ዮሃኒሳ 21:5-17 in Gamo

⁵ ዬሱሲ ኢስታ “ናይቶ ሞሌይ ዲዜ?” ጊዴስ፤ ኢስቲካ “ኣይኮይካ ባዋ” ጊዳ።

⁶ ኢዚካ “ጊቴዛ ዎጎሎዛፔ ኡሻቻ ባጋራ ኣባን ዬጊቴ፤ ኢንቴ ዴማና” ጊዳ ጊሽ ጊቴዛ ኣባ ጊዶ ዬጊዳኔ ዳሮ ሞሌይ ኦይኬቲዳ ጊሽ ጊቴዛ ሞሌዛራ ጎቻና ዳንዳይቤቴና።

⁷ ሄሳ ዎዴ ዬሱሳ ካሊዛይታፔ ኢዚ ሲቂዛ ኢሶይ ጴፅሮሳስ “ሄሲ ጎዳኮ!” ጊዴስ። ሲሞና ጌቴቲዛ ጴፅሮሲ “ሄሲ ጎዳኮ!” ጊዛ ቃላ ሲዪዳ ማላ ካሴ ኦሶ ዲጎፎ ጊዲ ማይዖ ቃሪ ዎꬂዲ ካሎ ዲዛ ጊሽ ሄራካ ማይዖ ኤኪ ማይዒዲ ኣባ ጊዶ ጉፒ ጌሊዴስ።

⁸ ዬሱሳ ካሊዛ ሃንኮይቲ ቃስ ቢታፌ ፄቱ ሜትሬ ማላ ሃኪ ዲዛ ጊሽ ሞሌይ ኩሚ ዲዛ ጊቴዛ ጎቺ ኤኪዲ ዎጎሎራ ጋኪዳ።

⁹ ኢስቲ ዎጎሎዛፔ ዎꬊሺን ሞሌይ ኢዛ ቦላ ዲዛ ቦንቆ ታማኔ ኡኬꬂ ቤዪዳ።

¹⁰ ዬሱሲ ኢስታ “ሃዒ ኢንቴ ኦይኪዳ ሞሌዛፔ ኣኔ ሃ ኤኪ ዪቴ” ጊዴስ።

¹¹ ሄሳ ጊሽ ሲሞና ጌቴቲዛ ጴፅሮሲ ዎጎሎዛ ጊዶ ጌሊዲ ፄታኔ ኢቻሹ ታማኔ ሄꬑ ዎጋ ጊታ ሞሌቲ ኩሚዳ ጊቴዛ ኣባፌ ጌዴ ጋዴ ቦላ ጎቺዴስ። ሄሳ ማላ ዳሮ ሞሌራ ዲንካ ጊቴዚ ዳኬቲቤና።

¹² ሄሳፌ ጉዬ ዬሱሲ ኢስታ “ሃ ዪዲ ሚቴ” ጊዴስ። ኢዚ ጎዳ ዬሱሳ ጊዲዳይሳ ዉሪ ኤሪዳ ጊሽ ኢዛ ካሊዛይታፔ ኢሳዴይካ “ኔ ኦኔ?” ጊ ኦይቻናስ ፃሊዳዴይ ባዋ።

¹³ ዬሱሲ ዪዲ ኡኬꬃኔ ሞሌዛ ኤኪዲ ኢስታስ ኢሚዴስ።

¹⁴ ዬሱሲ ሃይቆፔ ዴንዲን ኢዛ ካሊዛይቲ ኢዛ ቤዪሺን ሃይሲ ሄꬓንꬆ።

¹⁵ ኢስቲ ሚ ጊጊሺን ዬሱሲ ሲሞና ጴፅሮሳ “ዮና ና ሲሞና! ሃይታንታፌ ኔ ታና ኣꬃ ታና ዶሳይ?” ጊዴስ። ኢዚካ “ኤ ታ ጎዶ! ታ ኔና ዶሲዛይሳ ኔካ ኤራሳ” ጊዴስ።

