ዮሃኒሳ 5:11-42 in Gamo

¹¹ ኢዚካ ኢስታስ “ ‘ኔ ኢቺዳ ኣልጋ ቶካዳ ባ’ ጊ ዮቲዴስ” ጊዴስ።

¹² ኢስቲካ “ኔና ኣልጋ ቶካዳ ባ ጊዳይ ኦኔ?” ጊ ኦይቺዳ።

¹³ ዴሬይ ዳሪዳ ጊሺኔ ዬሱሲ ሄፔ ሃኪ ቢዳ ጊሽ ኢዛ ኦኒ ፓꬂዳኮኔ ኣዴዚ ኤሪቤና።

¹⁴ ሄሳፌ ጉዬ ዬሱሲ ኣዴዛ ፆሳ ኬꬃን ዴሚዲ “ሄኮ ሃዒ ኔ ፓፃዳሳ፤ ካሴይሳፌ ኣꬊዛ ኢታ ሚሺ ኔ ቦላ ጋኮንታ ማላ ናምዓንꬆ ናጋራ ኦꬆፋ” ጊዴስ

¹⁵ ኣዴዚካ ቢዲኔ ኢዛ ፓꬂዳይ ዬሱሳ ጊዲዳይሳ ኣይሁዳታ ሃላቃታስ ዮቲዴስ።

¹⁶ ኣዴዛ ሳምባታ ጋላስ ፓꬂዳ ጊሽ ኣይሁዳታ ዳናቲ ዬሱሳ ኦይካና ዬዴꬂዳ።

¹⁷ ዬሱሲካ ኢስታስ “ታ ኣዋይ ኡባ ዎዴ ኦꬄስ፥ ታካ ኦꬃና” ጊዴስ፤

¹⁸ ሄሳ ጋሶን ኣይሁዳታ ዳናቲ ዬሱሳ ዎꬋና ማላ ካሴፔ ኣꬂ ዴንꬄꬂዳ። ቃሴ ኢዚ ሳምባታ ሞሪዳ ጊሽ ፃላ ጊዶንታ “ፆሲ ታ ኣዋ” ጊዳ ጊሺኔ ባና ፆሳራ ጊኒሲዳ ጊሻሳ።

¹⁹ ዬሱሲ ኢስታስ “ታ ኢንቴስ ቱሙ ጋይስ፤ ኣዋይ ኦꬂሺን ቤዪዳይሳ ኦሶፔ ኣቲን ናዚ ባ ሼኔን ኣይኔ ኦꬄና። ኣዋይ ኦꬂዛይሳ ኢዛ ናይ ሄሳꬆካ ኦꬄስ።

²⁰ ጋሶይካ ኣዋይ ናዛ ዶሴስ። ባ ኦꬂዛይሳካ ዉርሲ ኢዛ ቤሴስ፤ ኢንቴ ማላሌታና ማላ ሃይሳፌካ ኣꬊዛ ኦሶ ቡሮ ቤሳና።

²¹ ኣዋይ ሃይቂዳይታ ዴንꬂዛይሳꬆኔ ዴዖ ኢሚዛይሳꬆ ናዚካ ሄሳꬆ ባ ኮዪዳዴስ ዴዖ ኢማና።

²² ኣዋይ ኦና ቦላካ ፒርዴና። ጊዶ ኣቲን ፒርዳ ማታ ዉርሲ ባ ናዛስ ኢሚዴስ።

²³ ኢዚ ሄሳꬆ ኦꬂዳይ ኣሳይ ዉሪ ኣዋ ቦንቻና ማላኔ ቃሴካ ናዛካ ቦንቻና ማላሳ። ናዛ ቦንቾንታይ ናዛ ኪቲዳ ኣዋካ ቦንቼና።

²⁴ “ታ ኢንቴስ ቱማ ጋይስ፥ ታ ቃላ ሲዪዛዴሲኔ ታና ኪቲዳዴን ኣማኒዛዴስ ሜርና ዴዖይ ዴስ። ኢዛዴይ ሃይቆፔ ጌዴ ዴዖን ፒኒዴስ ኣቲን ኢዛ ቦላ ፒርዴቴና።

