ዮሃኒሳ 4:1-45 in Gamo

¹ ሄ ዎዴ ዬሱሲ ዮሃኒሳፔ ቦላራ ዳሮ ኣሳ ባና ካሊዛዴይ ኦꬂዛይሳኔ ፃማቂዛይሳ ፋርሳዌቲ ሲዪዳ።

² ጊዶ ኣቲን ፃማቂዛይቲ ኢዛ ካሊዛይታፔ ኣቲን ኢዚ ፃማቂቤና።

³ ኢዛ ጊሽ ሃሳዬቲዛይሳ ፋርሳዌቲ ሲይዳ ዬሱሲ ኤሪዲ ዩሁዳ ዴሬ ኣጊዲ ጋሊላ ዴሬ ሲሚ ቢዴስ።

⁴ ኢዚ ሄ ቢሺን ሳማሪያራ ኣꬊ ባናይሲ ኢዛስ ኣቶንታዝ ጊዲዴስ።

⁵ ሄሳ ጊሽ ሲካሮ ጌቴቲዛሶ ሳማሪያ ካታማ ቢዴስ። ሲካራ ያቆቤይ ባ ና ዮሴፌስ ኢሚዳ ቢታ ኣቻን ዳዉስ።

⁶ ሄንካ ያቆቤ ሃꬃ ኦላይ ዴስ። ዬሱሲ ኦጌ ሃሙቲ ዳቡሪዳ ጊሽ ሄ ኦላይ ኣቻን ኡቲዴስ። ዎዴይካ ጋላሳፌ ኡሱፑን ሳቴ ማላ።

⁷ ሄሳ ዎዴ ኢሲ ሳማሪያ ዴሬ ማጫስ ዲዛራ ሃꬄ ዱቃናስ ሄ ሃꬃ ኦላኮ ያዱስ። ዬሱሲካ ኢዞ “ታና ሃꬄ ኡሻ” ጊዴስ።

⁸ ሄሲ ሃኒሺን ዬሱሳ ካሊዛይቲ ቁማ ሻማና ካታማ ቢዳ።

⁹ ሂና ሳማሪያ ማጫሳያ ዬሱሳ “ኔ ኣይሁዳ ኣስ ጊዳ ኡታዳ ዋናዳ ታና ሳማሪያ ማጫስ ‘ሃꬄ ኡሻ’ ጋ ኦይቻይ?” ጋዱስ። ኢዛ ሄሳ ጊዳይ ኣይሁዳ ኣሳሲኔ ሳማሪያ ኣሳስ ጋጎቴꬂ ዶንታ ጊሻሳ።

¹⁰ ዬሱሲካ ኢዚስ “ፆሳ ኢሞታይኔ ኔና ‘ታና ሃꬄ ኡሻ’ ጊዛዴይ ኢዚ ኦናኮኔ ኔ ኤሪዛኮ ኔ ኢዛ ዎሳናስ ቤሴስ። ኢዚካ ኔስ ዴዖ ሃꬄ ኢማናኮሺን” ጊዴስ።

¹¹ ኢዛካ ኢዛስ “ጎዶ! ኔስ ሃꬄ ዱቂዛ ሚሺ ዴና፤ ሃꬃ ኦላይካ ዳሮ ጪማ፤ ሂስቲን ኔ ዴዖ ሃꬂ ኣዋፔ ዴማኔ?

¹² ኔ ሃይሳ ሃꬃ ኦላዛ ኑስ ኢሚዳ ኑ ኣዋ ያቆቤፔ ኣꬋይ? ኢዚኔ ኢዛ ናይቲ ኢዛ ሜሄቲካ ሃይሳ ሃ ኦላፌ ሃꬄ ኡዪዳ” ጋዱስ።

¹³ ዬሱሲ ኢዚስ “ሃይሳ ሃ ሃꬃፌ ኡዪዛይ ዉሪ ናምዓንꬆ ሳሞቲዲ ዛሪ ሃራ ኡያናሺን።

¹⁴ ታ ኢሚዛ ሃꬄ ኡዪዛዴይ ጊዲኮ ሜርናስ ሙሌካ ሳሞቴና። ጋሶይካ ታ ኢሚዛ ሃꬄ ኡዪዛዴስ ሜርና ዴዖስ ፑልቲዛ ፑልቶ ሃꬄ ጊዳና” ጊዴስ።

