ዮሃኒሳ 1:2-41 in Gamo

² ኢዚ ኮይሮ ፆሳ ኣቻን ዴስ።

³ ሜꬌቴꬂ ዉሪ ኢዛን ሜꬌቲዴስ። ሜꬌቲዳዛን ኢዚ ባይንዳ ሜꬌቲዳይ ኢሲናካ ዱኩ።

⁴ ዴዖይ ኢዛን ዳዉስ። ሃና ዴዖያ ኣሳስ ፖዖ።

⁵ ፖዖይ ꬉማን ፖዒሴስ። ꬉማይ ፖዖ ሙሌካ ፆኔና።

⁶ ፆሳፌ ኪቴቲዳ ዮሃኒሳ ጌቴቲዛ ኢሳዴይ ዴስ።

⁷ ኢዛ ማርካቴꬃን ኣሲ ዉሪ ኣማናና ማላ ፖዖስ ማርካ ጊዲ ዪዴስ።

⁸ ኢዚ ፖዖ ጊሽ ማርካታና ዪዴስ ኣቲን ኢዚ ባ ሁዔስ ፖዖ ጊዴና።

⁹ ኣሳ ኡባስ ፖዖ ኢሚዛ ቱሙ ፖዖይ ሃይሳ ሃ ኣላሜዛን ዬሱሳን ዴስ።

¹⁰ ቃላይካ ካሴ ኣላሜን ዴስ። ኣላሜይካ ሜꬌቲዳይ ኢዛና። ጊዶ ኣቲን ኣላሜይ ኢዛ ኤሪቤና።

¹¹ ኢዚ ባ ባጋታኮ ዪን ኢዛ ባጋቲ ኢዛ ኤኪቤቴና።

¹² ጊዶ ኣቲን ኢዛ ኤኪዳይቲ ኢዛ ሱንꬃን ኣማኒዳይቲ ኢስቲ ፆሳ ናይታ ጊዳና ማላ ማታ ኢስታስ ኢሚዴስ።

¹³ ኢስቲካ ፆሳ ናይታ ጊዲዳይ ፆሳፌ ዬሌቲዳ ጊሽ ኣቲን ኣሳ ዜሬꬃፌ ሄሲካ ኣሳ ዎጋን ዎይኮ ኣሾ ሼኔን ጊዴና።

¹⁴ ቃላይካ ኣስ ጊዲዴስ። ፆሳ ኪያቴꬃኒኔ ቱማን ኩሚዲ ኑናን ኣቂዴስ፤ ኢሲ ናስ ኣዋ ማታን ዲዛ ቦንቾ ሚሳቲዛ ኢዛ ቦንቾ ኑ ቤይዶስ።

¹⁵ ዮሃኒሲካ “ታፔ ጉዬራ ዪዛይሲ ታፔ ኣꬌስ። ጋሶይካ ኢዚ ታፔ ካሴካ ዴስ ጋዳ ታ ኢንቴስ ዮቲዳይሲ ሄኮ ሃይሲ ኢዛኮ!” ጊ ማርካቲዴስ።

