ዮሃኒሳ 5:3-20 in Gamo

³ ዳሮ ሃርጋንቻቲ፥ ኣይፌ ቆቄቲ፥ ቶሆ ዎቤቲኔ ቶሆ ሲላቲ ኦጌ ቦላ ኢቺዲ ሃꬃይ ቃፄታና ጋካናስ ናጌቴስ።

⁴ ኢሲ ኢሲ ዎዴ ጎዳ ኪታንቻይ ሃꬃን ዎꬊዲ ሃꬃ ቃꬄስ። ሃꬃ ቃꬃፌ ካሊዲ ኮይሮቲዲ ሃꬃን ጌሊዛ ሃርጋንቻይ ባና ሳኪዛ ኣይ ሃርጌፌካ ፓፄስ።

⁵ ሄን ጋዳን ሄꬑ ታማኔ ኦሱፑን ላይꬅ ኩሜꬅ ሳኬቲዳ ኢሳዴይ ዴስ።

⁶ ዬሱሲ ኣዴዛ ሄን ኢቺዳይሳ ቤዪዲኔ ኢዚ ዳሮ ላይꬅ ሳኬቲዳይሳ ኤሪዲ “ኔ ፓፃና ኮያይ?” ጊዴስ።

⁷ ሃርጋንቻዚካ ዛሪዲ “ጎዶ! ሃꬃይ ቃፄቲዛ ዎዴ ታና ሃꬃን ጌልꬂዛ ኣሲ ዴና፤ ታ ቡሮ ባና ጊሺን ሃራይ ታፔ ካሴቲ ሃꬃን ጌሌስ” ጊዴስ

⁸ ዬሱሲካ ኢዛ “ዴንዳ! ኔ ኢቺዳ ኣልጋ ቶካዳ ባ!” ጊዴስ።

⁹ ኣዴዚካ ሄራካ ፓፂዴስ። ባ ኣልጋ ቶኪ ኤኪዲ ቢዴስ። ሄሲ ሃኒዳይ ኣይሁዳታ ሳምባታ ጋላሳ።

¹⁰ ሄሳ ጊሽ ኣይሁዳታ ሃላቃቲ ፓፂዳ ኣዴዛ “ሃች ሳምባታራ ኔ ኣልጋ ቶካና ማላ ሙሴ ዎጋይ ኣዛዜና” ጊዳ።

¹¹ ኢዚካ ኢስታስ “ ‘ኔ ኢቺዳ ኣልጋ ቶካዳ ባ’ ጊ ዮቲዴስ” ጊዴስ።

¹² ኢስቲካ “ኔና ኣልጋ ቶካዳ ባ ጊዳይ ኦኔ?” ጊ ኦይቺዳ።

¹³ ዴሬይ ዳሪዳ ጊሺኔ ዬሱሲ ሄፔ ሃኪ ቢዳ ጊሽ ኢዛ ኦኒ ፓꬂዳኮኔ ኣዴዚ ኤሪቤና።

¹⁴ ሄሳፌ ጉዬ ዬሱሲ ኣዴዛ ፆሳ ኬꬃን ዴሚዲ “ሄኮ ሃዒ ኔ ፓፃዳሳ፤ ካሴይሳፌ ኣꬊዛ ኢታ ሚሺ ኔ ቦላ ጋኮንታ ማላ ናምዓንꬆ ናጋራ ኦꬆፋ” ጊዴስ

¹⁵ ኣዴዚካ ቢዲኔ ኢዛ ፓꬂዳይ ዬሱሳ ጊዲዳይሳ ኣይሁዳታ ሃላቃታስ ዮቲዴስ።

¹⁶ ኣዴዛ ሳምባታ ጋላስ ፓꬂዳ ጊሽ ኣይሁዳታ ዳናቲ ዬሱሳ ኦይካና ዬዴꬂዳ።

¹⁷ ዬሱሲካ ኢስታስ “ታ ኣዋይ ኡባ ዎዴ ኦꬄስ፥ ታካ ኦꬃና” ጊዴስ፤

¹⁸ ሄሳ ጋሶን ኣይሁዳታ ዳናቲ ዬሱሳ ዎꬋና ማላ ካሴፔ ኣꬂ ዴንꬄꬂዳ። ቃሴ ኢዚ ሳምባታ ሞሪዳ ጊሽ ፃላ ጊዶንታ “ፆሲ ታ ኣዋ” ጊዳ ጊሺኔ ባና ፆሳራ ጊኒሲዳ ጊሻሳ።

