ዮሃኒሳ 13:11-29 in Gamo

¹¹ ዬሱሲ “ኢንቴ ኡባቲካ ጌሽ ዴኬታ” ጊዳይ ኢዛ ኣꬂ ኢማናዴይ ኦናኮኔ ኤሪዛ ጊሻሳ።

¹² ኢስታ ቶሆ ሜጪዳፔ ጉዬ ባ ማይዖ ኤኪ ማይዒዲ ካሴ ባ ኡቲዳሶን ሲሚ ኡቲዴስ። ቃሴ ኢስታስ “ታ ኢንቴስ ኣይ ኦꬂዳኮኔ ዎዝናን ዎꬂዴቲ?

¹³ ኢንቴ ታና ኣስታማሬኔ ጎዳ ጌታ፤ ታ ቃስ ኣስታማሬኔ ጎዳ ጊዲዳ ጊሽ ኢንቴ ጉሳይ ቱሙኮ።

¹⁴ ሂስቲኮ ታ ኢንቴስ ጎዳኔ ኣስታማሬ ጊዳሼ ኢንቴ ቶሆ ሜጪዛ ጊዲኮ ኢንቴካ ኢንቴ ጊዶን ኢሶይ ኢሳ ቶሆ ሜጫና ቤሴስ።

¹⁵ ታ ኢንቴስ ኦꬂዳይሳ ማላ ኢንቴካ ኦꬃና ማላ ታ ኢንቴስ ሌሚሶ ቤሳዲስ።

¹⁶ ታ ኢንቴስ ቱሙ ጋይስ፤ ኣሽካራይ ጎዳፔ ኣꬌና፤ ኪቴቲዳዴይ ኪቲዳዴፌ ኣꬌና።

¹⁷ ኢንቴ ሃይሳ ኤሪዲ ኦሶን ፔይሺኮ ኢንቴ ኣንጄቲዳይታ።

¹⁸ “ታ ሃይሳ ጊዛይ ኢንቴ ኡባታ ጊሽ ዴና። ታኒ ታ ዶሪዳይታ ዉርሳ ኤራይስ፤ ጊዶ ኣቲን ‘ታ ካꬅ ሚዳዴይ ታ ሞርኬ ጊዲዲ ታ ቦላ ዴንዲዴስ’ ጊዛ ማፃፋ ቃላይ ፖሌታናስ ኮሼስ።

¹⁹ ታ ሃይሳ ሃዒራ ኢንቴስ ዮቲዛይ ኢዚ ፖሌቲዛ ዎዴ ታ ኦናኮኔ ኢንቴ ኣማናና ማላ።

²⁰ ታ ኢንቴስ ቱሙ ጋይስ፤ ታ ኪቲዳዴ ኤኪዛዴይ ታና ኤኬስ፤ ታና ኤኪዛዴይ ታና ኪቲዳዴ ኤኬስ” ጊዴስ።

²¹ ዬሱሲ ሄሳ ጊ ሲሚዲ ኬሂ ቆፋን ጌሊዲኔ “ታ ኢንቴስ ቱሙ ጋይስ፤ ኢንቴ ጊዶፌ ኢሳዴይ ታና ኣꬂ ኢማና” ጊዲ ቆንጬን ዮቲዴስ።

²² ኢዛ ካሊዛይቲ ሄሳ ኢዚ ኦና ጊሽ ጊዳኮኔ ኤሮንታ ጊሽ ባ ጊዶን ኢሶይ ኢሳራ ፄሌቲዳ።

²³ ኢዛ ካሊዛይታ ጊዶፌ ዬሱሲ ሲቂዛ ኢሶይ ዬሱሳ ኣቻን ኡቲዴስ።

²⁴ ሲሞና ጌቴቲዛ ጴፅሮሲ ዮሃኒሳ ሶምዒ ቤሲዲ “ኢዚ ኦና ጊሽ ጊዛኮኔ ኣኔ ኢዛ ኦይቻ” ጊዴስ።

²⁵ ሄሳ ጊሽ ኢዚ ባ ቆꬌ ጌዴ ዬሱሳ ሃይꬃኮ ሺሺዲ “ጎዶ! ኢዚ ኦኔ?” ጊዲ ኦይቺዴስ።

²⁶ ዬሱሲካ ዛሪዲ “ኢዛዴይ ታ ሃዒ ቡዴና ዎፄን ꬊምዓዳ ባርሲዛዴ” ጊዴስ። ሄሳ ጊ ሲሚዲ ቡዴና ዎፄን ꬊምዒ ኤኪዲ ኣስቆሮንቶፌ ዪዳ ሲሞና ና ዩሁዳ ባርሲዴስ።

