ዮሃኒሳ 2:2-24 in Gamo

² ዬሱሲኔ ኢዛ ካሊዛይቲካ ሳርጌዛሶ ፄይጌቲዳ።

³ ሳርጌዛሶን ዎይኔፔ ኣጌቲዳ ኡሻይ ዉሪን ዬሱሳ ኣያ ዬሱሳ “ዎይኔ ኡሻይ ዉርዴስ” ጋዱስ።

⁴ ዬሱሲካ ኢዞ “ኣዬ! ታስ ኔናራ ኣዚ ዲዜ? ታ ዎዴይ ጋኪቤና” ጊዴስ።

⁵ ሄ ዎዴ ዬሱሳ ኣዬያ ማራማ ሄን ጋዴዛን ዲዛ ኦሳንቻታ “ኢዚ ኢንቴና ጊዛይሳ ኦꬂቴ” ጋዱስ።

⁶ ኣይሁዳታስ ጌሾ ዎጋይ ዲዛ ጊሽ ኡሱፑን ሹቻፌ ሜꬌቲዳ ባꬃቲ ሄን ጋዳን ዴቴስ። ኢስቲካ ኢሶይ ኢሶይ ናምዑ ኦቶ ዎይኮ ሄꬑ ኦቶ ሃꬄ ኦይኬቴስ።

⁷ ዬሱሲ ኦሳንቻታ “ባꬃታ ሃꬄ ኩንꬂቴ” ጊን ኢስቲካ ባꬃታ ዱና ጋካናስ ሲልቲ ሂስቲ ኩንꬂዳ።

⁸ ሄሳፌ ቃሴካ ኦሳንቻታ “ኣኔ ሃዒ ዱቂዲ ሳርጌዛ ኣላፌዛስ ኢዛፔ ኢሚቴ” ጊዴስ። ኢስቲካ ዱቂ ዱቂ ኢሚዳ።

⁹ ኣላፌዚካ ዎይኔ ኡሻን ላሜቲዳ ሃꬃ ጋንፂ ፄሊዲ ኢዚ ኣዋፔ ዪዳኮኔ ኤሪቤና። ሃꬃ ዱቂዳይቲ ጊዲኮ ኤሬቴስ። ሄሳ ጊሽ ሳርጌዛ ኣላፌይ ሚሺራዛ ፄይጊዲ፥

¹⁰ “ኣሲ ዉሪ ሳርጌሶን ኮይሮ ሎዖ ኡሺ ሺሼስ፤ ኣሳይ ማꬆቲዳፔ ጉዬ ኢታ ኤሄስ፤ ጊዶ ኣቲን ኔ ጊዲኮ ሎዖ ኡሺ ሃኖ ጋካናስ ዎꬃጋዳሳ” ጊዴስ።

¹¹ ዬሱሲ ሄሳ ማላሊሲዛ ማላታ ኡባፌ ኮይሮ ጋሊላ ጌቴቲዛ ዴሬን ቃና ካታማን ኦꬂዴስ። ባ ቦንቾካ ሄሳ ማላን ቆንጪሲዴስ። ኢዛ ካሊዛይቲካ ኢዛን ኣማኒዳ።

¹² ሄሳፌ ጉዬ ዬሱሲ ባ ኣዬይራ ባ ኢሻታራኔ ባና ካሊዛይታራ ዱጌ ቂፊርናሆሜ ዎꬊዲ ሄን ጉꬃ ዎዴ ታኪዳ።

¹³ ኣይሁዳታ ፓዚጋ ባዓሌይ ማቲዳ ጊሽ ዬሱሲ ያሩሳላሜ ቢዴስ።

¹⁴ ፆሳ ኬꬃ ጊቤ ጊዶን ቦራታ፥ ዶርሳታኔ ሃራጴታ ባይዚዛይታ ቃሴካ ሚሼ ላሚዛይቲ ሚሼ ላሚሺን ዴሚዴስ።

¹⁵ ሄሳ ቤዪዲ ዎዶሮ ፁርቃፌፔ ዶቂ ኤኪዲ ኣሳኔ ቦራታካ ፆሳ ኬꬃ ጊቤፌ ኬሲዴስ፤ ሚሽ ላሚዛይታ ሚሻካ ꬋርጪዲ ኢስታ ፃራጴዛታካ ሺሪ ሺሪ ዬጊዴስ።

¹⁶ ሃራጴ ባይዚዛ ኣሳካ “ሃይሳ ዉርሲ ጌዴ ዲጊቴ! ታ ኣዋ ኬꬃ ዛልዔ ኬꬄ ሂስቶፍቴ” ጊዴስ።

¹⁷ ሄ ዎዴ ኢዛ ካሊዛይቲ “ኔ ኬꬃ ሚሻይ ታና ታማ ማላ ፁጌስ” ጌቴቲ ፃፌቲዳ ቃላ ሃሳዪዳ።

¹⁸ ሄሳፌ ጉዬ ኣይሁዳ ኣሳ ሃላቃቲ ዬሱሳ “ኔ ሃይሳ ዉርሳ ኦꬃናስ ሼኔይ ኔስ ዲዛይሳ ቆንጪሳናስ ኔ ኑና ኣይ ማላሊሲዛ ማላታ ቤሳኔ?” ጊ ኦይቺዳ።

