ዮሃኒሳ 11:6-40 in Gamo

⁶ ጊዶ ኣቲን ኣላዛሬይ ሳኬቲዳይሳ ሲዪ ዎꬂዲ ሄን ባ ዲዛሶን ናምዑ ጋላስ ጋምዒዴስ።

⁷ ሄሳፌ ጉዬ ባና ካሊዛይታ “ኣኔ ዩሁዳ ቢታ ሲሚ ቦስ” ጊዴስ።

⁸ ኢስቲካ “ኣስታማሬ! ጉꬃ ዎዴፔ ካሴ ኣሳይ ኔና ሹቻራ ጫዳና ኮዬቴስኮሺን፤ ኔ ቃሴ ሃዒ ሄ ሲማ ባኔ?” ጊዳ።

⁹ ዬሱሲ ኢስታስ “ኢሲ ጋላሳን ታማኔ ናምዑ ሳቴይ ዴስ ዴኔ? ጋላሳራ ሃሙቲዛ ኣሲ ሃ ኣላሜዛ ፖዖን ሲሜሬቲዛ ጊሽ ꬉጴቴና።

¹⁰ ꬉጴቲዛዴይ ጊዲኮ ኢዚ ቃማራ ሃሙቲዛዴ። ጋሶይካ ፖዖይ ባይንዳ ጊሻሳ” ጊዴስ።

¹¹ ሄሳ ኢስታስ ዮቲዳፔ ጉዬ “ኑ ላጌ ኣላዛሬይ ꬊስኪዴስ፤ ታካ ኢዛ ꬊስኮፌ ዴንꬃና ባይስ” ጊዴስ።

¹² ኢዛ ካሊዛይቲ ኢዛ “ጎዶ! ኢዚ ꬊስኪዳ ጊዲኮ ዴንዳና” ጊዳ።

¹³ ዬሱሲ ኢስታስ ሄሳ ዮቲዳይ ኣላዛሬ ሃይቆ ጊሻሳ ሺን ኢዛ ካሊዛይታስ ቃሴ ꬊስኮ ጊሽ ዮቲዳ ሚሳቲዴስ።

¹⁴ ሄሳ ጊሽ ቆንጬራ ኢስታስ “ኣላዛሬይ ሃይቂዴስ።

¹⁵ ኢንቴ ኣማናና ማላ ታ ሄን ዶንታ ኣጊዳይሲ ኢንቴ ጊሽ ታና ኡፋይሴስ፤ ሃዒ ጊዲኮ ኣኔ ጌዴ ኢዛኮ ቦስ” ጊዴስ።

¹⁶ ቃሴ ዲዲሞሳ ጌቴቲዛ ቶማሲ ሃንኮ ዬሱሳ ካሊዛይታ “ኣኔ ኑካ ቢዲ ኢዛራ ኢሲፌ ሃይቆስ” ጊዴስ።

¹⁷ ዬሱሲ ቢ ጋኪሺን ኣላዛሬይ ሃይቂ ሞጌቲን ኦይዱ ጋላስ ጊዲዴስ።

¹⁸ ቢታኒያይ ዬሩሳላሜፔ ባጋ ሳቴ ኦጌ ሃኬስ።

¹⁹ ኢስታ ኢሻይ ሃይቂዳ ጊሽ ማራሞኔ ማርታ ሚንꬄꬃናስ ዳሮ ኣይሁዳ ኣሳይ ኢስታኮ ሺቂዴስ።

²⁰ ዬሱሳ ዩሳ ማርታይ ሲያዳ ኢዛ ሞካ ኤካና ባዱስ፤ ማራማ ጊዲኮ ሶን ኡታዱስ።

²¹ ማርታይ ዬሱሳ “ጎዶ! ኔ ሃን ዲዛኮ ታ ኢሻይ ሃይቄናኮሺን።

²² ሃዒካ ጊዲኮ ኔ ዎሲዳ ዉርሲ ፆሲ ኔስ ኢማናይሳ ታ ኤራይስ” ጋዱስ።

²³ ዬሱሲካ ኢዚስ “ኔ ኢሻይ ዴንዳና” ጊዴስ።

²⁴ ማርታይ ቃሴ “ዉርሴꬃን ዴንꬃ ዎዴ ኢዚ ዴንዳናይሳ ታካ ኤራይስ” ጋዱስ።