¹⁶ ኢዛ ኩሜꬃ ኪያቴꬃን ኑ ዉሪ ኪያቴꬃ ቦላ ኪያቴꬅ ኤኪዶስ።

¹⁷ ዎጋይ ሙሴ ባጋራ ኢሜቲዴስ፤ ኪያቴꬂኔ ቱማይ ጊዲኮ ዬሱስ ኪርስቶሳ ባጋራ ኑስ ዪዴስ።

¹⁸ ፆሴ ቤዪዳይ ኦኒካ ባዋ። ጊዶ ኣቲን ፆሳ ኣዋ ማታን ዲዛ ፆሳ ና ኢሶይ ፃላላ ኢዛ ቆንጪሲዴስ።

¹⁹ ኣይሁዳታ ዳናቲ ዬሩሳላሜፔ ቄሴታኔ ሌዌ ናይታ ዮሃኒሳኮ ኪቲዲ “ኔ ኦኔ?” ጊዲ ኦይቺሺን፥

²⁰ ዮሃኒሲ “ታኒ ኪርስቶሳ ጊዲኬ” ጊዲ ጌሺ ማርካቲዴስ ኣቲን ማርካታናስ ኢፂቤና።

²¹ ኢስቲካ “ሂስቲን ኔ ኦኔ? ኔ ኤላሳ?” ጊዲ ኦይቺዳ። ኢዚካ “ጊዲኬ” ጊዲ ኢስታስ ዛሪዴስ። ኢስቲካ “ኢዚ ያና ጌቴቲዳ ናቤይ ኔኔ?” ጊዳ። ኢዚካ “ኣካይ ታና ጊዲኬ” ጊዴስ።

²² ኢስቲ ቃስ “ሂስቲን ኔ ኦኔ? ኑና ኪቲዳ ኣሳስ ኑ ዮታና ማላ ኔ ኔና ኦና ጋይ?” ጊዳ።

²³ ኢዚካ “ናቤ ኢሳያሲ ዮቲዳ ማላ ታኒ ‘ፆሳ ኦጌ ሱሪሲቴ’ ጊሼ ባዞ ቢታን ዋሲዛዴ ቃላ ጊሪሳ” ጊዴስ

²⁴ ፋርሳዌታፔ ኪቴቲዳ ኢሲ ኢሲ ኣሳቲ

²⁵ ሄሳ ጊሽ “ኔ ፆሲ ኪቲዳዴ ዎይኮ ቡሮ ያና ጌቴቲዳ ናቤይ ኔና ጊዶንታ ጊዲኮ ሂስቲን ኣዛስ ኑና ፃማቃይ?” ጊዲ ኢዛ ኦይቺዳ።

²⁶ ዮሃኒሲካ ኢስታስ “ታ ሃꬃን ፃማቃይስ፤ ጊዶ ኣቲን ኢንቴ ኤሮንታዴይ ኢንቴ ጊዶን ኤቂዴስ።

²⁷ ታፔ ጉዬራ ያናይሲ ኢዛ። ታ ኢዛ ጫማ ቃሾ ቢርሻናስ ቤሲዛዴ ጊዲኬ” ጊዴስ።

²⁸ ሃይሲ ዉሪ ሃኒዳይ ዮሃኒሲ ፃማቂዛ ዮርዳኖሴ ሻፋፔ ሄ ፒንꬃን ዲዛ ቢታኒያ ጌቴቲዛ ካታማና።

²⁹ ዎንቴꬃ ጋላስ ዮሃኒሲ ዬሱሲ ባኮ ዪሺን ቤዪዲ “ዴሬ ናጋራ ቢታፌ ዲጋና ፆሳ ዶርሲ ሄኮ ሃይሲች!

³⁰ ‘ታፔ ጉዬራ ያናይሲ ኢዚ ታፔ ካሴካ ዲዛ ጊሽ ታፔ ኣꬌስ’ ጋዳ ታ ኢንቴስ ዮቲዛይ ሃይሲች!

³¹ ታካ ታ ባጋራ ኢዛ ኤራቤኬ ሺን ጊዲኮካ ኢዚ ኢስራዔሌ ዴሬስ ቆንጫና ማላ ታ ሃꬃን ፃማቃሼ ያዲስ” ጊዴስ።

³² ካሌꬂዲካ ዮሃኒሲ ሂዝጊ ማርካቲዴስ “ፂሎ ኣያናይ ሃራጴ ካፎ ሚሳትዲ ሳሎፔ ዎꬊሺኒኔ ኢዛ ቦላ ኡቲሺን ቤያዲስ።

³³ ታ ታ ባጋራ ኢዛ ኤሪኬ ሺን ታ ሃꬃን ፃማቃና ማላ ታና ኪቲዳዴይ ‘ፂሎ ኣያናይ ኢዛ ቦላ ዎꬊ ሼምፒሺን ኔ ቤያናዴይ ፂሎ ኣያናን ሜጫናይ ኢዛ’ ጊዲ ታስ ዮቲዴስ።