²⁵ ታ ኢንቴስ ቱማ ጋይስ፥ ካሴ ሃይቂዳ ኣሳቲ ፆሳ ና ቃላ ሲዪዛ ዎዴይ ያና፤ ሄ ዎዴያካ ሃኖ፤ ሲዪዛይቲ ዉሪ ዴዖን ዴኣና።

²⁶ ጋሶይካ ኣዋይ ባ ባጋራ ዴዖይ ዲዛ ማላ ናዚካ ባ ባጋራ ዴዖይ ዳና ማላ ኦꬂዴስ።

²⁷ ኢዚ ኣሳ ና ጊዲዳ ጊሽ ፒርዳና ማላ ጎዳቴꬅ ኢዛስ ኢሚዴስ።

²⁸ ሃይሳን ኣይኮካ ማላሌቶፍቴ። ጋሶይካ ቡሮ ካሴ ሃይቂዲ ዱፎን ዲዛይቲ ዉሪ ኢዛ ቃላ ጊሪስ ሲዪዛ ዎዴይ ያና።

²⁹ ሎዖ ኦꬂዳይቲ ሃይቆፔ ዴንዲዲ ፓፃና። ጊዶ ኣቲን ኢታ ኦꬂዳይቲ ሃይቆፔ ዴንዲዲ ፒርዴታና።

³⁰ “ታ ታ ሼኔን ኣይኮካ ኦꬃናስ ዳንዳዪኬ፤ ጊዶ ኣቲን ታ ኣዋፔ ታ ሲዪዳ ማላ ፒርዳይስ። ታና ኪቲዳይሳ ሼኔ ኦꬃይስ ኣቲን ታ ሼኔን ታ ኦꬆንታ ጊሽ ታ ፒርዳን ባላይ ባዋ።

³¹ ታኒ ታ ጊሽ ታርካ ማርካቲኮ ታ ማርካይ ቱሙ ጊዴና።

³² ጊዶ ኣቲን ታ ጊሽ ማርካቲዛዴይ ሃራይ ዴስ። ኢዚካ ታ ጊሽ ማርካቲዛዴ ማርካቴꬃይ ቱሙ ጊዲዳይሳ ታ ኤራይስ።

³³ ኢንቴ ዮሃኒሳኮ ኣሴ ኪቲዴታ ሺን ኢዚካ ቱሙ ማርካቲዴስ።

³⁴ ታ ሃይሳ ጊዛይ ኢንቴ ኣታና ማላ ኣቲን ታስ ሃራ ማርካቴꬅ ኮሺዳ ጊሽ ጊዴና።

³⁵ ዮሃኒሲ ኤፂዲ ፖዒሲዛ ፖዖ ማላ። ኢንቴካ ጉꬃ ዎዴ ኢዛ ፖዖን ኡፋዬታና ኮዪዴታ።

³⁶ ታስ ጊዲኮ ዮሃኒሳ ማርካቴꬃፌ ኣꬊዛ ማርካይ ዴስ። ታ ማርካይካ ታ ኣዋይ ታስ ኢሚዳ ኦሶ። ሄሲካ ታ ኦꬂዛ ኦሶይ ታ ኣዋይ ታና ኪቲዳይሳ ታስ ማርካቴስ።

³⁷ ታና ኪቲዳ ታ ኣዋይካ ባ ሁዔራ ታስ ማርካቲዴስ። ኢንቴ ጊዲኮ ኢዛ ቃላ ጊሪስ ሙሌካ ሲይቤይኬታ። ኢዛስ ሜꬋካ ሙሌራ ቤይቤኬታ።

³⁸ ኢዚ ኪቲዳዴን ኢንቴ ኣማኖንታ ጊሽ ኢዛ ቃላይ ኢንቴ ኣቻን ዴና።

³⁹ ኢንቴስ ጌሻ ማፃፋታፔ ሜርና ዴዖ ዴማናስ ሚሳቲን ማፃፋታ ፒሊጌታ፤ ማፃፋቲካ ታ ጊሽ ማርካቴቴስ።

⁴⁰ ጊዶ ኣቲን ኢንቴ ዴዖ ዴማናስ ታኮ ሃ ያና ኮዬኬታ።

⁴¹ “ታ ኣሳፔ ቦንቾ ኮዪኬ።

⁴² ታ ኢንቴና ኤራይስ፤ ፆሳ ሲቆይ ኢንቴናን ባይንዳይሳካ ኤራይስ።

¹¹ Izikka istas “ ‘Ne ichchida alga tookkada ba’ gi yootides” gides.

¹² Istika “Nena alga tookkada ba giday oonee?” gi oychida.

