ዮሃኒሳ 20:5-28 in Gamo

⁵ ዱፎዛ ሆኪ ፄሊዲ ኣሃይ ኢዛን ፃፄቲዳ ማይዖይ ፃላ ዲዛይሳ ቤዪዴስ፤ ጊዶ ኣቲን ጌዴ ዱፎዛ ጊዶ ጌሊቤና።

⁶ ሲሞና ጌቴቲዛ ጴፅሮሲካ ኢዛ ካሊ ጋኪዲ ዱፎዛ ጊዶ ጌሊዴስ፤ ኣሃይ ኢዛን ፃፄቲዳ ጫርቃይ ሄን ዲዛይሳ ቤዪዴስ።

⁷ ዬሱሳ ሁዔይ ፃፄቲዳ ጫርቃይ ሃንኮ ፃꬃ ጫርቃታራ ጊዶንታ ዱማ ሃራሶን ፃፄቲ ዲዛይሳ ቤዪዴስ።

⁸ ኮይሮቲ ጋኪዳ ዬሱሳ ካሊዛይሲካ ዱፎዛ ጊዶ ጌሊ ቤዪዲ ኣማኒዴስ።

⁹ ጋሶይካ “ኢዚ ሃይቆፔ ዴንዳና ቤሴስ” ጊዛ ማፃፋ ቃላ ኢስቲ ቡሮ ሃሳዪቤቴና።

¹⁰ ሄሳፌ ጉዬ ናምዓቲካ ሲሚዲ ባሶ ባሶ ቢዳ።

¹¹ ማግዳሌ ማራማ ዬካሼ ዬሱሳ ዱፎፔ ካሬራ ኤቃዳ ሆካ ዱፎዛ ጊዶ ፄላዱስ።

¹² ዬሱሳ ኣሃይ ዲዛሶን ቦꬃ ማይዖ ማይዒዳ ናምዑ ኪታንቻታፔ ኢሶይ ሁዔሶን ኢሶይ ቶሆሶን ኡቲዳይታ ቤያዱስ።

¹³ ኢስቲካ ማራሞ “ሃኔ ማጫሳዬ! ኣዛስ ዬካይ?” ጊዳ። ኢዛካ “ኢስቲ ታ ጎዳ ኤፊዲ ኣዋን ዎꬂዳኮኔ ታ ኤሪኬ” ጋዱስ።

¹⁴ ኢዛ ሂኖ ጋዳ ጉዬ ዩዪሺን ዬሱሲ ኤቂዳይሳ ዴማዱስ ሺን ኢዚ ዬሱሳ ጊዲዳይሳ ኤራቤይኩ።

¹⁵ ዬሱሲ ኢዞ “ሃኔ ማጫሳዬ! ኣዛስ ዬካይ? ቃሴ ኦና ኮያይ?” ጊዴስ፤ ኢዚካ ኢዚስ ኣታኪልቴ ናጊዛዴ ሚሳቲን “ጎዶ! ኔ ኤኪዳ ጊዲኮ ኔ ዎꬂዳሶ ታስ ዮታርኪ፤ ታ ኢዛ ታስ ኤካና” ጋዱስ።

¹⁶ ዬሱሲ ኢዞ “ማራሜ!” ጊዴስ፤ ኢዛካ ጌዴ ኢዛኮ ሲማዳ ኣይሁዳታ ቃላራ “ሬቡኔ!” ጋዱስ፤ ሄሳ ቢርሼꬂ “ኣስታማሬ!” ጉሳ።

¹⁷ ዬሱሲ ቃስ “ታ ቡሮ ፑዴ ታ ኣዋኮ ኬዛቤኬ፤ ታና ቦቾፋ፤ ጊዶ ኣቲን ኔ ሃዒ ታ ኢሻታኮ ባዳ ‘ታኒ ታ ኣዋኮኔ ኢንቴ ኣዋኮ፥ ታ ፆሳኮኔ ኢንቴ ፆሳኮ ኬዛና ጊዴስ’ ጋዳ ኢስታስ ዮታ” ጊዴስ።