¹⁹ ዬሱሲካ ኢስታስ “ኣኔ ሃይሳ ፆሳ ኬꬃ ላሊቴ፤ ታ ኢዛ ሄꬑ ጋላሳራ ዛራ ኬፃና” ጊ ዛሪዴስ።

²⁰ ኢስቲካ ኢዛ “ሃይሳ ፆሳ ኬꬃ ኬፃናስ ካሴ ኦይዱ ታማኔ ኡሱፑን ላይꬅ ኤኪዴስ፤ ሂስቲን ኔኒ ሄꬑ ጋላሳራ ኬፃ ኩንꬃኔ?” ጊ ኦይቺዳ።

²¹ ጊዶ ኣቲን ዬሱሲ “ፆሳ ኬꬃ” ጊዳይ ባ ኣሳቴꬃ ጊሻሳ።

²² ሄሳ ጊሽ ዬሱሲ ሃይቂ ዴንዲን ኢዛ ካሊዛይቲ ሄ ዮዖዛ ዩሺ ቆፒዲ ኤሪዳኔ ሃይሳ ካሴ ማፃፋን ፃፌቲዳይሳኔ ዬሱሲ ኢስታስ ካሴቲ ዮቲዳ ቃላ ኣማኒዳ።

²³ ፓዚጋ ባዓሌ ጋላስ ዬሱሲ ዬሩሳላሜን ዲሼ ኦꬂዳ ማላታታ ቤዪዲ ዳሮ ኣሳይ ኢዛ ኣማኒዴስ።

²⁴ ቃሴ ዬሱሲ ኣሳ ዉርሲ ኤሪዛ ጊሽ ኦናካ ኣማኒቤና።

² Yesusinne iza kaallizaytikka sargezaso xeeygettida.

³ Sargezason woyneppe agettida ushshay wurin Yesusa aaya Yesusa “Woyne ushshay wurdes” gadus.

⁴ Yesusikka izo “Aaye! Taas nenara aazi dizee? Ta wodey gakkibeenna” gides.

⁵ He wode Yesusa aayeya Maarama heen gadezan diza oosanchata “Izi intena gizayssa ooththite” gadus.

⁶ Ayhudatas geesho wogay diza gish usuppun shuchchafe medhettida baathati heen gadan deettes. Istika issoy issoy nam7u oto woykko heedzdzu oto haaththe oykketes.

⁷ Yesusi oosanchata “Baaththata haaththe kunthite” giin istika baaththata duuna gakkanaas silti histi kunthida.

⁸ Hessafe qasseka oosanchata “Ane ha7i duuqqidi sargeza alafezas izappe immite” gides. Istika duuqqi duuqqi immida.

⁹ Alafezikka woyne ushshan laamettida haaththa gaanxi xeelidi izi awappe yidakkonne eribeenna. Haaththa duuqqidayti gidikko ereetes. Hessa gish sargeza alafey mishiraza xeygidi,

¹⁰ “Asi wuri sargeson koyro lo7o ushshi shiishshees; asay mathotidappe guye iita ehees; gido attin ne gidikko lo7o ushshi hanno gakkanaas wothagadassa” gides.

¹¹ Yesusi hessa malalisiza malata ubbafe koyro Galila geetettiza deren Qaana kataman ooththides. Ba bonchoka hessa malan qoncisides. Iza kaallizaytikka izan ammanida.

¹² Hessafe guye Yesusi ba aayeyra ba ishataranne bana kaallizaytara duge Qifirnahoome wodhdhidi heen guutha wode takkida.

¹³ Ayhudata Paaziga ba7aaley matida gish Yesusi Yarusalame bides.

¹⁴ Xoossa Keeththa gibbe giddon boorata, dorsatanne harapheta bayzizayta qasseka miishe laammizayti miishe laammishin demmides.

¹⁵ Hessa beyidi wodoro xurqafeppe dooqqi ekkidi asanne booratakka Xoossa Keeththa gibbefe kessides; miish laammizayta miishakka dharcidi ista xaraphezatakka shiri shiri yeggides.

¹⁶ Haraphe bayziza asaaka “Hayssa wursi gede diggite! Ta aawa keeththa zal7e keeththe histofte” gides.

¹⁷ He wode iza kaallizayti “Ne keeththa miishay tana tama mala xuugees” geetetti xaafetida qaala haasayida.

¹⁸ Hessafe guye Ayhuda asa halaqati Yesusa “Ne hayssa wursa ooththanas sheney nees dizayssa qoncisanas ne nuna ay malalisiza malata bessanee?” gi oychida.

¹⁹ Yesusikka istas “Ane hayssa Xoossa Keeththa laallite; ta iza heedzdzu gallassara zaara keexana” gi zaarides.

²⁰ Istika iza “Hayssa Xoossa Keeththa keexanas kase oyddu tammanne usuppun layth ekides; histin neni heedzdzu gallassara keexa kunthanee?” gi oychida.

²¹ Gido attin Yesusi “Xoossa Keeththa” giday ba asatetha gishassa.

²² Hessa gish Yesusi hayqqi dendin iza kaallizayti he yo7oza yuushi qoppidi eridanne hayssa kase maxaafan xaafetidaysanne Yesusi istas kaseti yootida qaala ammanida.

²³ Paaziga ba7aale gallas Yesusi Yerusalamen dishe ooththida malatata beyidi daro asay iza ammanides.

²⁴ Qasse Yesusi asa wursi eriza gish oonakka ammanibenna.