³⁴ ታካ ሄሳ ቤያዲስ። ሄሳ ጊሽ ኢዚ ፆሳ ና ጊዲዳይሳ ታ ማርካታይስ” ጊዴስ።

³⁵ ዎንቴꬃ ጋላስ ዮሃኒሲ ባና ካሊዛ ናምዓታራ ሄን ኤቂዴስ።

³⁶ ዬሱሲ ኢዛ ኣቻራ ኣꬊሺን ዮሃኒሲ ቤዪዲ “ፆሳ ዶርሲ ሄኮ ሃይሲች!” ጊዴስ።

³⁷ ዮሃኒሳ ካሊዛ ናምዓቲ ሄሳ ሲይዲ ዬሱሳ ካሊዳ።

³⁸ ኢስቲ ኢዛ ካሊሺን ዬሱሲ ጉዬ ዩይ ፄሊዲ “ኣይ ኮዬቲ?” ጊዴስ። ኢስቲካ “ኣስታማሬ! ኔ ዱሳሶይ ኣዋ?” ጊዳ።

³⁹ ኢዚካ ኢስታ “ሃ ዪዲ ቤይቴ” ጊዴስ። ሄሳ ጊሽ ቢዲ ኢዚ ኣዋን ዲዛኮ ቤዪዳኔ ሄ ጋላስ ኢዛራ ኢሲፌ ፔዒዳ። ዎዴይካ ጌዴ ታሙ ሳቴሶ ቢዴስ።

⁴⁰ ዮሃኒሲ ዮቲዳ ቃላ ሲይዲ ዬሱሳ ካሊዳ ናምዓታፔ ኢሶይ ሲሞና ጴፅሮሳ ኢሻ ኢንዲራሳ።

⁴¹ ኢንዲራሲ ኮይሮ ባ ኢሻ ሲሞናኮ ቢዲኔ “ፆሲ ኪቲዳ ኪርስቶሳ ኑ ዴሚዶስ!” ጊዴስ።

² Izi koyro Xoossa achchan dees.

³ Medhetethi wuri izan medhettides. Medhettidazan izi baynda medhettiday issinaka duukku.

⁴ De7oy izan dawus. Hanna de7oya asas poo7o.

⁵ Poo7oy dhuman poo7ises. Dhumay poo7o mulekka xoonenna.

⁶ Xoossafe kiitettida Yohannisa geetettiza issadey dees.

⁷ Iza markatethan asi wuri ammanana mala Poo7os marka gidi yides.

⁸ Izi poo7o gish markattana yides attin izi ba hu7es poo7o gidenna.

⁹ Asa ubbas poo7o immiza tumu poo7oy hayssa ha alamezan Yesusan dees.

¹⁰ Qaalaykka kase alamen dees. Alameyka medhettiday izanna. Gido attin alamey iza eribenna.

¹¹ Izi ba baggatakko yiin iza baggati iza ekkibeetenna.

¹² Gido attin iza ekkidayti iza sunthan ammanidayti isti Xoossa nayta gidana mala maata istas immides.

¹³ Istika Xoossa nayta gididay Xoossafe yelettida gish attin asa zerethafe hessika asa wogan woykko asho shenen gidenna.

¹⁴ Qaalaykka as gidides. Xoossa kiyatethaninne tuman kumidi nunan aqides; issi naas aawa matan diza boncho misatiza iza boncho nu beydos.

¹⁵ Yohannisikka “Taappe guyera yizayssi taappe aadhdhees. Gaasoyka izi taappe kasekka dees gaada ta intes yootidayssi hekko hayssi izakko!” gi markattides.