¹⁹ ዬሱሲ ኢስታስ “ታ ኢንቴስ ቱሙ ጋይስ፤ ኣዋይ ኦꬂሺን ቤዪዳይሳ ኦሶፔ ኣቲን ናዚ ባ ሼኔን ኣይኔ ኦꬄና። ኣዋይ ኦꬂዛይሳ ኢዛ ናይ ሄሳꬆካ ኦꬄስ።

²⁰ ጋሶይካ ኣዋይ ናዛ ዶሴስ። ባ ኦꬂዛይሳካ ዉርሲ ኢዛ ቤሴስ፤ ኢንቴ ማላሌታና ማላ ሃይሳፌካ ኣꬊዛ ኦሶ ቡሮ ቤሳና።

³ Daro harganchati, ayfe qooqeti, toho wobetinne toho silati oge bolla ichchidi haaththay qaaxettana gakkanaas naagetes.

⁴ Issi issi wode Goda kiitanchay haaththan wodhdhidi haaththa qaathees. Haatha qaathafe kaallidi koyrottidi haaththan geliza harganchay bana sakiza ay hargefekka paxees.

⁵ Heen gadaan heedzdzu tammanne osupun layth kumeth saketida issadey dees.

⁶ Yesusi addeza heen ichchidayssa beyidinne izi daro layth saketidayssa eridi “Ne paxana koyay?” gides.

⁷ Harganchazikka zaaridi “Godo! Haaththay qaaxetiza wode tana haaththan gelthiza asi deenna; ta buro baana gishin haray taappe kaseti haaththan geeles” gides

⁸ Yesusikka iza “Denda! ne ichchida alga tookkada ba!” gides.

⁹ Addezikka heerakka paxides. Ba alga tookki ekkidi bides. Hessi haniday Ayhudata Sambata gallassa.

¹⁰ Hessa gish Ayhudata halaqati paxida addeza “Hach Sambatara ne alga tookkana mala Muse wogay azazenna” gida.

¹¹ Izikka istas “ ‘Ne ichchida alga tookkada ba’ gi yootides” gides.

¹² Istika “Nena alga tookkada ba giday oonee?” gi oychida.

¹³ Derey darida gishshinne Yesusi heeppe haakki bida gish iza ooni pathidakkonne addezi eribenna.

¹⁴ Hessafe guye Yesusi addeza Xoossa Keeththan demmidi “Hekko ha7i ne paxadasa; kaseyssafe aadhdhiza iita miishi ne bolla gakkonta mala nam7antho nagara ooththofa” gides

¹⁵ Addezikka biidinne iza pathiday Yesusa gididayssa Ayhudata halaqatas yootides.

¹⁶ Addeza Sambata gallas pathida gish Ayhudata daannati Yesusa oykkana yedethida.

¹⁷ Yesusikka istas “Ta Aaway ubba wode ooththes, takka ooththana” gides;

¹⁸ Hessa gaason Ayhudata daannati Yesusa wodhana mala kaseppe aaththi dentheththida. Qasse izi Sambata moorida gish xalla gidonta “Xoossi ta Aawa” gida gishshinne bana Xoossara ginisida gishassa.

¹⁹ Yesusi istas “Ta intes tumu gays; Aaway ooththishin beyidayssa oosoppe attin naazi ba shenen aynne ooththenna. Aaway ooththizayssa iza nay hessathoka ooththes.

²⁰ Gaasoyka Aaway naaza dossees. Ba ooththizayssakka wursi iza bessees; inte malalettana mala hayssafeka aadhdhiza ooso buro bessana.