²⁵ ዬሱሲካ ኢዚስ “ዴንዶይኔ ዴዖይ ታና፤ ታና ኣማኒዛዴይ ሃይቂኮካ ፓፃ ዳና።

²⁶ ታናን ዲዛዴይኔ ታና ኣማኒዛዴይ ሙሌካ ሃይቄና፤ ሄሳ ኔ ኣማናይ?” ጊዴስ።

²⁷ ኢዛካ ዛራዳ “ኤ ጎዶ! ኔኒ ዱጌ ሃ ኣላሜዛ ኪቴቲዳ ፆሳ ና ጊዲዳይሳ ታ ኣማናይስ” ጋዱስ።

²⁸ ሄሳ ጋዳኔ ሲማዳ ባ ሚቼዮ ማራሞ ዱማ ፄይጋ ኬሳዳ “ኣስታማሬይ ኔና ኮዬስ” ጋዱስ።

²⁹ ማራማካ ሄሳ ሲዪዳ ማላ ኤሌላ ዴንዳዳ ኢዛኮ ባዱስ።

³⁰ ሄሳ ጋካናስ ዬሱሲ ማርታራ ጋጊዳሶን ዴስ ኣቲን ጌዴ ጉታ ጊዶ ጌልቤና

³¹ ማራሞ ሚንꬄꬂሼ ኢዚራ ሶን ዲዛ ኣይሁዳቲካ ማራማ ፑሱኩ ጋ ዴንዳ ኤቃዳ ኬዚዳይሳ ቤዪዲ ኢዛ ኣላዛሬ ዱፎ ኣቻን ዬካና ቢዛ ሚሳቲን ኢዞ ካሊዳ።

³² ማራማ ዬሱሲ ዲዛሶ ጋካ ኢዛ ዴሚዳ ማላ ኢዛ ቶሆ ቦላ ጉፋናዳ “ጎዶ! ኔ ሃን ዲዛኮ ታ ኢሻይ ሃይቄናኮሺን” ጋዱስ።

³³ ኢዛኔ ኢዞ ካሊ ዪዳ ኣይሁዳቲ ዬኪዛይሳ ዬሱሲ ቤዪዲ ዳሮ ሚሼቲዲ

³⁴ “ኢዛ ኣዋን ሞጊዴቲ?” ጊዲ ኦይቺዴስ፤ ኢስቲካ “ጎዶ! ሃ ያዳ ቤያ” ጊዳ።

³⁵ ዬሱሲካ ኣፉንፂዴስ።

³⁶ ኣይሁዳቲካ “ኢዚ ኢዛ ኣይ ማላ ሲቂዛኮ ቤይቴ” ጊዳ።

³⁷ ኢስታ ጊዶፌ ኢሲ ኢሲ ኣሳቲ “ሃይሲ ቆቄ ኣዴዛ ኣይፌ ፖግዳይሲ ሃይሳዴይ ሃይቆንታ ማላ ኦꬃናስ ዳንዳዬኔ?” ጊዳ።

³⁸ ዬሱሲ ኢዛ ዎዝናይ ሚሼቲን ጌዴ ዱፎኮ ቢዴስ፤ ዱፎዚካ ሹቻራ ጎርዴቲዳ ጎንጎሎ።

³⁹ ኢዚካ ኢስታ “ሹቻ ዴንꬂቴ!” ጊዴስ። ሃይቂዳይሳ ሚቼያ ማርታይ “ጎዶ! ኢዚ ሃይቂን ሃቺ ኦይዱ ጋላስ ጊዲዳ ጊሽ ፂንቃናኮ!” ጋዱስ።

⁴⁰ ዬሱሲካ “ኔ ኣማኒዛ ጊዲኮ ፆሳ ቦንቾ ቤያንዳሳ ጋዳ ኔስ ታ ዮታቤይኪና?” ጊዴስ።

⁶ Gido attin Alazaarey saketidayssa siyi woththidi heen ba dizason nam7u gallas gam7ides.

⁷ Hessafe guye bana kaallizayta “Ane Yuhuda biitta simmi boos” gides.

