ዮሃኒሳ 4:31-39 in Gamo

³¹ ሄ ዎዴ ዬሱሳ ካሊዛይቲ ዬሱሳ “ኣስታማሬ! ቁማ ማ” ጊዲ ዎሲዳ።

³² ኢዚ ቃስ “ኢንቴ ኤሮንታይ ታ ሚዛ ቁማይ ታስ ዴስ” ጊዴስ።

³³ ሄሳ ጊሽ ኢዛ ካሊዛይቲ “ኣይኮ ሚዛ ካꬅ ኣሲ ኢዛስ ኤሂዴሻ?” ጊዲ ባ ጊዶን ሃሳዬቲዳ

³⁴ ዬሱሲካ ኢስታስ ዛሪዲ “ታ ቁማይ ታና ኪቲዳ ታ ኣዋ ሼኔ ኦሶኔ ኢዛ ኦሶ ፖሎ።

³⁵ ኢንቴ ቃስ ‘ካꬃ ማፃይ ጋካናስ ቡሮ ኦይዱ ኣጊናይ ኣቲዴስ’ ጌታ ጊዴኬቲ? ቃስ ታ ጊዲኮ ኢንቴና ‘ꬎቁ ጊዲ ካꬃይ ማፃ ጋኪዳይሳ ፄሊቴ’ ጋይስ።

³⁶ ማፂዛዴይ ባ ዳሞዛ ኤካና። ሜርናስ ጊዲዛ ኣይፌ ሺሻና። ሄሳ ጊሽ ዜሪዛዴይኔ ማፂዛዴይ ኢሲፌ ኡፌዬታና።

³⁷ ሄሳ ጊሽ ኢሳዴይ ዜራና፤ ሃራ ኣሲ ማፃና ጌቴቲዛ ሌሚሶይ ቱማ።

³⁸ ታ ኢንቴና ኢንቴ ዳቡሮንታይሳ ማፃና ማላ ዬዳዲስ። ሃራቲ ኦሶን ዳቡሪዳ። ጊዶ ኣቲን ኢንቴ ኢስታ ዳቡርሳን ጎዔቲዴታ” ጊዴስ።

³⁹ ማጫሳያ “ታ ኦꬂዳዚ ዉርሲ ታስ ኢዚ ዮቲዴስ” ጋዳ ኣሳስ ማርካቲዳ ማላ ካታማፔ ዳሮ ሳማሪያ ኣሳይ ኢዛን ኣማኒዴስ።

³¹ He wode Yesusa kaallizayti Yesusa “Astamare! Quma ma” giidi woossida.

³² Izi qas “Inte erontay ta miza qumay taas dees” gides.

³³ Hessa gish iza kaallizayti “Aykko miza kath asi izas ehideshaa?” giidi ba giddon haasayettida

³⁴ Yesusikka istas zaaridi “Ta qumay tana kiittida ta Aawa shene oosonne iza ooso polo.

³⁵ Inte qas ‘Kaththa maxay gakkanaas buro oyddu aginay attides’ geeta gidekketii? Qas ta gidikko intena ‘Dhoqu giidi kaththay maxa gakkidayssa xeellite’ gays.

³⁶ Maxizadey ba damoza ekkana. Mernas gidiza ayfe shiishana. Hessa gish zerizadeynne maxizadey issife ufeyettana.

³⁷ Hessa gish issadey zerana; Hara asi maxana geetettiza leemisoy tuma.

³⁸ Ta intena inte daaburontayssa maxana mala yeddadis. Harati ooson daaburida. Gido attin inte ista daabursan go7ettideta” gides.

³⁹ Macasaya “Ta ooththidazi wursi taas izi yootides” gaada asas markattida mala katamappe daro Samaariya asay izan ammanides.