.

⁴⁷ Ta intes tuma gays; tanan ammanida asas merna de7oy dees.

⁴⁸ Tani de7o quma.

⁴⁹ Kase inte aawati bazzo biittan manna mida. Gido attin wurikka hayqqida.

⁵⁰ Saloppe wodhdhida qumay hayssa. Hayssa mizadey mulekka hayqqenna.

⁵¹ Saloppe wodhdhida de7o qumay tana. Hayssa ha qumappe mizadey wurikka mernas daana. Alames de7o gidana mala ta immiza qumay ta ashoza” gides.

⁵² Hessa wode Ayhudati “Hayssi addezi nu iza asho maana mala wosti immanee?” giidi ba giddon palametida.

⁵³ Hessa gish Yesusi ista “Ta intes tumu gays; Asa Naa asho inte moonta aggikko, iza suuthikka uyonta aggikko intes de7oy deenna.

⁵⁴ Ta asho mizadessinne ta suuth uyizades ubbas merna de7oy dees. Takka izaade wursetha gallas hayqoppe denthana.

⁵⁵ Gaasoyka ta ashoy tumu quma. Ta suuthaykka tumu ushsha.

⁵⁶ Ta asho mizaynne ta suuth uyizay wuri tanan daana. Takka izaaden daana.

⁵⁷ De7o Aaway tana kiittida malanne takka izan de7on diza mala hessathoka ta asho mizadey wuri tanan de7on daana.

⁵⁸ Hessa gish saloppe wodhdhida qumay hayssa. Izikka kase inte aawati midayssa mala gidenna. Gaasoyka he quma midayti hayqqida. Ha quma mizayti gidikko mernas daana” gides.

⁵⁹ Yesusi hayssa Qifirnahoomen Ayhudata Woosa Keeththan tamarsiza wode yootides.

⁶⁰ Iza kaallizaytappe darizayti hessa siydi “Hayssi yo7ozi deexxo; hayssa ooni ekkana dandayizee?” gida.

⁶¹ Yesusikka iza kaallizayti hessa yo7oza gish zuuzumetidayssa ba woznan eridi “Hayssi intena deexizee?

⁶² Asa Nay Kirstoosi ba dizaso simmi kezishin beykko inte ay gaanee?