ዮሃኒሳ 12:21-36 in Gamo

²¹ ኢስቲካ ጋሊላ ጊዶን ዲዛ ቤቴሳይዳ ጌቴቲዛ ዴሬ ኣስ ፒሊጶሳ ጌቴቲዛዴኮ ቢዲ “ጎዶ! ኑ ዬሱሳ ቤያና ኮዮስ” ጊዳ።

²² ፒሊጶሲካ ኢንዲራሳስ ዮቲዴስ። ኢንዲራሲኔ ፒሊጶሲ ቢዲ ዬሱሳስ ዮቲዳ።

²³ ዬሱሲካ ኢስታስ “ሄኮ ኣሳ ናይ ቦንቼቲዛ ሳቴይ ጋኪዴስ።

²⁴ ታ ኢንቴስ ቱሙ ጋይስ፤ ጊስቴ ኣይፌይ ቢታን ዎꬋዳ ሃይቆንታ ጮዑ ጋ ኡቲኮ ባርካ ኣታዉስ። ኢዛ ሃይቂዛ ጊዲኮ ሃራ ዳሮ ኣይፋዉስ።

²⁵ ባ ሼምፖ ዶሲዛዴይ ꬋይሴስ። ሃይሳ ቢታ ቦላ ባ ሼምፖ ኢፂዛዴይ ጊዲኮ ሜርና ዴዖ ዴሜስ።

²⁶ ታስ ኦꬃና ኮዪዛዴይ ታና ካሎ፤ ታስ ኦꬂዛዴይ ታ ዲዛሶን ዳና፤ ታስ ኦꬂዛዴ ታ ኣዋይ ኢዛ ቦንቻና” ጊዴስ።

²⁷ ቃሴካ ዬሱሲ “ሄኮ ታ ሼምፖያ ሜቶታዱስ ‘ታ ኣዋዉ! ሃ ሳቴይፔ ታና ኣሻ ጎሻ?’ ታ ሂዝጎንታ ማላ ታ ዪዳይ ሃኖ ሃ ሜቶ ሳቴይሳ።

²⁸ “ታ ኣዋዉ! ኔ ኔ ሱንꬃ ቦንቻ” ጊዴስ። ሄሳፌ ካሊዲ “ታኒ ታ ሱንꬃ ቦንቻዲስ፤ ቃሴካ ጉጃ ቦንቻና” ጊዛ ቃላይ ሳሎፔ ዪዴስ።

²⁹ ሄን ጋዳን ኤቂዳ ኣሳይ ሄሳ ሲይዲ “ዳዳይ ዳዳቴስ” ጊዳ። ባጋይቲ ቃሴ “ኪታንቻኮ ሃሳዪዛይ” ጊዳ።

³⁰ ዬሱሲ “ሃይሲ ጊሪሳይ ዪዳይ ኢንቴ ጊሻሳ ኣቲን ታ ጊሽ ጊዴና።

³¹ ሃይሲ ኣላሜይ ፒርዴታና ዎዴይ ሃይሳ፤ ሃይሳ ዴሬዛ ሃሪዛ ፃላዔይ ሃዒ ጌዴ ካሬ ዬጌታና።

³² ታኒ ꬎቁ ጋዳ ካቄቲዛ ዎዴ ኣሳ ዉርሳ ታኮ ዛራና” ጊዴስ።

³³ ዬሱሲ ሄሳ ዮቲዳይ ኢዚ ኣይ ማላ ሃይቆ ሃይቃናኮ ኤሪሳናሳ።

³⁴ ኣሳይ ቃሴ “ኑ ዎጋን ፃፌቲዳይ ‘ፆሲ ኪቲዳዴይ ሜርናስ ዳና’ ጌስ፤ ሂስቲን ኔ ቃሴ ዋናዳ ‘ኣሳ ናይ ꬎቁ ጊ ካቄታና ቤሴስ’ ጋይ? ኔ ጊዛ ኣሳ ናይ ኣዋይሴ?” ጊዲ ኦይቺዳ።

³⁵ ዬሱሲ ኢስታስ “ሃዒ ጉꬃ ዎዴስ ኢንቴናራ ፖዖይ ዴስ፤ ጋዴይ ꬉሞንታ ፖዖራ ሃሙቲቴ፤ ቃማራ ሃሙቲዛዴይ ኢዚ ኣዋ ቢዛኮኔ ኤሬና።

³⁶ ኢንቴ ፖዖ ናይታ ጊዳና ማላ ፖዖይ ዲሺን ፖዖን ኣማኒቴ” ጊዴስ። ዬሱሲ ሄሳ ጊዳፔ ጉዬ ቢዲ ኢስታ ኣይፌፔ ጌሚዴስ።

²¹ Istika Galila giddon diza Betesayda geetettiza dere as Piliphoosa geetettizadeko biidi “Godo! Nu Yesusa beyana koyoos” gida.

²² Piliphoosikka Indiraasas yootides. Indiraassinne Piliphoosi biidi Yesusas yootida.

²³ Yesusikka istas “Hekko Asa Nay bonchettiza saatey gakkides.

²⁴ Ta intes tumu gays; giste ayfey biittan wodhdhada hayqqonta co7u ga uttikko barka attawus. Iza hayqqiza gidikko hara daro ayfawus.

²⁵ Ba shempo dosizaddey dhaysses. Hayssa Biitta bolla ba shempo ixizadey gidikko merna de7o demmees.

²⁶ Taas ooththana koyizadey tana kaallo; Taas ooththizadey ta dizason daana; Taas ooththizade ta Aaway iza bonchana” gides.

²⁷ Qasseka Yesusi “Hekko ta shempoya metotadus ‘Ta Aawawu! Ha saateype tana ashsha gooshaa?’ Ta hizgonta mala ta yiday hanno ha meto saateyssa.

²⁸ “Ta Aawawu! Ne ne suntha boncha” gides. Hessafe kaallidi “Tani ta suntha bonchadis; qasseka gujja bonchana” giza qaalay saloppe yides.

²⁹ Heen gadaan eqqida asay hessa siydi “Daday dadates” gida. Baggayti qasse “Kiitanchakko haasayizay” gida.

³⁰ Yesusi “Hayssi giirissay yiday inte gishassa attin ta gish gidenna.

³¹ Hayssi alamey pirdettana wodey hayssa; hayssa dereza haariza Xala7ey ha7i gede kare yegettana.

³² Tani dhoqu gaada kaqettiza wode asa wursa taakko zaarana” gides.

³³ Yesusi hessa yootiday izi ay mala hayqo hayqqanakko erissanassa.

³⁴ Asay qasse “Nu wogan xaafetiday ‘Xoossi kiittidadey mernas daana’ gees; Histin ne qasse waanada ‘Asa Nay dhoqu gi kaqqettana bessees’ gay? Ne giza Asa Nay awayssee?” giidi oychida.

³⁵ Yesusi istas “Ha7i guutha wodes intenara poo7oy dees; gadey dhumonta poo7ora hammuttite; Qamara hamuttizaddey izi awa bizakkonne erenna.

³⁶ Inte poo7o nayta gidana mala poo7oy dishin poo7on ammanite” gides. Yesusi hessa gidappe guye biidi ista ayfeppe geemmides.