ዮሃኒሳ 5:31-47 in Gamo

³¹ ታኒ ታ ጊሽ ታርካ ማርካቲኮ ታ ማርካይ ቱሙ ጊዴና።

³² ጊዶ ኣቲን ታ ጊሽ ማርካቲዛዴይ ሃራይ ዴስ። ኢዚካ ታ ጊሽ ማርካቲዛዴ ማርካቴꬃይ ቱሙ ጊዲዳይሳ ታ ኤራይስ።

³³ ኢንቴ ዮሃኒሳኮ ኣሴ ኪቲዴታ ሺን ኢዚካ ቱሙ ማርካቲዴስ።

³⁴ ታ ሃይሳ ጊዛይ ኢንቴ ኣታና ማላ ኣቲን ታስ ሃራ ማርካቴꬅ ኮሺዳ ጊሽ ጊዴና።

³⁵ ዮሃኒሲ ኤፂዲ ፖዒሲዛ ፖዖ ማላ። ኢንቴካ ጉꬃ ዎዴ ኢዛ ፖዖን ኡፋዬታና ኮዪዴታ።

³⁶ ታስ ጊዲኮ ዮሃኒሳ ማርካቴꬃፌ ኣꬊዛ ማርካይ ዴስ። ታ ማርካይካ ታ ኣዋይ ታስ ኢሚዳ ኦሶ። ሄሲካ ታ ኦꬂዛ ኦሶይ ታ ኣዋይ ታና ኪቲዳይሳ ታስ ማርካቴስ።

³⁷ ታና ኪቲዳ ታ ኣዋይካ ባ ሁዔራ ታስ ማርካቲዴስ። ኢንቴ ጊዲኮ ኢዛ ቃላ ጊሪስ ሙሌካ ሲይቤይኬታ። ኢዛስ ሜꬋካ ሙሌራ ቤይቤኬታ።

³⁸ ኢዚ ኪቲዳዴን ኢንቴ ኣማኖንታ ጊሽ ኢዛ ቃላይ ኢንቴ ኣቻን ዴና።

³⁹ ኢንቴስ ጌሻ ማፃፋታፔ ሜርና ዴዖ ዴማናስ ሚሳቲን ማፃፋታ ፒሊጌታ፤ ማፃፋቲካ ታ ጊሽ ማርካቴቴስ።

⁴⁰ ጊዶ ኣቲን ኢንቴ ዴዖ ዴማናስ ታኮ ሃ ያና ኮዬኬታ።

⁴¹ “ታ ኣሳፔ ቦንቾ ኮዪኬ።

⁴² ታ ኢንቴና ኤራይስ፤ ፆሳ ሲቆይ ኢንቴናን ባይንዳይሳካ ኤራይስ።

⁴³ ታኒ ታ ኣዋ ሱንꬃን ያዲስ ሺን ኢንቴ ታና ሞኪ ኤኪቤኬታ። ሃራ ኣሲ ቃሴ ባ ሱንꬃን ዪኮ ኢንቴ ኢዛ ሞኪ ኤኬታ።

⁴⁴ ኢንቴ ኢንቴ ጊዶን ኢሶይ ኢሳፌ ቦንቾ ኮዪዛይቶ! ኢሲ ፆሳፌ ቤቲዛ ቦንቾ ኮዮንታይቶ ኢንቴ ዋኒዲ ታና ኣማናና ዳንዳዬቲ?

⁴⁵ ታ ኣዋ ሲንꬃን ኢንቴና ሞታናይ ኢንቴስ ታና ሚሳቶፖ። ኢንቴና ሞታናይ ኢንቴ ኢዛ ሂዶታ ኦꬂዛ ሙሴ፤

⁴⁶ ሙሴይ ታ ጊሽ ፃፊዳይሳ ኣማኒዳኮ ኢንቴ ታና ኣማናና።

⁴⁷ ኢዚ ፃፊዳይሳ ኢንቴ ኣማኖንታ ኣጊኮ ቃሴ ታ ቃላ ኢንቴ ዋኒ ኣማናኔ?” ጊዴስ።

³¹ Tani ta gish tarka markattikko ta markay tumu gidenna.

³² Gido attin ta gish markattizadey haray dees. Izikka ta gish markatizade markatethay tumu gididayssa ta erays.

³³ Inte Yohannisakko ase kiittideta shin izikka tumu markatides.

³⁴ Ta hayssa gizay inte attana mala attin taas hara markateth koshshida gish gidenna.

³⁵ Yohannisi eexidi poo7isiza poo7o mala. Inteka guutha wode iza poo7on ufayettana koyideta.

³⁶ Taas gidikko Yohannisa markatethafe aadhdhiza markay dees. Ta markaykka ta Aaway taas immida ooso. Hessika ta ooththiza oosoy ta Aaway tana kiittidayssa taas markatees.

³⁷ Tana kiittida ta Aawayka ba hu7era taas markatides. Inte gidikko iza qaala giiris mulekka siybeeykketa. Izas medhaaka mulera beybeekketa.

³⁸ Izi kiittidaden inte ammanonta gish iza qaalay inte achchan deenna.

³⁹ Intes Geeshsha Maxaafatappe merna de7o demmanas misatin maxaafata piligeeta; maxaafatikka ta gish markattettes.

⁴⁰ Gido attin inte de7o demmanas taakko ha yaana koyekketa.

⁴¹ “Ta asappe boncho koyikke.

⁴² Ta intena erays; Xoossa siiqoy intenan bayndayssakka erays.

⁴³ Tani ta Aawa sunthan yadis shin inte tana mokki ekkibeekketa. Hara asi qasse ba sunthan yiikko inte iza mokki ekkeeta.

⁴⁴ Inte inte giddon issoy issafe boncho koyizayto! Issi Xoossafe beettiza boncho koyontayto inte waanidi tana ammanana dandayetii?

⁴⁵ Ta Aawa sinthan intena mootanay intes tana misatoppo. Intena mootanay inte iza hidota ooththiza Muse;

⁴⁶ Musey ta gish xaafidayssa ammanidakko inte tana ammanana.

⁴⁷ Izi xaafidayssa inte ammanonta aggikko qasse ta qaala inte waani ammananee?” gides.