¹⁸ ሄሳ ጊሽ ማግዳሌ ማራማ ዬሱሳ ካሊዛይታኮ ባዳ ኢዛ ዬሱሳ ቤዪዳይሳኔ ኢዚ ኢዚስ ዮቲዳይሳ ኢስታስ ዮታዱስ።

¹⁹ ሄ ጋላስ ዎጋ ኦማርስ ዬሱሳ ካሊዛይቲ ኣይሁዳታ ዳናታስ ባቢዲ ካሬ ባ ቦላ ጎርዲዲ ኬꬃ ጊዶን ሺቆን ዲሺን ካሬይ ዶዬቶንታ ዬሱሲ ኢዛ ካሊዛይቲ ሺቂ ዲዛ ኬꬃ ጌሊዴስ፤ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ።

²⁰ ሄሳ ጊ ሲሚዲ ባ ኩሼታኔ ባ ሚሌ ኢስታ ቤሲዴስ፤ ኢዛ ካሊዛይቲካ ጎዳ ቤዪዲ ኬሂ ኡፋዬቲዳ።

²¹ ሄሳፌ ጉዬ ቃሴካ ዬሱሲ ኢስታ “ኢንቴስ ሳሮይ ጊዶ! ታ ኣዋይ ታና ኪቲዳ ማላ ታካ ኢንቴና ኪታይስ” ጊዴስ።

²² ሄሳ ጊ ሲሚዲ ኢስታ ቦላ ኡፉ ጊዲ “ኢንቴ ፂሎ ኣያና ኤኪቴ።

²³ ኢንቴ ኣሳ ናጋራ ኣቶ ጊኮ ኢስታስ ኣቶ ጌቴታና፤ ኢንቴ ኣሳ ናጋራ ኣቶ ጎንታ ኢፂኮ ቃስ ኢንቴስ ኣቶ ጌቴቴና” ጊዴስ።

²⁴ ዬሱሲ ባና ካሊዛይታኮ ዪዳ ዎዴ ታማኔ ናምዓታፔ ኢሶይ ዲዲሞሳ ጌቴቲዛ ቶማሲ ኢስታራ ዴና።

²⁵ ሄሳ ጊሽ ሃንኮ ዬሱሳ ካሊዛይቲ ቶማሳ “ኑ ጎዳ ቤይዶስ” ጊዳ። ቶማሲ ቃስ “ሚሲማሬን ጫዴቲዳ ኢዛ ኩሼታ ታኒ ታ ኣይፌራ ቤዮንታ ዳሼ፥ ቃሴካ ታ ቢራꬌ ሚሲማሬይ ጌሊዳሶን ጌልꬃ ፄሎንታ ዳሼኔ ታ ኩሼ ኢዛ ሚሌ ማዱንꬃን ጌልꬃ ፄሎንታ ዳሼ ኣማኒኬ” ጊዴስ።

²⁶ ሄሳፌ ካሊን ኦሱፑን ጋላሳፌ ጉዬ ኢዛ ካሊዛይቲ ቃሴካ ኬꬃ ጊዶን ዲሺን፤ ቶማስካ ኢስታራ ኢሲፌ ዲሺን፤ ካሬይካ ጎርዳን ዲሺን ዬሱሲ ዪዲ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ።

²⁷ ሄሳፌ ጉዬ ቶማሳ “ኔ ቢራꬌ ሃ ኤሃዳ ታ ኩሼታ ቤያ። ኔ ኩሼ ሃ ኤሃዳ ታ ሚሌን ጌልꬃ ኣማና ኣቲን ኣማኖንታዴ ጊዶፓ” ጊዴስ።

²⁸ ቶማሲ “ታ ጎዶ! ታ ፆሶ!” ጊዴስ።

⁵ Duufoza hokki xeelidi ahay izan xaaxettida may7oy xalla dizayssa beyides; gido attin gede duufoza giddo gellibeenna.

⁶ Simoona geetettiza Phexroosikka iza kaalli gakkidi duufoza giddo gelides; ahay izan xaaxettida carqay heen dizayssa beyides.