¹³ Derey darida gishshinne Yesusi heeppe haakki bida gish iza ooni pathidakkonne addezi eribenna.

¹⁴ Hessafe guye Yesusi addeza Xoossa Keeththan demmidi “Hekko ha7i ne paxadasa; kaseyssafe aadhdhiza iita miishi ne bolla gakkonta mala nam7antho nagara ooththofa” gides

¹⁵ Addezikka biidinne iza pathiday Yesusa gididayssa Ayhudata halaqatas yootides.

¹⁶ Addeza Sambata gallas pathida gish Ayhudata daannati Yesusa oykkana yedethida.

¹⁷ Yesusikka istas “Ta Aaway ubba wode ooththes, takka ooththana” gides;

¹⁸ Hessa gaason Ayhudata daannati Yesusa wodhana mala kaseppe aaththi dentheththida. Qasse izi Sambata moorida gish xalla gidonta “Xoossi ta Aawa” gida gishshinne bana Xoossara ginisida gishassa.

¹⁹ Yesusi istas “Ta intes tumu gays; Aaway ooththishin beyidayssa oosoppe attin naazi ba shenen aynne ooththenna. Aaway ooththizayssa iza nay hessathoka ooththes.

²⁰ Gaasoyka Aaway naaza dossees. Ba ooththizayssakka wursi iza bessees; inte malalettana mala hayssafeka aadhdhiza ooso buro bessana.

²¹ Aaway hayqqidayta denthizayssathonne de7o immizayssatho naazikka hessatho ba koyidades de7o immana.

²² Aaway oona bollaka pirdenna. Gido attin pirda maata wursi ba naazas immides.

²³ Izi hessatho ooththiday asay wuri Aawa bonchana malanne qasseka naazakka bonchana malassa. Naaza bonchontay naaza kiittida Aawakka bonchenna.

²⁴ “Ta intes tuma gays, ta qaala siyizadessinne tana kiittidaden ammanizades merna de7oy dees. Izaadey hayqoppe gede de7on pinnides attin iza bolla pirdetenna.

²⁵ Ta intes tuma gays, kase hayqqida asati Xoossa naa qaala siyiza wodey yaana; he wodeyakka hanno; siyizayti wuri de7on deana.

²⁶ Gaasoyka Aaway ba baggara de7oy diza mala naazikka ba baggara de7oy daana mala ooththides.

²⁷ Izi asa naa gidida gish pirdana mala godateth izas immides.

²⁸ Hayssan aykkokka malalettofte. Gaasoyka buro kase hayqqidi duufon dizayti wuri iza qaala giiris siyiza wodey yaana.

²⁹ Lo7o ooththidayti hayqoppe dendidi paxana. Gido attin iita ooththidayti hayqoppe dendidi pirdettana.

³⁰ “Ta ta shenen aykkokka ooththanas dandayikke; gido attin ta aawappe ta siyida mala pirdays. Tana kiittidayssa shene ooththays attin ta shenen ta ooththonta gish ta pirdan balay baawa.

³¹ Tani ta gish tarka markattikko ta markay tumu gidenna.

³² Gido attin ta gish markattizadey haray dees. Izikka ta gish markatizade markatethay tumu gididayssa ta erays.

³³ Inte Yohannisakko ase kiittideta shin izikka tumu markatides.

³⁴ Ta hayssa gizay inte attana mala attin taas hara markateth koshshida gish gidenna.

³⁵ Yohannisi eexidi poo7isiza poo7o mala. Inteka guutha wode iza poo7on ufayettana koyideta.

³⁶ Taas gidikko Yohannisa markatethafe aadhdhiza markay dees. Ta markaykka ta Aaway taas immida ooso. Hessika ta ooththiza oosoy ta Aaway tana kiittidayssa taas markatees.

³⁷ Tana kiittida ta Aawayka ba hu7era taas markatides. Inte gidikko iza qaala giiris mulekka siybeeykketa. Izas medhaaka mulera beybeekketa.

³⁸ Izi kiittidaden inte ammanonta gish iza qaalay inte achchan deenna.

³⁹ Intes Geeshsha Maxaafatappe merna de7o demmanas misatin maxaafata piligeeta; maxaafatikka ta gish markattettes.

⁴⁰ Gido attin inte de7o demmanas taakko ha yaana koyekketa.

⁴¹ “Ta asappe boncho koyikke.

⁴² Ta intena erays; Xoossa siiqoy intenan bayndayssakka erays.