Yohannisa 4:43-52

⁴³Yesusi Samaariyan nam7u gallas gam7idappe guye Galila bides.

⁴⁴Izi ba baggara “Nabey ba deren bonchettenna” gi yootides.

⁴⁵Gido attin izi Galila biin Galila asay iza lo7ethi mokki ekkides. Gaasoyka Paaziga ba7aale bonchana Yerusalame bidason heen dishin izi ooththidaysa wursi beyida gishassa.

⁴⁶Hessafe guye Yesusi haaththe woyne cajje ooththida Galila dere giddon diza Qaana geetettiza katama nam7antho bides. He wode Qifirnahoomen izas nay saketida issi kawo shuumey dees.

⁴⁷Izikka Yesusi Yuhuda dereppe gede Galila yidayssa siydi Yesusakko bides. Yesusi duge Qifirnahoome wodhdhana malanne daro saketidi hayqqana giza naaza pathana mala Yesusa woossides.

⁴⁸Yesusikka izas “Inte gita malatatanne malalisizaz beyonta aykkokka ammanekketa” gides.

⁴⁹Shuumezikka zaaridi “Godo, ta naazi hayqqonta elela wodhdharki!” gides.

⁵⁰Yesusikka iza “Neni neso ba! Naazi paxides” gides. Addezikka Yesusi izas yootida qaala ammanidi so simmi bides.

⁵¹Izi so bishin iza ashkarati izara ogen gaaggidi “Ne naazi paxides” giidi izas yootida.

⁵²Shuumezikka naazi ay saaten paxidakkone ista zaari oychides. Istika izas “Qamma gallassafe laapun saaten iza michizayssi aggides” gida.