¹⁵ ማጫሳያካ “ጎዶ! ሃይሳፌ ጉዬ ታና ሃꬄ ሳሞንታ ማላኔ ቃሴካ ታ ሃꬄ ዱቃና ሃ ዮንታ ማላ ሄሳ ኔ ጊዛ ሃꬃ ማላ ሃꬄ ታስ ኢማርኪ?” ጋዱስ።

¹⁶ ዬሱሲካ ኢዞ “ባዳኔ ኔ ኣዚና ፄይጋ ኤካዳ ያ” ጊዴስ።

¹⁷ ማጫሳያካ ዛራዳ “ታስ ኣዚናይ ዴና” ጋዱስ። ኢዚ ሂዝጊን ዬሱሲ “ ‘ኔ ታስ ኣዚናይ ዴና’ ጉሳይ ቱሙኮ።

¹⁸ ጋሶይካ ካሴ ኔስ ኢቻሹ ኣዚናቲ ዴቴስ። ቃሴ ሃዒ ኔናራ ዲዛይሲ ኔ ኣዚና ጊዴና። ሄሳ ጊሽ ኔ ቱሙ ጋዳሳ” ጊዴስ።

¹⁹ ማጫሳያ ኢዛስ “ጎዶ! ኔኒ ናቤ ጊዲዳይሳ ታ ሃዒ ኤራዲስ።

²⁰ ካሴ ኑ ኣዋቲ ሃይሳ ዙማ ቦላ ጎይኒዳ። ኢንቴ ቃሴ ‘ኣሳይ ጎይናናስ ቤሲዛሶይ ዬሩሳላሜንኮ!’ ጌታ” ጋዱስ።

²¹ ዬሱሲካ ኢዚስ “ሃኔ ማጫሳዬ፥ ፆሳ ኣዋስ ሃይሳ ዙማ ቦላ ዎይኮ ዬሩሳላሜን ኢንቴ ጎይኖንታ ዎዴይ ያናይሳ ኣማና፤

²² ኢንቴ ኢንቴ ኤሮንታ ፆሳስ ጎይኔታ። ኑ ጊዲኮ ኣሳስ ኣቶቴꬂ ኣይሁዳፔ ጊዲዳ ጊሽ ኑኒ ኑ ኤሪዛ ፆሳስ ጎይኖስ።

²³ ጊዶ ኣቲን ቱሙ ጎይኒዛይቲ ፆሳ ኣዋስ ኣያናኒኔ ቱማን ጎይኒዛ ዎዴይ ቡሮ ያና። ሃራይ ኣቶሺን ሃዒካ ዪዴስ። ፆሳ ኣዋይካ ኮዪዛይ ሄሳ ማላ ጎይኒዛይታ።

²⁴ ፆሲ ባ ሁዔስ ኣያና፤ ኢዛ ጎይኒዛይቲ ኣይናኒኔ ቱማን ጎይናናስ ቤሴስ” ጊዴስ።

²⁵ ማጫሳያካ “ኪርስቶሲ ያናይሳ ታ ኤራይስ፤ ኢዚ ዪዲ ሃኒዛዝ ዉርሲ ኑስ ዮታና” ጋዱስ።

²⁶ ዬሱሲካ ኢዚስ “ሃዒ ኔናራ ሃሳዪዛይ ታ ኢዛ” ጊዴስ።

²⁷ ሄሲ ሃኒሺን ኢዛ ካሊዛይቲ ባ ቢዳሶፔ ሲሚዳ። ዬሱሲ ማጫሳራ ሃሳዪዛይሳ ማላሌቲዳ። ጊዶ ኣቲን “ሃኔ ኣይ ኮያይ? ዎይኮ ሃኒራ ኣዛስ ሃሳያይ?” ጊዲ ኦኒካ ኦይቺቤና።