¹⁶ Iza kumeththa kiyatethan nu wuri kiyatetha bolla kiyateth ekkidos.

¹⁷ Wogay Muse baggara imettides; kiyatethinne tumay gidikko Yesus Kirstoosa baggara nuus yides.

¹⁸ Xoosse beyiday oonikka baawa. Gido attin Xoossa Aawa matan diza Xoossa Naa issoy xalala iza qoncisides.

¹⁹ Ayhudata daannati Yerusalameppe Qeesetanne Lewe nayta Yohannisakko kiittidi “Ne oonee?” giidi oychishin,

²⁰ Yohannisi “Tani Kirstoosa gidikke” giidi geeshshi markattides attin markattanas ixibenna.

²¹ Istika “Histin ne oonee? Ne Elaasaa?” giidi oychida. Izikka “Gidikke” giidi istas zaarides. Istika “Izi yaana geetettida nabey nenee?” gida. Izikka “Akay tana gidikke” gides.

²² Isti qas “Histin ne oonee? Nuna kiittida asas nu yootana mala ne nena oona gay?” gida.

²³ Izikka “Nabe Isayaassi yootida mala tani ‘Xoossa oge suurisite’ gishe bazzo biittan waassizade qaala giirisa” gides

²⁴ Farsaaweetappe kiitettida issi issi asati

²⁵ Hessa gish “Ne Xoossi kiittidade woykko buro yaana geetettida nabey nena gidonta gidikko histin aazas nuna xammaqay?” giidi iza oychida.

²⁶ Yohannisikka istas “Ta haaththan xammaqays; gido attin inte erontaddey inte giddon eqqides.

²⁷ Taappe guyera yaanayssi iza. Ta iza caamma qasho birshanas bessizade gidikke” gides.

²⁸ Hayssi wuri haniday Yohannisi xammaqiza Yordanoose shaafappe he pinthan diza Bitaaniya geetettiza katamanna.

²⁹ Wontetha gallas Yohannisi Yesusi baako yishin beyidi “Dere nagara biittafe diggana Xoossa dorsi hekko hayssich!

³⁰ ‘Taappe guyera yaanayssi izi taappe kasekka diza gish taappe aadhdhees’ gaada ta intes yootizay hayssich!

³¹ Takka ta baggara iza erabeekke shin gidikkokka izi Isra7eele deres qoncana mala ta haaththan xammaqashe yadis” gides.

³² Kaalethidikka Yohannisi hizgi markattides “Xillo Ayanay haraphe kafo misatdi saloppe wodhdhishininne iza bolla uttishin beyadis.

³³ Ta ta baggara iza erike shin ta haaththan xammaqana mala tana kiittidadey ‘Xillo Ayanay iza bolla wodhdhi shempishin ne beyanaddey Xillo Ayanan meecanay iza’ giidi taas yootides.

³⁴ Takka hessa beyadis. Hessa gish izi Xoossa naa gididayssa ta markatays” gides.

³⁵ Wontetha gallas Yohannisi bana kaalliza nam7atara heen eqqides.

³⁶ Yesusi iza achchara aadhdhishin Yohannisi beyidi “Xoossa dorsi hekko hayssich!” gides.

³⁷ Yohannisa kaalliza nam7ati hessa siydi Yesusa kaallida.

³⁸ Isti iza kaallishin Yesusi guye yuuy xeelidi “Ay kooyetii?” gides. Istika “Astamare! Ne duussasoy awaa?” gida.

³⁹ Izikka ista “Ha yiidi beyte” gides. Hessa gish biidi izi awan dizaakko beyidanne he gallas izara issife pe7ida. Wodeykka gede tammu saateso bides.

⁴⁰ Yohannisi yootida qaala siydi Yesusa kaallida nam7atappe issoy Simoona Phexroosa isha Indiraasa.

⁴¹ Indiraassi koyro ba isha Simoonakko biidinne “Xoossi kiittida Kirstoosa nu demmidos!” gides.