⁷ Yesusa hu7ey xaaxettida carqay hanko xaaththa carqatara gidonta dumma harason xaaxetti dizayssa beyides.

⁸ Koyrotti gakkida Yesusa kaallizayssika duufoza giddo geli beyidi ammanides.

⁹ Gaasoyka “Izi hayqoppe dendana bessees” giza maxaafa qaala isti buro haasayibeetenna.

¹⁰ Hessafe guye nam7atikka simmidi baso baso bida.

¹¹ Magdale Maarama yeekkashe Yesusa duufoppe karera eqqada hokka duufoza giddo xeelladus.

¹² Yesusa ahay dizason bootha may7o may7ida nam7u kiitanchatappe issoy hu7eson issoy tohoson uttidayta beyadus.

¹³ Istika Maaramo “Hanne macasaye! Aazas yeekkay?” gida. Izakka “Isti ta Goda efidi awan woththidakkone ta erike” gadus.

¹⁴ Iza hinno gaada guye yuuyishin Yesusi eqqidayssa demmadus shin izi Yesusa gididayssa erabeyku.

¹⁵ Yesusi izo “Hanne macasayee! Aazas yeekkay? Qasse oona kooyay?” gides; izikka izis atakilte naagizade misatin “Godo! Ne ekkida gidikko ne woththidaso taas yootarki; Ta iza taas ekkana” gadus.

¹⁶ Yesusi izo “Maarame!” gides; izakka gede izakko simmada Ayhudata qaalara “Rebuune!” gadus; Hessa birsheththi “Astamaree!” guussa.

¹⁷ Yesusi qas “Ta buro pude ta Aawakko kezabeekke; tana bochofa; gido attin ne ha7i ta ishataako baada ‘Tani ta Aawakkone inte Aawakko, ta Xoossakkonne inte Xoossako kezana gides’ gaada istas yoota” gides.

¹⁸ Hessa gish Magdale Maarama Yesusa kaallizaytakko baada iza Yesusa beyidayssanne izi izis yootidayssa istas yootadus.

¹⁹ He gallas wogga omars Yesusa kaallizayti Ayhudata daannatas babbidi kare ba bolla goordidi keeththa giddon shiiqon dishin karey doyettonta Yesusi iza kaallizayti shiiqi diza keeththa gelides; ista giddon eqqidi “Saroy intes gido!” gides.

²⁰ Hessa gi simmidi ba kushetanne ba mille ista bessides; iza kaallizaytikka Goda beyidi keehi ufayetida.

²¹ Hessafe guye qasseka Yesusi ista “Intes saroy gido! Ta Aaway tana kiittida mala takka intena kiittays” gides.

²² Hessa gi simmidi ista bolla ufu giidi “Inte Xillo Ayana ekkite.

²³ Inte asa nagara atto giikko istas atto geetettana; inte asa nagara atto goonta ixikko qas intes atto geetettenna” gides.

²⁴ Yesusi bana kaallizaytakko yida wode tammanne nam7atappe issoy Didimoosa geetettiza Toomaassi istara deenna.

²⁵ Hessa gish hanko Yesusa kaallizayti Toomaasa “Nu Goda beydos” gida. Toomaassi qas “Misimaaren cadettida iza kusheta tani ta ayfera beyonta dashe, qasseka ta biradhdhe misimaarey gelidason geltha xeellonta dashenne ta kushe iza mille madunthan geltha xeellonta dashe ammanikke” gides.

²⁶ Hessafe kaallin osupun gallassafe guye iza kaallizayti qasseka keeththa giddon dishin; Toomaaska istara issife dishin; kareykka gordan dishin Yesusi yiidi ista giddon eqqidi “Saroy intes gido!” gides.

²⁷ Hessafe guye Toomaasa “Ne biradhdhe ha ehada ta kusheta beya. Ne kushe ha ehada ta millen geltha ammana attin ammanontade gidoppa” gides.

²⁸ Toomaassi “Ta Godo! Ta Xoosso!” gides.