²⁸ ሄሳፌ ጉዬ ማጫሳያ ኦቶዛ ሄን ኣጋጋዳ ጌዴ ካታማ ባዳ ኣሳስ፤

²⁹ “ታ ኦꬂዳዝ ዉርሲ ታስ ዮቲዳዴ ሃ ዪዲ ቤይቴ። ኦኔ ኤሪዛይ ፆሲ ቲዪዳ ኪርስቶሲ ኢዛኮኔ!” ጋዱስ።

³⁰ ኣስካ ካታማፔ ኬዚዲ ዬሱሳኮ ቢዴስ።

³¹ ሄ ዎዴ ዬሱሳ ካሊዛይቲ ዬሱሳ “ኣስታማሬ! ቁማ ማ” ጊዲ ዎሲዳ።

³² ኢዚ ቃስ “ኢንቴ ኤሮንታይ ታ ሚዛ ቁማይ ታስ ዴስ” ጊዴስ።

³³ ሄሳ ጊሽ ኢዛ ካሊዛይቲ “ኣይኮ ሚዛ ካꬅ ኣሲ ኢዛስ ኤሂዴሻ?” ጊዲ ባ ጊዶን ሃሳዬቲዳ

³⁴ ዬሱሲካ ኢስታስ ዛሪዲ “ታ ቁማይ ታና ኪቲዳ ታ ኣዋ ሼኔ ኦሶኔ ኢዛ ኦሶ ፖሎ።

³⁵ ኢንቴ ቃስ ‘ካꬃ ማፃይ ጋካናስ ቡሮ ኦይዱ ኣጊናይ ኣቲዴስ’ ጌታ ጊዴኬቲ? ቃስ ታ ጊዲኮ ኢንቴና ‘ꬎቁ ጊዲ ካꬃይ ማፃ ጋኪዳይሳ ፄሊቴ’ ጋይስ።

³⁶ ማፂዛዴይ ባ ዳሞዛ ኤካና። ሜርናስ ጊዲዛ ኣይፌ ሺሻና። ሄሳ ጊሽ ዜሪዛዴይኔ ማፂዛዴይ ኢሲፌ ኡፌዬታና።

³⁷ ሄሳ ጊሽ ኢሳዴይ ዜራና፤ ሃራ ኣሲ ማፃና ጌቴቲዛ ሌሚሶይ ቱማ።

³⁸ ታ ኢንቴና ኢንቴ ዳቡሮንታይሳ ማፃና ማላ ዬዳዲስ። ሃራቲ ኦሶን ዳቡሪዳ። ጊዶ ኣቲን ኢንቴ ኢስታ ዳቡርሳን ጎዔቲዴታ” ጊዴስ።

³⁹ ማጫሳያ “ታ ኦꬂዳዚ ዉርሲ ታስ ኢዚ ዮቲዴስ” ጋዳ ኣሳስ ማርካቲዳ ማላ ካታማፔ ዳሮ ሳማሪያ ኣሳይ ኢዛን ኣማኒዴስ።

⁴⁰ ሄሳ ጊሽ ሳማሪያ ኣሳይ ዬሱሳኮ ዪዲኔ ኢዚ ኢስታኮን ጋምዓና ማላ ዎሲዳ። ኢዚካ ናምዑ ጋላስ ሄን ጋምዒዴስ።

⁴¹ ኢዛ ቃላ ሲይዲ ዳሮ ኣሳይ ኢዛ ኣማኒዴስ።

⁴² ማጫሳዮካ “ሃዒ ኑ ኢዛ ኣማኒዛይ ኔ ዮቲዳ ቃላ ጊሽ ፃላ ጊዶንታ ኑካ ኑ ባጋራ ኢዛፔ ሲዪዳ ጊሺኔ ቱማፔ ኢዚ ዴሬ ኣሺዛዴ ጊዲዳይሳ ኤሪዳ ጊሻሳ” ጊዳ።