⁸ Istika “Astamare! Guutha wodeppe kase asay nena shuchchara caddana koyetteskoshin; ne qasse ha7i he simma baanee?” gida.

⁹ Yesusi istas “Issi gallassan tammanne nam7u saatey dees denee? Gallasara hamuttiza asi ha alameza poo7on simeretiza gish dhuphetenna.

¹⁰ Dhuphetizadey gidikko izi qamara hamutizade. Gaasoyka poo7oy baynda gishassa” gides.

¹¹ Hessa istas yootidappe guye “Nu lagge Alazaarey dhiskides; takka iza dhiskofe denthana bays” gides.

¹² Iza kaallizayti iza “Godo! izi dhiskida gidikko dendana” gida.

¹³ Yesusi istas hessa yootiday Alazaare hayqo gishassa shin iza kaallizaytas qasse dhisko gish yootida misatides.

¹⁴ Hessa gish qoncera istas “Alazaarey hayqqides.

¹⁵ Inte ammanana mala ta heen doonta aggidayssi inte gish tana ufaysses; ha7i gidikko ane gede izakko boos” gides.

¹⁶ Qasse Didimoosa geetettiza Toomaassi hanko Yesusa kaallizayta “Ane nukka biidi izara issife hayqos” gides.

¹⁷ Yesusi bi gakkishin Alazaarey hayqqi moogetin oyddu gallas gidides.

¹⁸ Bitaaniyay Yerusalameppe bagga saate oge haakkees.

¹⁹ Ista ishay hayqida gish Maramonne Marta minthethanas daro Ayhuda asay istako shiiqides.

²⁰ Yesusa yuussaa Martay siyada iza mokka ekkana badus; Maarama gidikko soon uttadus.

²¹ Martay Yesusa “Godo! Ne haan dizaakko ta ishay hayqqenakkoshin.

²² Ha7ikka gidikko ne woossida wursi Xoossi nees immanayssa ta erays” gadus.

²³ Yesusikka izis “Ne ishay dendana” gides.

²⁴ Martay qasse “Wursethan dentha wode izi dendanayssa takka erays” gadus.

²⁵ Yesusikka izis “Dendoynne de7oy tana; tana ammanizadey hayqqikkoka paxa daana.

²⁶ Tanan dizaddeynne tana ammanizadey mulekka hayqqenna; hessa ne ammanay?” gides.

²⁷ Izakka zaarada “Ee Godo! Neni duge ha alameza kiitettida Xoossa Naa gididayssa ta ammanays” gadus.

²⁸ Hessa gaadanne simmada ba micheyo Maaramo dumma xeeyga kessada “Astamarey nena koyees” gadus.

²⁹ Maaramakka hessa siyida mala elela dendada izakko badus.

³⁰ Hessa gakkanaas Yesusi Martara gaaggidason dees attin gede guta giddo gelbenna

³¹ Maaramo minthethishe izira soon diza Ayhudatikka Maarama pusuku ga denda eqqada kezidayssa beyidi iza Alazaare duufo achchan yeekkana biza misatin izo kaallida.

³² Maarama Yesusi dizaso gakka iza demmida mala iza toho bolla gufannada “Godo! Ne haan dizaakko ta ishay hayqqenakkoshin” gadus.

³³ Izanne izo kaalli yida Ayhudati yeekkizayssa Yesusi beyidi daro mishetidi

³⁴ “Iza awan moogidetii?” giidi oychides; Istika “Godo! Haa yaada beya” gida.

³⁵ Yesusikka afunxides.

³⁶ Ayhudatikka “Izi iza ay mala siiqizako beyte” gida.

³⁷ Ista giddofe issi issi asati “Hayssi qooqe addeza ayfe pogdayssi hayssadey hayqqonta mala ooththanas dandayenee?” gida.

³⁸ Yesusi iza woznay mishetin gede duufokko bides; duufozikka shuchchara gordettida gongolo.

³⁹ Izikka ista “Shuchchaa denthite!” gides. Hayqqidayssa micheya Martay “Godo! Izi hayqqin hachchi oyddu gallas gidida gish xinqanakko!” gadus.

⁴⁰ Yesusikka “Ne ammaniza gidikko Xoossa boncho beyandasa gaada nees ta yootabeykkinaa?” gides.