¹⁶ ዬሱሲ ኢዛ “ታ ꬋሚዛይታ ሄማ” ጊዴስ፤ ናምዓንꬆካ “ዮና ና ሲሞና! ኔ ታና ዶሳይ?” ጊዴስ፤ ኢዚካ ዛሪዲ “ኤ ጎዶ! ታ ኔና ዶሲዛይሳ ኔካ ኤራሳ” ጊዴስ፤ ዬሱሲ ቃሴካ “ላቃታ ናጋ” ጊዴስ።

¹⁷ ሄꬓንꬆ “ዮና ና ሲሞና! ኔ ታና ዶሳይ?” ጊዴስ። ኢዚ ሄꬓንꬆ “ኔ ታና ዶሳይ?” ጊዳ ጊሽ ጴፅሮሲ ሚቼቲዲኔ “ጎዶ! ኔ ዉርሳ ኤራሳ ታ ኔና ዶሲዛይሳካ ኔ ኤራሳ” ጊዴስ፤ ዬሱሲካ ቃሴካ “ታ ዶርሳታ ሄማ።

⁵ Yesusi ista “Nayto moley dizee?” gides; istika “Aykkoyka baawa” gida.

⁶ Izikka “Giteza wogolozappe ushacha baggara abban yeggite; inte demmana” gida gish giteza abba giddo yeggidanne daro moley oyketida gish giteza molezara goochana dandaybeetenna.

⁷ Hessa wode Yesusa kaallizaytappe izi siiqiza issoy Phexroosas “Hessi Godakko!” gides. Simoona geetettiza Phexroosi “Hessi Godakko!” giza qaala siyida mala kase ooso diggofo giidi may7o qaari woththidi kallo diza gish heerakka may7o ekki may7idi abba giddo guppi gelides.

⁸ Yesusa kaalliza hankoyti qas biittafe xeetu metre mala haakki diza gish moley kumi diza giteza goochchi ekkidi wogolora gakkida.

⁹ Isti wogolozappe wodhdhishin moley iza bolla diza bonqo tammanne ukethi beyida.

¹⁰ Yesusi ista “Ha7i inte oykkida molezappe ane ha ekki yiite” gides.

¹¹ Hessa gish Simoona geetettiza Phexroosi wogoloza giddo gelidi xeetanne ichashu tammanne heedzdzu wogga gita moleti kumida giteza abbafe gede gade bolla goochchides. Hessa mala daro molera diinka gitezi daakkettibenna.

¹² Hessafe guye Yesusi ista “Ha yiidi miite” gides. Izi Goda Yesusa gididayssa wuri erida gish iza kaallizaytappe issadeykka “Ne oonnee?” gi oychanas xalidadey baawa.

¹³ Yesusi yiidi ukethanne moleza ekkidi istas immides.

¹⁴ Yesusi hayqoppe dendin iza kaallizayti iza beyishin hayssi heedzdzantho.

¹⁵ Isti mi giigishin Yesusi Simoona Phexroosa “Yoona naa Simoona! Haytantafe ne tana aaththa tana dosay?” gides. Izikka “Ee ta Godo! Ta nena dosizayssa nekka eraasa” gides.

¹⁶ Yesusi iza “Ta dhammizayta heemma” gides; nam7anthokka “Yoona naa Simoona! Ne tana dosay?” gides; Izikka zaaridi “Ee Godo! Ta nena dosizayssa nekka eraasa” gides; Yesusi qasseka “Laaqqata naaga” gides.

¹⁷ Heedzdzantho “Yoona naa Simoona! Ne tana dosay?” gides. Izi heedzdzantho “Ne tana dosay?” gida gish Phexroosi michetidinne “Godo! Ne wursa eraasa ta nena dosizayssakka ne eraasa” gides; Yesusikka qasseka “Ta dorsata heemma.