⁴³ ዬሱሲ ሳማሪያን ናምዑ ጋላስ ጋምዒዳፔ ጉዬ ጋሊላ ቢዴስ።

⁴⁴ ኢዚ ባ ባጋራ “ናቤይ ባ ዴሬን ቦንቼቴና” ጊ ዮቲዴስ።

⁴⁵ ጊዶ ኣቲን ኢዚ ጋሊላ ቢን ጋሊላ ኣሳይ ኢዛ ሎዔꬂ ሞኪ ኤኪዴስ። ጋሶይካ ፓዚጋ ባዓሌ ቦንቻና ዬሩሳላሜ ቢዳሶን ሄን ዲሺን ኢዚ ኦꬂዳይሳ ዉርሲ ቤዪዳ ጊሻሳ።

¹ He wode Yesusi Yohannisappe bollara daro asa bana kaallizadey ooththizayssanne xammaqizayssa Farsaaweeti siyida.

² Gido attin xammaqizayti iza kaallizaytappe attin izi xammaqibenna.

³ Iza gish haasayettizayssa Farsaaweeti siyda Yesusi eridi Yuhuda dere aggidi Galila dere simmi bides.

⁴ Izi hee bishin Samaariyara aadhdhi baanayssi izas attontaz gidides.

⁵ Hessa gish Sikaaro geetettizaso Samaariya katama bides. Sikaara Yaqoobey ba naa Yoosefes immida biitta achchan dawus.

⁶ Henka Yaqoobe haaththa ollay dees. Yesusi oge hamutti daaburida gish he ollay achchan uttides. Wodeykka gallassafe usuppun saate mala.

⁷ Hessa wode issi Samaariya dere macas dizaara haaththe duuqqanas he haaththa ollakko yadus. Yesusikka izo “Tana haaththe ushsha” gides.

⁸ Hessi hanishin Yesusa kaallizayti quma shammana katama bida.

⁹ Hinna Samaariya macasaya Yesusa “Ne Ayhuda as gida uttada waanada tana Saamariya macas ‘Haaththe ushsha’ ga oychay?” gadus. Iza hessa giday Ayhuda asassinne Samaariya asas gaaggoteththi doonta gishassa.

¹⁰ Yesusikka Izis “Xoossa immotaynne nena ‘Tana haaththe ushsha’ gizadey izi oonakkonne ne erizakko ne iza woossanas bessees. Izikka nees de7o haaththe immanakkoshin” gides.

¹¹ Izakka izas “Godo! Nees haaththe duuqqiza miishi deenna; haaththa ollayka daro ciimma; histin ne de7o haaththi awappe demmanee?

¹² Ne hayssa haaththa ollaza nuus immida nu aawa Yaqoobeppe aadhdhay? Izinne iza nayti iza mehetikka hayssa ha ollafe haaththe uyida” gadus.

¹³ Yesusi izis “Hayssa ha haaththafe uyizay wuri nam7antho saamotidi zaari hara uyanashin.

¹⁴ Ta immiza haaththe uyizadey gidikko mernas mulekka saamotenna. Gaasoyka ta immiza haaththe uyizades merna de7os pultiza pulto haaththe gidana” gides.

¹⁵ Macasayakka “Godo! Hayssafe guye tana haaththe saamonta malanne qasseka ta haaththe duuqqana ha yoonta mala hessa ne giza haaththa mala haaththe taas immarkii?” gadus.

¹⁶ Yesusikka izo “Baadanne ne azina xeeyga ekkada ya” gides.

¹⁷ Macasayakka zaarada “Taas azinay deenna” gadus. Izi hizgin Yesusi “ ‘Ne taas azinay deenna’ guussay tumukko.

¹⁸ Gaasoyka kase nees ichashu azinati deettes. Qasse ha7i nenara dizayssi ne azina gidenna. Hessa gish ne tumu gadasa” gides.