²⁷ ዩሁዳይ ኢዛ ባꬊዳ ማላ ሄራካ ፃላዔይ ኢዛን ጌሊዴስ። ዬሱሲካ ዩሁዳ “ኔ ኦꬃናስ ቆፒዳይሳ ኤሌላ ኦꬃ” ጊዴስ።

²⁸ ዬሱሲ ሄሳ ኣዛስ ጊዳኮኔ ማዳን ኡቲዳ ኣሳፔ ዮዖይ ጌሊዳዴይ ኦኒካ ዴና።

²⁹ ዩሁዳይ ሚሽ ኦይኪዛዴ ጊዲዳ ጊሽ ዬሱሳ ካሊዛይታፔ ባጋቲ ዬሱሲ ዩሁዳ “ባዓሌዛስ ኮሺዛይሳ ሻማ ዎይኮ ማንቆታስ ሙፁዋታ ኢማ” ጊዳ ሚሳቲዴስ።

¹¹ Yesusi “Inte ubbatikka geesh deekketa” giday iza aaththi immanaddey oonakkonne eriza gishassa.

¹² Ista toho meecidappe guye ba may7o ekki may7idi kase ba uttidason simmi uttides. Qasse istas “Ta intes ay ooththidakkonne woznan woththidetii?

¹³ Inte tana Astamarenne Goda geeta; Ta qas Astamarenne Goda gidida gish inte guussay tumukko.

¹⁴ Histikko ta intes Godanne astamare gidashe inte toho meeciza gidikko inteka inte giddon issoy issa toho meecana bessees.

¹⁵ Ta intes ooththidaysa mala inteka ooththana mala ta intes leemiso bessadis.

¹⁶ Ta intes tumu gays; ashkaray godappe aadhdhenna; kiitettidadey kiitidadefe aadhdhenna.

¹⁷ Inte hayssa eridi ooson peyshshikko inte anjettidayta.

¹⁸ “Ta hayssa gizay inte ubbata gish deenna. Tani ta dooridayta wursa erays; gido attin ‘Ta kath midadey ta morke gididi ta bolla dendides’ giza maxaafa qaalay poletanas koshshees.

¹⁹ Ta hayssa ha7ira intes yootizay izi poletiza wode ta oonakkonne inte ammanana mala.

²⁰ Ta intes tumu gays; ta kiittidade ekkizadey tana ekkees; tana ekkizadey tana kiittidade ekkees” gides.

²¹ Yesusi hessa gi simmidi keehi qofan gelidinne “Ta intes tumu gays; inte giddofe issadey tana aaththi immana” giidi qoncen yootides.

²² Iza kaallizayti hessa izi oona gish gidakkonne eronta gish ba giddon issoy issara xeeletida.

²³ Iza kaallizayta giddofe Yesusi siiqiza issoy Yesusa achchan uttides.

²⁴ Simoona geetettiza Phexroosi Yohannisa som7i bessidi “Izi oona gish gizakkonne ane iza oycha” gides.

²⁵ Hessa gish izi ba qoodhe gede Yesusa haythako shiishshidi “Godo! Izi oonnee?” giidi oychides.

²⁶ Yesusikka zaaridi “Izaadey ta ha7i budena woxen dhim7ada barsizadde” gides. Hessa gi simmidi budena woxen dhim7i ekkidi Asqoroontofe yida Simoona naa Yuhuda barsides.

²⁷ Yuhuday iza baadhida mala heerakka Xala7ey izan gelides. Yesusikka Yuhuda “Ne ooththanas qoppidayssa elela ooththa” gides.

²⁸ Yesusi hessa aazas gidakkone maaddan uttida asappe yo7oy gelidadey oonikka deenna.

²⁹ Yuhuday miish oykkizade gidida gish Yesusa kaallizaytappe baggati Yesusi Yuhuda “Ba7aalezas koshshizayssa shama woykko manqotas muxuwata imma” gida misatides.