¹⁹ Macasaya izas “Godo! Neni nabe gididayssa ta ha7i eradis.

²⁰ Kase nu Aawati hayssa zuma bolla goynnida. Inte qasse ‘Asay goynnanas bessizasoy Yerusalamenko!’ geeta” gadus.

²¹ Yesusikka izis “Hanne macasaye, Xoossa aawas hayssa zuma bolla woykko Yerusalamen inte goynnonta wodey yaanayssa ammana;

²² Inte inte eronta Xoossas goynneta. Nu gidikko asas atotethi Ayhudappe gidida gish nuni nu eriza Xoossas goynnoos.

²³ Gido attin tumu goynnizayti Xoossa Aawas Ayananinne tuman goynniza wodey buro yaana. Haray attoshin ha7ikka yides. Xoossa aawayka koyizay hessa mala goynnizayta.

²⁴ Xoossi ba hu7es Ayana; iza goynnizayti aynaninne tuman goynnanas bessees” gides.

²⁵ Macasayakka “Kirstoosi yaanayssa ta erays; izi yiidi hanizaz wursi nuus yootana” gadus.

²⁶ Yesusikka izis “Ha7i nenara haasayizay ta iza” gides.

²⁷ Hessi hanishin iza kaallizayti ba bidasoppe simmida. Yesusi Macasara haasayizayssa malaletida. Gido attin “Hanne ay koyay? Woykko hannira aazas haasayay?” giidi oonikka oychibenna.

²⁸ Hessafe guye macasaya otoza heen aggagada gede katama baada asas;

²⁹ “Ta ooththidaz wursi taas yootidade haa yiidi beyte. Oone erizay Xoossi tiyida Kirstoosi izakkone!” gadus.

³⁰ Aska katamappe kezidi Yesusakko bides.

³¹ He wode Yesusa kaallizayti Yesusa “Astamare! Quma ma” giidi woossida.

³² Izi qas “Inte erontay ta miza qumay taas dees” gides.

³³ Hessa gish iza kaallizayti “Aykko miza kath asi izas ehideshaa?” giidi ba giddon haasayettida

³⁴ Yesusikka istas zaaridi “Ta qumay tana kiittida ta Aawa shene oosonne iza ooso polo.

³⁵ Inte qas ‘Kaththa maxay gakkanaas buro oyddu aginay attides’ geeta gidekketii? Qas ta gidikko intena ‘Dhoqu giidi kaththay maxa gakkidayssa xeellite’ gays.

³⁶ Maxizadey ba damoza ekkana. Mernas gidiza ayfe shiishana. Hessa gish zerizadeynne maxizadey issife ufeyettana.

³⁷ Hessa gish issadey zerana; Hara asi maxana geetettiza leemisoy tuma.

³⁸ Ta intena inte daaburontayssa maxana mala yeddadis. Harati ooson daaburida. Gido attin inte ista daabursan go7ettideta” gides.

³⁹ Macasaya “Ta ooththidazi wursi taas izi yootides” gaada asas markattida mala katamappe daro Samaariya asay izan ammanides.

⁴⁰ Hessa gish Samaariya asay Yesusakko yiidinne izi istakon gam7ana mala woossida. Izikka nam7u gallas heen gam7ides.

⁴¹ Iza qaala siydi daro asay iza ammanides.

⁴² Macasayokka “Ha7i nu iza ammanizay ne yootida qaala gish xalla gidonta nukka nu baggara izappe siyida gishshinne tumappe izi dere ashshizade gididayssa erida gishassa” gida.

⁴³ Yesusi Samaariyan nam7u gallas gam7idappe guye Galila bides.

⁴⁴ Izi ba baggara “Nabey ba deren bonchettenna” gi yootides.

⁴⁵ Gido attin izi Galila biin Galila asay iza lo7ethi mokki ekkides. Gaasoyka Paaziga ba7aale bonchana Yerusalame bidason heen dishin izi ooththidaysa wursi beyida gishassa.